ភ្នំពេញ ៖ នៅក្នុងឱកាសបុណ្យភ្ជុំបិណ្ឌប្រពៃណីខ្មែរ នេះ កម្មករក្រុមហ៊ុនស៊ីន ទ្រីនឹងត្រូវឈប់សម្រាក ចំនួន៦ថ្ងៃ ដូច្នេះដើម្បីរក្សាសោភណភាព និង បរិយាកាសល្អ គ្មានសំរាមគរ នៅតាមផ្លូវនៅក្នុងរាជធានីភ្នំពេញទាំងមូលរដ្ឋបាលរាជធានីភ្នំពេញ បានអំពាវនាវដល់បងប្អូនប្រជាពលរដ្ឋទាំងអស់សូមទុកដាក់ សំរាមឲ្យ បានត្រឹមត្រូវ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានប្រាប់វិទ្យុជាតិកម្ពុជាថា ប្រជាពលរដ្ឋត្រូវទុកដាក់សំរាមឲ្យមានសណ្តាប់ធ្នាប់ដាក់នៅក្នុងធុងសំរាម ឬ ទុកដាក់នៅក្នុងផ្ទះមួយរយៈសិន ហើយក្រុមអាជីវករលក់ដូរនៅតាមទីសាធារណៈត្រូវមានធុងសំរាម ឬ ថង់ដាក់សំរាម ដោយខ្លួនឯង ដើម្បីជៀសវាងការបោះចោលសំរាមគ្មានសណ្តាប់ធ្នាប់ក្នុងរាជធានីភ្នំពេញ។
លោកបន្តថា ការទុកដាក់សំរាមត្រឹមត្រូវ នឹងលើកកម្ពស់ សោភ័ណភាព សណ្តាប់ធ្នាប់ អនាម័យ និងបរិស្ថានសាធារណៈក្នុងរាជធានីភ្នំពេញ។
ក្រុមហ៊ុនស៊ិនទ្រី នឹងផ្អាកប្រតិបត្តិប្រមូល និងការដឹកជញ្ជូនសំរាមក្នុងរាជធានីភ្នំពេញចំនួន៦ថ្ងៃ ចាប់ពីថ្ងៃទី៦ដល់ថ្ងៃទី១១ ខែតុលា ដោយសារតែកម្លាំងកម្មករត្រូវឈប់សម្រាកទៅលេងស្រុកកំណើតនាឱកាសបុណ្យភ្ជុំបិណ្ឌ។
យោងតាមរបាយការណ៍របស់អាជ្ញាធររាជធានីភ្នំពេញ បានប៉ាន់ប្រមាណថា ក្នុងមួយថ្ងៃៗក្នុងរាជធានី ភ្នំពេញ មានសំរាមកើនឡើងជាង៣ពាន់តោន ដែលត្រូវដឹកទៅកាន់ទីលានចាក់សំរាមនៅខណ្ឌដង្កោ រាជធានីភ្នំពេញ៕
Source: Kampuchea Thmey Daily
0 Comments