ព្រឹត្តិការណ៍រត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្ត ខេត្តសៀមរាប ដែលត្រូវចាប់ផ្ដើមនៅថ្ងៃទី០២ ខែធ្នូ ឆ្នាំ២០១៨ខាងមុខ មកទល់ថ្ងៃទី២៦ ខែតុលា មានអ្នកចុះឈ្មោះចូលរួមប្រកួតចំនួនជាង៧.០០០នាក់ហើយ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានប្រកាសបែបនេះនៅក្នុងសន្និសីទសារព័ត៌មាន កាលពីរសៀលថ្ងៃទី២៦ ខែតុលា ឆ្នាំ២០១៨ នៅទីស្នាក់ការគណៈកម្មាធិការជាតិអូឡាំពិកកម្ពុជា។
លោកបញ្ជាក់ថា គិតមកដល់ពេលនេះ ចំនួនអ្នកចុះឈ្មោះចូលរួមរត់ពាក់កណ្ដាលម៉ារ៉ាតុងអន្តរជាតិអង្គរឆ្នាំ២០១៨នៅអង្គរវត្ត បានចំនួនជាង៧.០០០នាក់ហើយ ក្នុងនោះមានជនបរទេសជាង៣.៦០០នាក់ ដែលមកពីបណ្ដាប្រទេសចំនួន៧៤លើពិភពលោក។ ក្នុងចំណោមជនបរទេសដែលចុះឈ្មោះចូលរួមច្រើនជាងគេ ភាគច្រើនគឺ អង់គ្លេស អាមេរិក និងបារាំង។
តាមរយៈសន្ទស្សន៍ នៃចំនួនអ្នកចុះឈ្មោះចូលរួមរត់ប្រណាំងពាក់កណ្ដាលម៉ារ៉ាតុងអន្តរជាតិអង្គរឆ្នាំ២០១៨ពេលនេះ ត្រូវបានលោកអគ្គលេខាធិការអូឡាំពិក វ៉ាត់ ចំរើន អះអាងថា តួលេខអ្នកចូលរួមឆ្នាំនេះ គឺមិនធាក់ថយ ឬក៏ថយចុះនោះទេ ខណៈដែលឆ្នាំមុនមានអ្នកចូលរួមប្រមាណ១០.៥០០នាក់ មកពីជាង៨០ប្រទេសនោះ។
លោក វ៉ាត់ ចំរើន បានមានប្រសាសន៍ទៀតថា ឆ្នាំនេះ គឺជាលើកទី២៣ហើយ ដែលក្រសួងទេសចរណ៍ និងគណៈកម្មាធិការជាតិអូឡាំពិកកម្ពុជា បានសហការជាមួយអង្គការក្រៅរដ្ឋាភិបាលនានា ប្រារព្ធរៀបចំទិវារត់ប្រណាំងដ៏ធំនេះឡើងដើម្បីប្រមូលយកថវិកា ដែលទទួលបានពីការចុះឈ្មោះចូលរួម ទៅជួយដល់មន្ទីរពេទ្យគន្ធបុប្ផា និងអង្គការមួយចំនួនទៀត ដែលមានគោលដៅជួយដល់កុមារក្រីក្រក្នុងប្រទេសកម្ពុជា។
លោកបានធ្វើការកត់សំគាល់ថា ពីមួយឆ្នាំទៅមួយឆ្នាំ ចំនួនភ្ញៀវទេសចរ ដែលចូលរួមរត់ប្រណាំង ក្នុងទិវារត់ពាក់កណ្ដាលម៉ារ៉ាតុងអន្តរជាតិអង្គរ តែងតែមានការកើនឡើងជាបន្តបន្ទាប់ ដែលជាហេតុនាំឲ្យកម្ពុជាទទួលបានចំណូលបន្ថែមមួយកម្រិតទៀត ពីភ្ញៀវទេសចរ ដែលមកចូលរួមរត់កម្សាន្ត ក្នុងព្រឹត្តិការណ៍អន្តរជាតិមួយនេះ។
ជាមួយនេះដែរ លោក វ៉ាត់ ចំរើន ក៏បានព្រមានដល់ក្រុមមនុស្សមួយចំនួន ដែលឆ្លៀតយកព្រឹត្តិការណ៍ទិវារត់ពាក់កណ្ដាលម៉ារ៉ាតុងអន្តរជាតិអង្គរ ទៅធ្វើជារបរដើម្បីរកផលប្រយោជន៍ផ្ទាល់ខ្លួននោះ គឺសុំឲ្យបញ្ឈប់កុំឲ្យមាន ដែលទង្វើនេះវាបានប៉ះពាល់ធ្ងន់ធ្ងរដល់ផលប្រយោជន៍ជាតិ គុណតម្លៃរបស់ជាតិ និងសង្គម។
លោកបញ្ជាក់ថា កន្លងមកគឺមានក្រុមមនុស្សមួយចំនួនបែបខាងលើនេះ ដោយបានដើរចុះឈ្មោះអ្នកបរទេសនៅក្រៅប្រទេស ដែលចង់ចូលរួមព្រឹត្តិការណ៍រត់ពាក់កណ្ដាលម៉ារ៉ាតុងនេះ ដោយយកតម្លៃចុះឈ្មោះលើសពីចំនួនកំណត់ ដូច្នេះសុំឲ្យបញ្ឈប់បញ្ហានេះកុំឲ្យមានតទៅទៀត។
ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងអន្តរជាតិអង្គរវត្តខេត្តសៀមរាបនេះ គឺមានវិញ្ញាសារត់២១គីឡូម៉ែត្រ ១០គីឡូម៉ែត្រ ៥គីឡូម៉ែត្រ រត់៣គីឡូម៉ែត្រជាលក្ខណៈគ្រួសារផងដែរ។
គួរបញ្ជាក់ថា ព្រឹត្តិការណ៍រៀបចំឡើង ដើម្បីប្រមូលថវិកាជួយដល់ជនរងគ្រោះដោយសារគ្រាប់មីន និងសកម្មភាពមនុស្សធម៌នានាសម្រាប់កុមារា-កុមារី ពិសេសគឺជួយដល់មន្ទីរពេទ្យគន្ធបុប្ផា។
អគ្គលេខាធិការគណៈកម្មាធិការជាតិអូឡាំពិកកម្ពុជាលោក វ៉ាត់ ចំរើន បានបង្ហើបពីមហិច្ឆតាគម្រោងសម្រាប់ឆ្នាំខាងមុខ នោះកម្ពុជានឹងរៀបចំឲ្យមានព្រឹត្តិការណ៍រត់ពាក់កណ្ដាលម៉ារ៉ាតុងនៅតំបន់មួយចំនួនទៀតក្រៅពីព្រឹត្តិការណ៍ដែលមានរួចហើយ ដូចជានៅអន្លង់វែង កន្លែងប្រវត្តិសាស្ត្រចុងក្រោយរបស់ខ្មែរក្រហម តំបន់អេកូទេសចរណ៍នៅខេត្តរតនគិរី មណ្ឌលគិរី ហើយនិងបង្កើតឲ្យមានព្រឹត្តិការណ៍កីឡាផ្សេងទៀត មានការឡើងភ្នំជាដើម។
ប៉ុន្តែយ៉ាងណា ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងអន្តរជាតិខេត្តព្រះសីហនុឆ្នាំក្រោយនេះ នៅពុំទាន់ច្បាស់ថានឹងរៀបចំឬអត់នោះទេ ដោយសារគណៈកម្មការជំនាញកំពុងសិក្សាពិភាក្សា និងស្រាវជ្រាវ ព្រោះថានៅតំបន់ក្រុងព្រះសីហនុបច្ចុប្បន្ន ផ្លូវមួយចំនួនត្រូវទទួលរងការខូច និងបញ្ហាមានជនជាតិចិនច្រើន។
គួរបញ្ជាក់ថា ក្រុមហ៊ុនManulif និង ក្រុមហ៊ុនខ្មែរ ប៊ែវើរីជីស ជាអ្នកឧបត្ថម្ភធំក្នុងកម្មវិធីរត់ប្រណាំងពាក់កណ្ដាលម៉ារ៉ាតុងអន្តរជាតិអង្គរវត្តខេត្តសៀមរាបនេះ៕
Source: Kampuchea Thmey Daily
0 Comments