ភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន បានអញ្ជើញវិលត្រឡប់មកដល់មាតុប្រទេសវិញនៅវេលាម៉ោងប្រមាណ ៦៖១៥ នាទីនាព្រឹកព្រលឹមថ្ងៃទី ២៥ ខែតុលានេះ។
សម្តេចតេជោ ហ៊ុន សែន បានដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញចូលរួមកិច្ចប្រជុំកំពូលអាស៊ី អឺរ៉ុប លើកទី១២ នៅប្រទេសប្រ៊ុចសែល,បំពេញ ទស្សនកិច្ចការងារនៅប្រទេសតួកគី និង ចូលរួមសន្និសីទអង្គការសហប្រជាជាតិស្តីពីពាណិជ្ជកម្មនិងការអភិវឌ្ឍ នៃវេទិកាវិនិយោគពិភពលោកឆ្នាំ២០១៨ » ដែលបានប្រព្រឹត្តទៅពីថ្ងៃទី ២២ ដល់ទី២៤ ខែតុលា ឆ្នាំ២០១៨ ក្រោមមូលបទរួម «ការវិនិយោគលើការអភិវឌ្ឍប្រកបដោយចីរភាព»។
មុនចេញដំណើរពីប្រទេសស្វីសមកកាន់មាតុប្រទេសវិញសម្តេចតេជោហ៊ុនសែនបានបង្ហោះសារនៅលើហ្វេសប៊ុកផ្ទាល់របស់សម្តេចនៅថ្ងៃទី២៤ ខែតុលា នេះថា ៖ «ថ្ងៃនេះខ្ញុំនឹងវិលត្រឡប់ទៅកាន់មាតុភូមិវិញបន្ទាប់ពីបំពេញកិច្ចការដ៏មមាញឹករយៈពេលជាងមួយសប្តាហ៍កន្លងមក។ ក្រៅពីច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ ២០១៩ ដែលខ្ញុំត្រូវដឹកនាំការប្រជុំនៅថ្ងៃសុក្រខ្ញុំច្បាស់ក្នុងចិត្តថាមានឯកសារជាច្រើនកំពុងរង់ចាំការពិនិត្យសម្រេចនិងចុះហត្ថលេខាពីខ្ញុំ។ នោះជាបំណុលដែលខ្ញុំត្រូវសងក្រោយពេលអវត្តមានពីក្នុងប្រទេសជាងមួយសប្តាហ៍ កន្លងមកតែខ្ញុំពេញចិត្តជាមួយការងារនេះព្រោះជាផល ប្រយោជន៍របស់ជាតិ។ ខ្ញុំពិតជាមានការរីករាយដែលបានជួបជាមួយបងប្អូនប្រជាជនខ្មែរនិងនិសិត្សខ្មែរដែលកំពុងរៀនសូត្រនៅអឺរ៉ុបក្នុងនោះក៏មានចៅស្រីខ្ញុំ ម្នាក់ ដែរ។ ជូនពរបងប្អូនជនរួមជាតិទាំងក្នុងនិងក្រៅប្រទេសជួបតែសេចក្តីសុខ»។
គួរបញ្ជាក់ថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាបានដឹកនាំគណៈ ប្រតិភូជាន់ខ្ពស់នៃរាជរដ្ឋាភិបាលកម្ពុជាចេញដំណើរ ពីរាជធានីភ្នំពេញកាលពីកណ្តាលអាធ្រាតយប់ថ្ងៃទី ១៦ ខែ តុលា ដើម្បីចូលរួមកិច្ចប្រជុំកំពូលអាស៊ី-អឺរ៉ុប (ASEM) លើកទី១២ ដែលនឹងប្រព្រឹត្តទៅពីថ្ងៃទី១៨-១៩ ខែតុលា ឆ្នាំ២០១៨។ បន្ទាប់មកសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានចាប់ផ្តើមដំណើរបំពេញទស្សនកិច្ចការងារទៅកាន់ទីក្រុងអ៊ីស្តានប៊ុលសាធារណរដ្ឋតួកគីពីថ្ងៃទី ២០ ដល់ ២២ ខែតុលា។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៅថ្ងៃទី២២ខែតុលាបានបន្តដឹកនាំគណៈប្រតិ ភូជាន់ខ្ពស់អញ្ជើញទៅកាន់ក្រុងហ្សឺណែវ ប្រទេសស្វីសដើម្បីចូលរួម« សន្និសីទអង្គការ សហប្រជាជាតិស្តីពីពាណិជ្ជកម្មនិងការអភិវឌ្ឍ នៃវេទិកាវិនិយោគពិភពលោក ឆ្នាំ២០១៨ » ដែលនឹងប្រព្រឹត្តទៅពីថ្ងៃទី ២២ ដល់ទី២៤ ខែតុលា ឆ្នាំ២០១៨ ក្រោមមូលបទរួម «ការវិនិយោគលើការអភិវឌ្ឍប្រកបដោយចីរភាព»។
សរុបរយៈពេលនៃបេសកកម្មក្រៅប្រទេសរបស់សម្តេចតេជោនាយករដ្ឋមន្ត្រីលើកនេះគិតចាប់ពីថ្ងៃទី ១៦ ដល់ ២៥ ខែតុលាគឺមានរយៈពេល ១០ ថ្ងៃ៕
Source: Kampuchea Thmey Daily
0 Comments