របួស​ដៃ​របស់​អ្នកចាំទី ស៊ូ យ៉ា​ទី អាច​គំរាមកំហែង​ដល់​កៅអី​ជម្រើសជាតិ

អ្នកចាំទី​ដៃ​ស្អិត ស៊ូ យ៉ា​ទី សមាជិក​ក្នុង​ក្រុម​ជម្រើសជាតិ​កម្ពុជា ដែល​ទើប​ជួយ​ក្រុម​ណាហ្គា​វើល ឈ្នះ​ជើងឯក​ពានរង្វាន់​លី​គ​កំពូល​កម្ពុជា (Metfone Cambodian League 2018) ប្រចាំ​រដូវ​កាល​ឆ្នាំ២០១៨ កំពុង​តែ​មាន​បញ្ហា​របួស​ប្រេះ​ឆ្អឹង​ដៃ​ខាងឆ្វេង ហើយ​របួស​នេះ​អាច​គំរាមកំហែង​ដល់​កៅអី​ក្នុង​ក្រុម​ជម្រើសជាតិ​ដែល​កំពុងតែ​ត្រៀម​ប្រកួត​មិត្តភាព​អន្តរជាតិ​និង​ពានរង្វាន់ AFF Suzuki Cup 2018 ចុងឆ្នាំ​នេះ​។



​កីឡាករ​រូប​នេះ​បាន​លើក​ឡើង​ថា «​ដៃ​ខ្ញុំ​ប្រេះ​ឆ្អឹង ហើយ​ពេទ្យ​គេ​ថា​អាច​សម្រាក ១​ខែ ទៅ ១​ខែ​កន្លះ ទើប​អាច​ចូល​ហ្វឹកហាត់​បាន ។ របួស​នេះ អាច​ប៉ះពាល់​ដល់​ទម្រង់​លេង​របស់ខ្ញុំ ព្រោះ​ខ្ញុំ​ត្រូវ​សម្រាក​យូរ ហើយ​ការ​ប្រមូលផ្ដុំ​ជម្រើសជាតិ​ក្នុងពេល​ឆាប់ៗ​។ ខ្ញុំ​មានការ​សោកស្ដាយ ព្រោះ​ខ្ញុំ​មាន​បញ្ហា​របួស​អញ្ចឹង​។ ខ្ញុំ​ក៏​មិន​ចង់​ដែរ ចឹ​ង​ខ្ញុំ​មិនអាច​ចូលរួម​បានទេ​»​។ កីឡាករ ស៊ូ យ៉ា​ទី ទើបតែ​ជា​ពីរ​បួស​រហែក​សាច់ដុំ​ក្រោយ​ធ្វើដំណើរ​ទៅដល់​ណាហ្គា​វើ​ល កាលពី​ខែកក្កដា កន្លងទៅ​។

និយាយ​ពី ស៊ូ យ៉ា​ទី រូបគេ​បាន​ចាប់​អាជីព​ជា​អ្នកចាំទី​ដំបូង​ជាមួយ​ក្រុម​បៀ​ល​ប្រាយ នៅ​ឆ្នាំ២០១៦​ដល់​២០០៧ ខណៈ​នៅ​ឆ្នាំ​២០០៩ ដល់​២០១៣ រូបគេ​ចូលរួម​ជាមួយ​ក្រុម​ក្រសួង​ការពារជាតិ និង​ពី​ឆ្នាំ​២០១៣ ដល់​២០១៥ គេ​ផ្លាស់​ទៅ​ក្រុម​ភ្នំពេញ​ក្រោ​ន និង​ពី​ឆ្នាំ​២០១៥ ដល់​បច្ចុប្បន្ន ចូលរួម​ជាមួយ​បឹងកេត​។ ចាប់ពី​ឆ្នាំ​២០១២ ដល់​បច្ចុប្បន្ន​រូបគេ​ជាប់​ឈ្មោះ​ក្នុង​ក្រុម​ជម្រើសជាតិ​កម្ពុជា ពី​ឈុត U22 ដល់​ឈុត​ធំ​ផងដែរ​។



មុន​មានការ​វិវត្តន៍​អាជីព​របស់ខ្លួន​ពី​ក្លិប​មួយ​ទៅ​ក្លិប​មួយ ស៊ូ យ៉ា​ទី ធ្លាប់​ឈ្នះ​ពានរង្វាន់​សម្តេច​តេ​ជោ ហ៊ុន សែន ឆ្នាំ​២០១០ ជាមួយ​ក្រសួងការពារជាតិ ហើយ​នៅ​ឆ្នាំ​២០១៤ ឈ្នះ​ជើងឯក​ពានរង្វាន់​លី​គ​កំពូល​កម្ពុជា ជាមួយ​ភ្នំពេញ​ក្រោ​ន ខណៈ​នៅ​ឆ្នាំ​២០១៦​និង​២០១៧ ឈ្នះ​ជើងឯក​លី​គ​កំពូល​កម្ពុជា ជាមួយ​បឹងកេត​ម្តង​។ នៅ​ឆ្នាំ​២០១៥ គេ​ធ្លាប់​ឈ្នះ​ជើងឯក​រង​ពានរង្វាន់ 2015 Mekong Club Championship ជាមួយ​បឹងកេត ក្រោយ​ចាញ់​ក្រុម​ថៃ Buriram United ១​ទល់​០​។ ចំណែក​ពានរង្វាន់​ឯកត្តជន​វិញ​គេ​ធ្លាប់​ឈ្នះ​ពានរង្វាន់​ស្រោមដៃ​មាន​លី​គ​កំពូល​កម្ពុជា​ឆ្នាំ​២០១៤ និង​២០១៧ ផងដែរ ខណៈ​ក្នុង​ពាន 2015 Mekong Club Championship ឈ្នះ​ស្រោមដៃ​មាស​ដូចគ្នា​៕

Source: Kampuchea Thmey Daily