ភ្នំពេញ ៖ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានក្រើនរំលឹកដល់មន្ត្រីសុខាភិបាលដែលពាក់ព័ន្ធត្រូវយកចិត្តទុកដាក់ក្នុងការគ្រប់គ្រងឱសថឲ្យបានត្រឹមត្រូវដើម្បីផ្តល់សេវាដល់ប្រជាពលរដ្ឋប្រកបដោយប្រសិទ្ធភាពខ្ពស់។ នេះបើយោងតាមគេហទំព័ររបស់ក្រសួងសុខាភិបាល។
លោករដ្ឋមន្ត្រីបានមានប្រសាសន៍បែបនេះនៅក្នុងឱកាសដែលអញ្ជើញចូលរួមក្នុងពិធីបិទសិក្ខាសាលាស្តីពីការផ្សព្វផ្សាយបញ្ជីឱសថសារវន្ត និង ការលើកកម្ពស់ការប្រើប្រាស់អង់ទីប៊ីយូទិកសមស្របកាលពីពេលថ្មីៗនេះនៅខេត្តកំពង់ឆ្នាំង។
លោករដ្ឋមន្ត្រីក្រសួងសុខាភិបាល បានមានប្រសាសន៍ទៀតថា « ឱសថសារវន្តជួយសង្គ្រោះជីវិតប្រសិនបើវាត្រូវបានប្រើប្រាស់និងគ្រប់គ្រងបានត្រឹមត្រូវដោយមិនខ្ជះខ្ជាយនិងទុកដាក់មិនឲ្យខូចគុណភាព។ គ្រូពេទ្យពូកែតែឱសថអន់គុណភាពឬមិនល្អដោយសារប្រការណាមួយនោះ វានឹងជះឥទ្ធិពលដល់ប្រសិទ្ធភាពនៃការព្យាបាល ដែលផ្តល់ជាកត្តាអវិជ្ជមានជាច្រើនដល់សេវាសុខាភិបាលសាធារណ និង ធ្វើឲ្យប្រជាជនឬអតិថិជនបាត់បង់នូវជំនឿលើសេវារដ្ឋរបស់យើង»។
លោកសាស្ត្រាចារ្យ ម៉ម ប៊ុនហេង បានមានប្រសាសន៍ឲ្យដឹងទៀតថា ការប្រើប្រាស់ឱសថមិនត្រឹមត្រូវ គឺជាបញ្ហាដ៏ធំនៅទូទាំងពិភពលោក។ អង្គការសុខភាពពិភពលោកបានប៉ាន់ស្មានថា ឱសថមួយចំនួន (ប្រហែលជាពាក់កណ្តាល) ត្រូវបានចេញវេជ្ជបញ្ជាបើកផ្តល់ ឬ លក់ដោយមិនត្រឹមត្រូវ ហើយប្រហែលជាពាក់កណ្តាលទៀត ត្រូវអ្នកជំងឺប្រើប្រាស់មិនត្រឹមត្រូវ។ ការប្រើប្រាស់លើសកម្រិត ខ្វះកម្រិតឬការប្រើប្រាស់មិនត្រឹមត្រូវ ធ្វើអោយខាតបង់ធនធាននិងធ្វើឲ្យកាន់តែមានគ្រោះថ្នាក់ដល់សុខភាព។
លោករដ្ឋមន្ត្រីបានណែនាំដល់ប្រធានមន្ទីរសុខាភិបាល ប្រធានមន្ទីរពេទ្យ និង មណ្ឌលសុខភាព ត្រូវពង្រឹងការងារគ្រប់គ្រងឱសថនិងការប្រើប្រាស់ឱសថសមស្របនៅក្នុងមន្ទីរពេទ្យ និង មណ្ឌលសុខភាព ដែលតម្រូវឲ្យមានការចុះអភិបាលនិងតាមដានលើការងារនេះពីគ្រប់កម្រិតនិងរៀបចំទុកដាក់ឱសថ បរិក្ខារពេទ្យទៅតាមគោលការណ៍ណែនាំ ជាវិធីមួយក្នុងការធានាគុណភាពរបស់ឱសថ និង បរិក្ខារពេទ្យ។
ជាមួយគ្នានេះដែរ លោករដ្ឋមន្ត្រីបានឲ្យដឹងទៀតថា ក្រសួងសុខាភិបាលនឹងធ្វើច្បាប់ថ្មីមួយទៀត ដើម្បីគ្រប់គ្រងកន្លែងសេវាឯកជនហើយឱសថដែលអនុញ្ញាតឲ្យដាក់លក់ ត្រូវបានចុះបញ្ជីការត្រឹមត្រូវហើយនៅក្នុងពេលខាងមុខក្រសួងនឹងរៀបចំការចុះបញ្ជីការឱសថតាមប្រព័ន្ធអនឡាញដើម្បីឲ្យមានភាពងាយស្រួលដល់ពាណិជ្ជករ និង មានភាពត្រឹមត្រូវផងដែរ៕
Source: Kampuchea Thmey Daily
0 Comments