ភ្នំពេញ ៖ ក្រសួងការងារនិងបណ្ដុះបណ្ដាលវិជ្ជាជីវៈបានក្រើនរំលឹកដល់ថៅកែរោងចក្រសហគ្រាសនានា អនុញ្ញាតឲ្យកម្មករបានឈប់សម្រាកចំនួន៣ថ្ងៃដើម្បីបានទៅជួបជុំក្រុមគ្រួសារសាច់ញាតិនៅស្រុកកំណើតនៅក្នុងឱកាសពិធីបុណ្យភ្ជុំបិណ្ឌប្រពៃណីជាតិខាងមុខនេះ។
លោកបណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈបានក្រើនរំលឹកនិងណែនាំដល់ថៅកែរោងចក្រឬម្ចាស់ស ហគ្រាសគ្រឹះស្ថានការងារទាំងអស់ត្រូវអនុញ្ញាតឲ្យកម្មករបានឈប់សម្រាកទៅចូលរួមពិធីបុណ្យភ្ជុំបិណ្ឌខាងមុខនេះដោយរក្សាទុកប្រាក់ឈ្នួលនិងប្រាក់រង្វាន់ធ្វើការទៀងទាត់ដូចថ្ងៃធម្មតា។
ជាមួយគ្នានេះដែរ លោកបណ្ឌិត អ៊ិត សំហេងក៏បានជំរុញឲ្យថៅកែរោងចក្រសហគ្រាសត្រូវខិតខំរៀបចំបើកប្រាក់ឈ្នួលជួនដល់កម្មករនិយោជិតឲ្យបានមុនថ្ងៃបុណ្យភ្ជុំបិណ្ឌដើម្បីបង្កលក្ខណៈងាយស្រួលដល់កម្មករនិយោជិតក្នុងការធ្វើដំណើរទៅលេងស្រុកកំណើតនិងទុកប្រើប្រាស់សម្រាប់ចំណាយផ្សេងៗផងដែរ។
ផ្ទុយទៅវិញ លោកបណ្ឌិតរដ្ឋមន្ត្រីបានបន្តទៀតថា បើសិនពុំមានលទ្ធភាពបើកប្រាក់ឈ្នួលឲ្យបាន១០០ភាគរយទេ ត្រូវអនុញ្ញាតឲ្យកម្មករនិយោជិតទទួលបានប្រាក់បុរេប្រទានយ៉ាងតិច៥០ភាគរយមុនថ្ងៃបុណ្យភ្ជុំបិណ្ឌ។
ស្របពេលជាមួយគ្នានេះ លោករដ្ឋមន្ត្រីសង្ឃឹមយ៉ាងមុតមាំថាថៅកែរោងចក្រសហគ្រាសគ្រឹះស្ថានការងារទាំងអស់នឹងអនុវត្តឲ្យកម្មករនិយោជិតបានឈប់សម្រាកទៅតាមច្បាប់ដែលបានកំណត់។
លោក ស៊ឹម សាវឿន កម្មករធ្វើការនៅរោងចក្រស៊ីនឡានរាជធានីភ្នំពេញបានមានប្រសាសន៍ថា សម្រាប់ពិធីភ្ជុំបិណ្ឌខាងមុខនេះកម្មករនៅរោងចក្ររបស់លោកបានសំណូមពរឈប់សម្រាកចំនួន១០ថ្ងៃគឺចាប់ពីថ្ងៃទី៦រហូតដល់ថ្ងៃទី១៦ខែតុលាឆ្នាំ២០១៨ដោយសុខចិត្តឲ្យរោងចក្រកាត់លុយទៅតាមច្បាប់ការងារ ព្រោះកម្មករត្រូវការទៅលេងស្រុកកំណើតបានជួបជុំក្រុមគ្រួសារ សាច់ញាតិនិងមិត្តភ័ក្តបានយូរ។
លោក កាំង មូនីកា អគ្គលេខាធិការរងនៃសមាគមអ្នករោងចក្រកាត់ដេរនៅកម្ពុជាដែលហៅកាត់ថាG MACបានថ្លែងប្រាប់ទូរទស្សន៍រស្មីហង្សមាសឲ្យដឹងថា សមាគមរោងចក្របានធ្វើការផ្សព្វផ្សាយសេចក្តីជួនដំណឹងរបស់ក្រសួងការងារនិងបណ្តុះបណ្តាលវិជ្ជាជីវៈដល់រោងចក្រសហគ្រាសរួចរាល់ហើយដោយមិនមានការកាត់ប្រាក់ឈ្នួលឬប្រាក់បំណាច់អ្វីទាំងអស់។ប៉ុន្តែលទ្ធភាពបើកប្រាក់ខែមុនបានប៉ុន្មាន គឺជាការអនុវត្តផ្ទាល់របស់រោងចក្រនីមួយៗ។
គួរបញ្ជាក់ពិធីបុណ្យភ្ជុំបិណ្ឌនៅឆ្នាំនេះនឹងប្រព្រឹត្តិទៅរយៈពេល៣ថ្ងៃគឺចាប់ពីថ្ងៃទី៨ ទី៩និងទី១០ ខែតុលា ឆ្នាំ២០១៨សប្តាហ៍ក្រោយនេះ៕
Source: Kampuchea Thmey Daily
0 Comments