តារាហូលីវូដលោក Robert De Niro និងអតីតអនុប្រធានាធិបតីអាមេរិកលោក Joe Biden គឺជាគោលដៅចុងក្រោយបំផុតរបស់ឧបករណ៍ចំនួន១០ និងគ្រាប់បែកបំពង់ដែលផ្ញើទៅឲ្យគូប្រជែងរបស់លោក Donald Trump។
មន្ត្រីរាប់រយនាក់មកពី FBI, សេវាសម្ងាត់អាមេរិកនិងភ្នាក់ងារផ្សេងទៀតកំពុងស្វែងរកទាំងថ្ងៃទាំងយប់សម្រាប់អ្នកនៅពីក្រោយកញ្ចប់សង្ស័យចំនួន១០ដែលអ្នកនយោបាយនៅគ្រប់ទិសទីបានចាត់ទុកថាជា “អំពើភេរវកម្ម”។
ចាប់តាំងពីថ្ងៃចន្ទមក គ្រាប់បែកធ្វើដោយដៃនិងឧបករណ៍សង្ស័យថាជាគ្រឿងផ្ទុះផ្សេងទៀតត្រូវបានផ្ញើទៅឲ្យលោក Barack Obama, លោកស្រី Hillary Clinton, ទូរទស្សន៍ CNN, មហាសេដ្ឋី George Soros និងបុគ្គលដទៃទៀតដែលអ្នកគាំទ្រលោកប្រធានាធិបតី Donald Trump ស្អប់។
កញ្ចប់ទាំងនេះត្រូវបានស្ទាក់ចាប់នៅ New York, Maryland, Florida, Delaware និង Los Angeles។
លោក William Sweeney ជំនួយការនាយក FBI បាននិយាយថា “វានៅតែអាចទៅរួចដែលថា កញ្ចប់បន្ថែមទៀតអាចត្រូវបានបញ្ជូនឬផ្ញើទៅ”។ លោកអះអាងថា កញ្ចប់មួយចំនួនត្រូវបានបញ្ជូនតាមរយៈប្រព័ន្ធប្រៃសណីយ៍របស់អាមេរិក។
រហូតមកដល់ពេលនេះ ពុំមាននរណាម្នាក់រងរបួសទេប៉ុន្តែការប៉ុនប៉ងបំផ្ទុះគ្រាប់បែកនេះបានបង្កឲ្យមានភាពភ័យខ្លាចនិងបង្កើនភាពតានតឹង។
កាលពីល្ងាចថ្ងៃព្រហស្បតិ៍ ប៉ូលិសក្រុងញូវយ៉កបានបញ្ជូនក្រុមដោះគ្រាប់បែកទៅស៊ើបអង្កេតកញ្ចប់ចំនួនពីរនៅមជ្ឈមណ្ឌល Time Warner ដែលនៅទីនោះ ការិយាល័យរបស់ទូរទស្សន៍ CNN ប្រចាំទីក្រុងញូវយ៉កត្រូវបានជម្លៀសចេញមុនពេលគ្រាប់បែកបំពង់ត្រូវបានគេរកឃើញនៅក្នុងបន្ទប់សំបុត្រ។
ក្រោយមកប៉ូលិសបានចេញផ្សាយព័ត៌មានច្បាស់លាស់ហើយនិយាយថា អគារនេះត្រូវបានបើកឡើងវិញ៕ AFP
Source: Kampuchea Thmey Daily
0 Comments