ភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យរាជរដ្ឋាភិបាលកម្ពុជា បានចេញសេចក្តីប្រកាសព័ត៌មានផ្លូវការមួយ សម្តែងនូវការអបអរសាទរ និងឯកភាពទាំងស្រុងចំពោះស្មារតី នៃលិខិតរបស់សភាពាណិជ្ជកម្មអឺរ៉ុបប្រចាំនៅកម្ពុជា ផ្ញើទៅកាន់លោកស្រី Celilia Malmstrom ស្នងការទទួលបន្ទុកពាណិជ្ជកម្មគណៈកម្មការអឺរ៉ុប ដោយសម្តែងការព្រួយបារម្ភយ៉ាងខ្លាំងអំពីផលប៉ះពាល់ ដែលបណ្តាលមកពីដំណើរការដកប្រព័ន្ធអនុគ្រោះពន្ធ EBAs ចេញពីប្រទេសកម្ពុជា។
សេចក្តីប្រកាសព័ត៌មានរបស់អ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន ចុះថ្ងៃទី១៧ ខែតុលា ឆ្នាំ២០១៨ បានលើកឡើងថា អ្នកនាំពាក្យរាជរដ្ឋាភិបាលកម្ពុជា ឯកភាពទាំងស្រុងចំពោះស្មារតីនៃលិខិតរបស់សភាពាណិជ្ជកម្មអឺរ៉ុបប្រចាំកម្ពុជា ដែលបានផ្ញើទៅកាន់លោកស្រី Celilia Malmstrom ស្នងការទទួលបន្ទុកពាណិជ្ជកម្មនៃគណៈកម្មការអឺរ៉ុប ដោយបានសម្ដែងនូវក្តីកង្វល់អំពីដំណើរការពាក់ព័ន្ធ នឹងការព្យួរកម្មវិធីអនុគ្រោះពន្ធសព្វសារពើលើកលែងតែគ្រឿងសព្វាវុធ (EBAs)។ ដែលនេះជាសក្ខីភាពបញ្ជាក់ជាសកលយ៉ាងច្បាស់ថា ការដកហូតកម្មវិធីអនុគ្រោះពន្ធសព្វសារពើលើកលែងតែគ្រឿងសព្វាវុធ (EBAs) ជាការបង្កឲ្យមានផលវិបាក ដែលប៉ះពាល់ដល់ប្រយោជន៍ផ្នែកពាណិជ្ជកម្មយូរអង្វែងរបស់សហភាពអឺរ៉ុបនៅកម្ពុជា។
តាមលោក ផៃ ស៊ីផាន សភាពាណិជ្ជកម្មអឺរ៉ុបប្រចាំនៅកម្ពុជា ក្នុងនាមជាតំណាងរបស់ផ្នែកឯកជន និងជាផ្នែកមួយនៃសង្គមស៊ីវិលនៅក្នុងប្រទេសកម្ពុជា បានឲ្យតម្លៃក្នុងកិច្ចប្រតិបត្តិការយ៉ាងខ្ពស់ និងជឿជាក់យ៉ាងខ្លាំងចំពោះស្មារតីនៃកិច្ចសហប្រតិបត្តិការ ដែលអាចធ្វើឲ្យការអភិវឌ្ឍរបស់ប្រទេសកម្ពុជា កាន់តែទទួលបានភាពប្រសើរឡើងខ្លាំងថែមទៀត។ ជាមួយនឹងកិច្ចសន្ទនាយ៉ាងខ្ជាប់ខ្ជួន ប្រកបដោយជោគជ័យ និងបែបស្ថាបនារវាងផ្នែកឯកជន និងរាជរដ្ឋាភិបាលកម្ពុជា ក្នុងកិច្ចខិតខំ ដែលភ្ជាប់ទៅលើការធ្វើឱ្យកំណើនសេដ្ឋកិច្ចឋិតថេរយូរអង្វែង និងការចូលរួមពីគ្រប់ភាគីពាក់ព័ន្ធ តាមបែបស្ថាបនា ដែលអាចនាំប្រទេសកម្ពុជា ឆ្ពោះទៅរកប្រជាធិបតេយ្យភាវូបនីយកម្ម។
អ្នកនាំពាក្យបញ្ជាក់ទៀតថា ការព្យួរភាពអនុគ្រោះពន្ធ (EBAs) គឺជាការប្រថុយប្រថានមួយ នាំមកនូវផលប៉ះពាល់អវិជ្ជមានយូរអង្វែង គឺពិតជានឹងគំរាមដោយផ្ទាល់ ដល់សមត្ថភាពប្រកួតប្រជែងផ្នែកធុរកិច្ច របស់អឺរ៉ុបនៅក្នុងប្រទេសកម្ពុជា និងប៉ះពាល់ដល់ជំហររបស់ សហភាពអឺរ៉ុបនៅក្នុងការលើកកម្ពស់របៀបវារៈ ពាណិជ្ជកម្ម និងឧត្តមានុវត្តភាពរបស់ខ្លួន ដែលវាធ្វើឲ្យមានប្រៀបប្រកួតប្រជែង នៃធុរកិច្ចអឺរ៉ុបធ្លាក់ចុះ។ ការព្យួរ ឬការដាក់ទណ្ឌកម្មលើកម្ពុជា នៅក្នុងយថាហេតុណាមួយ គឺមិនមែនជាឧត្តមគតិ ដូចកិច្ចសហប្រតិបត្តិការនោះទេ។
លិខិតរបស់អ្នកនាំពាក្យរាជរដ្ឋាភិបាលកម្ពុជា បានធ្វើឡើងបន្ទាប់ពីសភាពាណិជ្ជកម្មអន្តរជាតិសំខាន់ៗចំនួន៥ស្ថាប័ននៅទ្វីបអឺរ៉ុបប្រចាំនៅកម្ពុជា ដែលក្នុងនោះមាន សភាពាណិជ្ជកម្មអឺរ៉ុបប្រចាំនៅកម្ពុជា, សភាពាណិជ្ជកម្ម និងឧស្សាហកម្មបារាំង ប្រចាំនៅកម្ពុជា (CCIFC), ក្រុមធុរកិច្ចអាល្លឺម៉ងប្រចាំនៅកម្ពុជា (ADW), សភាពាណិជ្ជកម្មអឺរ៉ុបខាងជើងប្រចាំនៅកម្ពុជា (NordCham), សមាគមធុរកិច្ចអ៊ីតាលីប្រចាំនៅកម្ពុជា ដែលជាតំណាងឱ្យប្រទេសធំៗចំនួន៩ប្រទេសនៅអឺរ៉ុប បានសរសេរលិខិតពិសេសមួយច្បាប់ នៅថ្ងៃទី១៥ ខែតុលា ផ្ញើជូនលោកស្រី Cecilia Malmstrom ស្នងការទទួលបន្ទុកពាណិជ្ជកម្ម គណៈកម្មការអឺរ៉ុប ប្រឆាំងចំពោះបំណងចង់ដកប្រព័ន្ធអនុគ្រោះពន្ធ (EBAs) ចេញពីប្រទេសកម្ពុជា។
លិខិតរួមរបស់ស្ថាប័នធុរកិច្ចអន្តរជាតិ តំណាងក្រុមហ៊ុនចំនួន៣៣៥ ដែលមាននិយោជិតជាង៥ម៉ឺននាក់ បានសម្តែងនូវក្តីកង្វល់យ៉ាងធ្ងន់ធ្ងរអំពីដំណើរការឆ្ពោះទៅរកការដកហូត ភាពអនុគ្រោះពន្ធផ្នែកពាណិជ្ជកម្មនៅក្រោមរបប “អ្វីៗទាំងអស់លើកលែងតែគ្រឿងសព្វាវុធ” (EBAs) ចេញពីប្រទេសកម្ពុជា និងបារម្ភពីផលវិបាកដែលការដកហូតនេះ អាចបង្កឲ្យមានផលប៉ះពាល់ដល់ប្រយោជន៍ផ្នែកពាណិជ្ជកម្មយូរអង្វែងរបស់សហភាពអឺរ៉ុបនៅក្នុងប្រទេសកម្ពុជា។ លិខិតរួមបញ្ជាក់ថា យើងទទួលស្គាល់ថា ពេលនេះមិនទាន់មានការសម្រេចណាមួយត្រូវបានធ្វើឡើងដើម្បីព្យួរ ឬដកហូតឋានៈអនុគ្រោះ EBA ពីប្រទេសកម្ពុជានៅឡើយទេ ហើយយើងនៅតែសង្ឃឹមថា នឹងមានការចរចាបន្តទៅទៀត ដើម្បីស្វែងរកឲ្យឃើញនូវវិធីកាន់តែប្រសើរសម្រាប់ឆ្លើយតបទៅនឹងក្តីកង្វល់នានា របស់សហភាពអឺរ៉ុប។
សភាពាណិជ្ជកម្មអន្តរជាតិសំខាន់ៗទាំង៥ស្ថាប័នបានបន្តទៀតថា យើងខ្ញុំយល់ឃើញថា ការចាប់ផ្ដើមដំណើរការព្យួរភាពអនុគ្រោះ EBA ឬក៏ការដាក់ទណ្ឌកម្មជាឯកតោភាគីមួយ រយៈពេលខ្លីណាមួយ អាចនាំមកនូវផលប៉ះពាល់អវិជ្ជមានយូរអង្វែង ដែលវាមិនមែនជាឧបករណ៍មួយមានប្រសិទ្ធភាពសម្រាប់កែលម្អដំណើរការប្រជាធិបតេយ្យឲ្យប្រសើរឡើង ដូចកិច្ចសហប្រតិបត្តិការទេ។
នៅក្នុងករណីប្រទេសកម្ពុជា ការព្យួរភាពអនុគ្រោះ EBA នឹងដើរផ្ទុយពីរបៀបវារៈពាណិជ្ជកម្មរបស់សហភាពអឺរ៉ុប និងការប្ដេជ្ញាចិត្តរបស់ខ្លួន ចំពោះការបញ្ចូល ប្រទេសកំពុងអភិវឌ្ឍន៍ទៅក្នុងសេដ្ឋកិច្ចពាណិជ្ជកម្មពិភពលោក និងផ្ទុយពីគោលការណ៍អឺរ៉ុបក្នុងការប្រើប្រាស់ពាណិជ្ជកម្មជាវ៉ិចទ័រសំខាន់ សម្រាប់សាយភាព គុណតម្លៃប្រជាធិបតេយ្យ។ នេះជាទស្សនៈមួយដែលអ្នកតំណាងអន្ដរជាតិជាច្រើននាក់ ដែលធ្លាប់មានបទពិសោធន៍ផ្ទាល់ច្រើនឆ្នាំ ជាមួយប្រទេសកម្ពុជាយល់ឃើញដូចគ្នា៕
Source: Kampuchea Thmey Daily
0 Comments