ឃុន ឌី​ម៉ា ស្វាគមន៍​ការ​សុំ​សងសឹក​របស់​Fa Nemith

អ្នក​ប្រដាល់​កម្ពុជា​ឃុន ឌី​ម៉ា​(​ឃីម​ឌី​ម៉ា​) ក្លិប​កងរាជអាវុធហត្ថ​រាជធានី​ភ្នំពេញ បាន​ស្វាគមន៍​ចំពោះ​ការ​សុំ​ជួប​ប្រកួត​សងសឹក​របស់​អ្នក​ប្រដាល់​ថៃ​Fa Nemith នា​ព្រឹក ថ្ងៃអាទិត្យ​ទី​០៧ ខែ​តុលា ឆ្នាំ​២០១៨​នេះ នៅក្នុង​កម្មវិធី​ប្រដាល់​Boostrong Fighter On Fire លើ​សង្វៀន​SEATV។

Fa Nemith​និង ឃីម ឌី​ម៉ា នឹង​ប្រកួត​គ្នា​ក្នុង​ប្រភេទ​ទម្ងន់​៦៣,៥០០​គីឡូក្រាម ។ Fa Nemith ធ្លាប់​មក​ប្រកួត​នៅ​ស្រុក​ខ្មែរ​ច្រើនលើក​ហើយ​កន្លងមក ។​ក្នុងការ​មក​ប្រកួត​នៅ​សង្វៀន​SEATV​នេះ​ចំនួន​៦​លើក គេ​វាយ​ឈ្នះ​តែ​ពីរលើក​ទេ​គឺ​ឈ្នះ​មាស ច័ន្ទ​មាន ថុល មករា និង​ទេស ជីវ៉ា ហើយ​៤​លើក​ដែល​ចាញ់​នោះ​គឺ​ចាញ់​ឃុន ឌី​ម៉ា​ដោយ​ពិន្ទុ ចាញ់​វេ​ង​សុ​ភ័​ក្រ​ដោយ​ពិន្ទុ ចាញ់​ឡុង សំណាង ទឹក​៥ ចាញ់​សេង ស្រឿ​ន​ដោយ​ពិន្ទុ។

អ្នក​ប្រដាល់​ថៃ​នេះ មានកំនត់​ត្រា​ប្រកួត​ចំនួន​៧០​លើក ឈ្នះ​៥៥​លើក ចាញ់​១៤​លើក ស្មើ​០១​លើក និង​ធ្លាប់​ផ្តួល​ដៃគូ​ឲ្យ​សន្លប់​បានជា​ច្រើន​នាក់ ។​អ្នក​ប្រដាល់​ថៃ​ម្នាក់នេះ មាន​កាយសម្បទា​រឹងមាំ មាន​កម្ពស់​ប្រហាក់ប្រហែល​ឌី​ម៉ា គឺ​១,៧០​ម៉ែត្រ​។ តែ​យ៉ាងណា មិនដឹងថា​អាច​យកឈ្នះ​ឃុន ឌី​ម៉ា បាន​ឬ​អត់​នោះទេ​?។

ឃុន ឌី​ម៉ា ជា​អ្នក​ប្រដាល់​ជើង​ខ្លាំង​របស់​កម្ពុជា ជា​ម្ចាស់​មេដាយមាស​ស៊ី​ហ្គេម​ឆ្នាំ​២០១៧ ដែល​ធ្លាប់​ប្រកួត​ជាមួយ​អ្នក​ប្រដាល់​ថៃ មិនតិចជាង​៣០​នាក់​ទេ​នាពេល​កន្លងមក ដោយ​វាយ​ឈ្នះ​ថៃ​២១​នាក់ ស្មើ​០៥​នាក់ និង​ចាញ់ ០៩​នាក់ ។ និយាយ​ជារួម ក្នុងការ​ប្រកួត​ចំនួន​៩៩​លើក​របស់​ឌី​ម៉ា គេ​វាយ​ឈ្នះ​៨៥​លើក ចាញ់​១២​លើក និង​ស្មើ​០២​លើក ។ ការប្រកួត​ចុងក្រោយ​ជាមួយ​ថៃ ឃុន​ឌី​ម៉ា​វាយ​ឈ្នះ Fa Nemith​ដោយ​ពិន្ទុ កាលពី​ថ្ងៃទី​៣១​មីនា​២០១៨​កន្លងទៅនេះ។

យ៉ាងណា សំរាប់​ការជួប​អ្នក​ប្រដាល់​ថៃ​Fa Nemith លើក​នេះ គេ​មាន​ជំនឿ​ទុកចិត្ត លើ​ឃុន ឌី​ម៉ា​ថា អាច​យកឈ្នះ​Fa Nemith បាន​ទៀត​មិន​ខាន ព្រោះថា​អ្នក​ប្រដាល់​ថៃ​រូបនេះ ធ្លាប់​ចាញ់​គេ​ម្តង​រួចទៅហើយ ។​Fa Nemith គេ​មក​ប្រកួត​ចុងក្រោយ​នេះ​(១៩​សីហា​២០១៨) វាយ​ឈ្នះ​ទេស ជីវ៉ា ក្លិប​កងពលតូច​លេខ​៧០ ក្នុង​ទឹក​ទី​៣ ។ ចាំមើល តើ​Fa Nemith អាច យកឈ្នះ​ឃុន ឌី​ម៉ា បាន​ឬ​អត់ នៅក្នុង​ការសុំ​សងសឹក​នេះ ?។

ចំពោះ ធឿន ធី អ្នក​ប្រដាល់​ក្លិប​អង្គរ​មានជ័យ​ខេត្តសៀមរាប នឹង​ជួប​ប្រកួត​ជាមួយ​អ្នក​ប្រដាល់​ទេស ជីវ៉ា ក្លិប​កងពលតូច​លេខ​៧០​ក្នុង​ប្រភេទ​ទម្ងន់​៦៣,៥០០​គីឡូក្រាម​។​រវាង ធឿន​ធី និង ទេស ជីវ៉ា នេះ មិន​ធ្លាប់​ជួបគ្នា​ទេ​កន្លងមក ។ នេះ​ជា​លើក​ទី​១​របស់​អ្នក​ប្រដាល់​ទាំងពីរ​ជួប​ប្រកួត​គ្នា ។​
សម្រាប់​កាល​ជួប​លើក​នេះ ពុំ​ដឹងថា​ធឿន ធី អាច​យកឈ្នះ​ទេស ជីវ៉ា បាន​ឬ​អត់​នោះទេ ? ។ អ្នក​ប្រដាល់​ក្លិប​អង្គរ​មានជ័យ​រូបនេះ គេ​មក​ប្រកួត​ចុងក្រោយ​នៅ​ភ្នំពេញ​នេះ វាយ​ចាញ់​មុត ខ្លឹម​ខ្មៅ អ្នក​ប្រដាល់​ក្លិប​កងចក្រ​រាជសីហ៍​មាន​រិ​ទ្ធ​ដោយ​ពិន្ទុ ។ យ៉ាងណា ប៉ះ​ជាមួយ​ទេស ជីវ៉ា ដែលមាន​កណ្តាប់ដៃ​ខ្លាំង រហ័ស​និង​លឿន​នោះ ធឿន ធី មិនជា​ស្រួលខ្លួន ប៉ុន្មាន​ឡើយ​។​ចាំមើល រវាង​ធឿន ធី​និង​អ្នក​ប្រដាល់​ទេស​ជីវ៉ា តើន​រណា​ជា​អ្នកឈ្នះ​នោះ​?​។​

សៀន វិបុល អ្នក​ប្រដាល់​ក្លិប​រាជសីហ៍​ខេត្តរតនគិរី ត្រូវ​ជួប​ប្រកួត​ជាមួយ​អ្នក​ប្រដាល់​ឆេង លាង ក្លិប​កងពលតូច​ទ័ព​ឆ័​ត្រ​យោង​៩១១ ដោយ​ប្រកួត​គ្នា​ក្នុង​ទម្ងន់​៦៧​គ​.​ក្រ​។ អ្នក​ប្រដាល់​ទាំងពីរ​រូបនេះ មិន​ធ្លាប់​ជួបគ្នា​ទេ​កន្លងមក។

ឆេង លាង ជា​អ្នក​ប្រដាល់​ជើង​ថ្មី ។ គេ​មានបទពិសោធន៍​លើស​ង្វៀន​មិនជា​ច្រើន​ប៉ុន្មាន​ទេ តែ​អ្នក​ប្រដាល់​រូបនេះ វាយ​ល្អ​និង​ខ្លាំង តែ​យ៉ាងណា សៀន វិបុល គេ​ក៏​វាយ​ល្អ​និង​ខ្លាំង​ដែរ ។​
​ចំណែក ហេង សុ​ភ័​ក្រ អ្នក​ប្រដាល់​ក្លិប​ព្រៃទទឹង​ខេត្តបាត់ដំបង ត្រូវគេ​ផ្តល់​ឪ​កាស ឲ្យ​ជួប​ប្រកួត​ជាមួយ​អ្នក​ប្រដាល់​សេង សាយ ក្លិប​វិបុល​ដា​រិ​ទ្ធ​ពោធិ​សែន​ជ័យ ។ សម្រាប់​ការជួបគ្នា​រវាង​ហេង សុ​ភ័​ក្រ និង​សេង សាយ នេះ គេ​មិន​រំពឹងថា សេង សាយ​អាច​យកឈ្នះ​ហេង សុ​ភ័​ក្រ បាន​នោះឡើយ ?៕​

Source: Kampuchea Thmey Daily