ការិយាល័យរបស់លោក Mueller បាននិយាយកាលពីថ្ងៃអង្គារថា FBI កំពុងស៊ើបអង្កេតលើផែនការមួយដែលត្រូវបានគេចោទប្រកាន់ថា ផ្តល់ប្រាក់ឲ្យស្ត្រីដើម្បីធ្វើការចោទប្រកាន់អំពីការយារយីផ្លូវភេទចំពោះប្រមុខស៊ើបអង្កេតបញ្ហារុស្ស៊ីលោក Robert Mueller ក្នុងគោលបំណងបង្ខូចកេរ្តិ៍ឈ្មោះគាត់។
ផែនការនេះត្រូវបានរកឃើញបន្ទាប់ពីស្ត្រីម្នាក់ដែលនិយាយថានាងបានធ្វើការឲ្យលោក Mueller អស់រយៈពេលជាច្រើនទសវត្សរ៍មកហើយនោះបានប្រាប់អ្នកសារព័ត៌មានជាច្រើនថា នាងត្រូវបានគេផ្តល់ប្រាក់ឲ្យចំនួន២០,០០០ដុល្លារដើម្បីចោទប្រកាន់គាត់ពីបទល្មើសផ្លូវភេទ។អ្នកនាំពាក្យលោក Mueller គឺលោក Peter Carr បាននិយាយថា “នៅពេលដែលយើងបានដឹងអំពីការចោទប្រកាន់ថាស្ត្រីត្រូវបានគេផ្តល់ប្រាក់ឲ្យដើម្បីធ្វើការចោទប្រកាន់មិនពិតអំពីរដ្ឋអាជ្ញាពិសេសនោះ យើងបានបញ្ជូនរឿងនេះទៅកាន់ FBI ភ្លាមៗដើម្បីធ្វើការស៊ើបអង្កេត”។
ទោះបីជាយ៉ាងណាក៏ដោយ លោក Carr មិនបានផ្តល់ព័ត៌មានលម្អិតបន្ថែមទៀតទេប៉ុន្តែសេចក្តីថ្លែងការណ៍ជាសាធារណៈដ៏កម្ររបស់គាត់បានបញ្ជាក់យ៉ាងច្បាស់ថា ការិយាល័យរបស់លោក Mueller កំពុងពិនិត្យមើលការអះអាងនេះយ៉ាងយកចិត្តទុកដាក់។គេហទំព័រព័ត៌មាន Hill Reporter បាននិយាយថា ផែនការនេះបានបែកធ្លាយកាលពីសប្តាហ៍មុនបន្ទាប់ពីពួកគេនិងកាសែតជាច្រើនទៀតត្រូវបានទាក់ទងដោយស្ត្រីមិនបញ្ចេញឈ្មោះម្នាក់ដែលនិយាយថា នាងត្រូវបានគេផ្តល់សាច់ប្រាក់ដើម្បីធ្វើការចោទប្រកាន់ប្រឆាំងលោក Mueller ។លោក Mueller គឺជាអតីតប្រធានការិយាល័យស៊ើបអង្កេតសហព័ន្ធដែលត្រូវបានគេប្រគល់ភារកិច្ចកាលពីឆ្នាំមុនជាមួយការស៊ើបអង្កេតថា សមាជិកនៃក្រុមយុទ្ធនាការរបស់លោកប្រធានាធិបតី Donald Trump បានឃុបឃិតជាមួយប្រទេសរុស្ស៊ីដើម្បីបង្វែរការបោះឆ្នោតឆ្នាំ២០១៦។
ការស៊ើបអង្កេតរបស់លោក Mueller បានពង្រីកទៅដល់ការពិនិត្យអំពីការប៉ុនប៉ងដែលអាចធ្វើទៅបានដោយលោក Trump ក្នុងការរាំងស្ទះដល់ការស៊ើបអង្កេតហើយប្រសិនបើត្រូវបានបង្ហាញថាជាការពិតមែននោះ វាអាចឈានទៅដល់ការប្តឹងចោទប្រកាន់លោកប្រធានាធិបតី៕ AFP
Source: Kampuchea Thmey Daily
0 Comments