លោកស្រីប្រធានាធិបតី Tsai Ing-wen បាននិយាយថា កោះតៃវ៉ាន់បានអញ្ជើញសម្តេចប៉ាប Francis ឲ្យធ្វើទស្សនកិច្ចនៅក្នុងរយៈពេលប៉ុន្មានសប្តាហ៍ខាងមុខនេះ បន្ទាប់ពីបុរីវ៉ាទីកង់បានឈានដល់កិច្ចព្រមព្រៀងដ៏សំខាន់មួយស្តីពីការតែងតាំងសង្ឃរាជជាមួយប្រទេសចិនដែលអះអាងថា កោះដែលគ្រប់គ្រងដោយខ្លួនឯងមួយនេះគឺជារបស់ខ្លួន។
កិច្ចព្រមព្រៀងកាលពីខែមុនមួយនេះបានផ្តល់ឲ្យរដ្ឋាភិបាលក្រុងរ៉ូមដែលជាសម្ព័ន្ធមិត្តការទូតចុងក្រោយរបស់តៃវ៉ាន់នៅអឺរ៉ុបនូវការនិយាយយូរអង្វែងលើការតែងតាំងបែបនេះបើទោះបីជាភាគីទាំងពីរហៅវាថា “បណ្តោះអាសន្ន” ហើយប្រភពបាននិយាយថា បញ្ហាសំខាន់ៗមួយចំនួននៅតែមិនអាចដោះស្រាយបានក៏ដោយ។
ការិយាល័យរបស់លោកស្រី Tsai បាននិយាយនៅក្នុងសេចក្តីថ្លែងការណ៍មួយថា អនុប្រធានាធិបតីតៃវ៉ាន់ Chen Chien-jen បានជួបសម្តេចប៉ាប Francis កាលពីថ្ងៃអាទិត្យហើយបានអញ្ជើញលោកឲ្យធ្វើទស្សនកិច្ច។ ការិយាល័យនេះបានបន្ថែមថា សម្តេចប៉ាបបានឆ្លើយតបថា លោកនឹងអធិស្ឋានសម្រាប់កោះតៃវ៉ាន់ប៉ុន្តែមិនបានផ្តល់កាលបរិច្ឆេទសម្រាប់ដំណើរទស្សនកិច្ចដែលបានស្នើឡើងនេះទេ។
សេចក្តីថ្លែងការណ៍បានបន្ថែមថា លោក Chen បានគូសបញ្ជាក់ពីលក្ខណៈបណ្តោះអាសន្ននៃកិច្ចព្រមព្រៀងរវាងបុរីវ៉ាទីកង់និងប្រទេសចិនដោយនិយាយថាវាមិនពាក់ព័ន្ធនឹង “ធាតុការទូត” ឬប៉ះពាល់ដល់មិត្តភាពរវាងកោះតៃវ៉ាន់និងបុរីវ៉ាទីកង់ទេ។ លោក Chen បាននិយាយថា “យើងសូមអំពាវនាវដល់អ្នករាល់គ្នាកុំបកស្រាយហួសហេតុនិងព្រួយបារម្ភអំពីកិច្ចព្រមព្រៀងនេះ”។
ទោះបីជាបុរីវ៉ាទីកង់និយាយថា កិច្ចព្រមព្រៀងថ្ងៃទី២២ខែកញ្ញារបស់ខ្លួនមិនមែនជារឿងនយោបាយក៏ដោយប៉ុន្តែមន្ត្រីតៃវ៉ាន់ខ្លះបារម្ភថា វាអាចជាការចាប់ផ្តើមបង្កើតទំនាក់ទំនងការទូតជាមួយក្រុងប៉េកាំងហើយបេសកជនបុរីវ៉ាទីកង់ប្រចាំកោះតៃវ៉ាន់បាននិយាយថា ប្រទេសចិនចង់ធ្វើឲ្យកោះនេះមិនមានការជាប់ពាក់ព័ន្ធ។
ក្រុងតៃប៉ិតែងតែចោទប្រកាន់ប្រទេសចិនថាបានប្រើប្រាស់អំណាចផ្នែកការទូតនិងការគំរាមកំហែងដើម្បីដណ្តើមយកសម្ព័ន្ធមិត្តរបស់ខ្លួនប៉ុន្តែការចោទប្រកាន់នេះត្រូវបានក្រុងប៉េកាំងបដិសេធ៕ REUTERS
Source: Kampuchea Thmey Daily
0 Comments