កាលពីថ្ងៃចន្ទ ព្រះអង្គម្ចាស់ Harry បានទៅសួរសុខទុក្ខសហគមន៍ជនជាតិដើមមួយនៅលើកោះ Fraser ដែលបានចុះបញ្ជីជាសម្បត្តិបេតិកភណ្ឌពិភពលោកខណៈដែលអគ្គមហេសី Meghan ដែលមានផ្ទៃពោះបានសម្រាកពីព្រះរាជកិច្ចផ្លូវការអំឡុងដំណើរទៅប្រទេសអូស្ត្រាលីរបស់ក្សត្រទាំងពីរ។
ក្សត្រទាំងពីរបានធ្វើដំណើរទៅទីក្រុង Sydney, Melbourne និង Dubbo ចាប់តាំងពីទៅដល់ប្រទេសអូស្ត្រាលីកាលពីថ្ងៃចន្ទមុនមកដោយបានទាក់ទាញអ្នកគាំទ្ររាប់ពាន់នាក់មកកាន់ព្រឹត្តិការណ៍របស់ពួកគេ។
ដំណើរទៅកាន់កោះ Fraser នៅឆ្នេរសមុទ្ររដ្ឋ Queensland គឺមានភាពខុសប្លែកដោយសារតែព្រះអង្គម្ចាស់ត្រូវបានស្វាគមន៍ដោយពិធីប្រពៃណីជនជាតិដើមភាគតិចមកពីសហគមន៍ Butchulla នៅមាត់បឹង McKenzie ។
នៅពេលក្រោយមក ព្រះអង្គ Harry បានយាងដើរដោយជើងទទេរលើខ្សាច់ពណ៌.សដ៏រលោងនៃបឹងនេះដែលជាប្រភពនៃទឹកផឹកសម្រាប់ប្រជាជន Butchulla ហើយបានយកទឹកស្រពព្រះភ័ក្ត្ររបស់ទ្រង់។
Fraser គឺជាកោះឆ្នេរខ្សាច់ធំបំផុតរបស់ពិភពលោកហើយព្រះអង្គនឹងបង្ហាញបន្ទះមួយដើម្បីឧទ្ទិសតំបន់ព្រៃឈើមួយនេះដល់គម្រោងអភិរក្សទំនៀមទម្លាប់របស់ព្រះមហាក្សត្រ។
ក្រោយមក ព្រះអង្គនឹងជួបជាមួយវេជ្ជបណ្ឌិតទីក្រុង Hervey Bay ចំនួនពីរនាក់ដែលត្រូវបានស្គាល់ដោយសារតែបំពេញបំណងចុងក្រោយរបស់ស្ត្រីស្លាប់ម្នាក់ដោយនាំនាងទៅឆ្នេរសមុទ្រ។
រូបថតរបស់គ្រូពេទ្យម្នាក់នៅក្បែរហ្វ្រង់ការដែលបែរមុខទៅមហាសមុទ្រត្រូវបានគេបង្ហោះនៅលើ Facebook កាលពីឆ្នាំមុនហើយបានបង្កភាពល្បីល្បាញនៅជុំវិញពិភពលោក។
ក្សត្រទាំងពីរបានមកដល់រដ្ឋ Queensland តាមយន្តហោះមុនពេលធ្វើដំណើរទៅកោះដាច់ដោយឡែកពីគ្នា។
គួរបញ្ជាក់ថា អ្នកទាំងពីរនឹងត្រូវធ្វើដំណើរព្រះរាជទស្សនកិច្ចនៅ Fiji និង Tonga បន្ទាប់ពីកោះ Fraser៕ AFP
Source: Kampuchea Thmey Daily
0 Comments