Miss Grand Cambodia​ ចេញ​សារ​ថ្លែងអំណរគុណ​ចំពោះ​អ្នកគាំទ្រ​ ទោះបី​ពុំ​ទទួលបាន​ជោគជ័យ​ពី​ការប្រកួត​បវរកញ្ញា​អន្តរជាតិ​ឆ្នាំ​២០១៨

ភ្នំពេញ ​៖​ បំផុត​កម្មវិធី​នៃ​ការប្រកួត​បវរកញ្ញា​អន្តរជាតិ ឆ្នាំ​២០១៨(Miss Grand International 2018 )​ដែល​ប្រព្រឹត្ត​ធ្វើឡើង​នៅ​ប្រទេស មីយ៉ាន់ម៉ា ​ត្រូវ​បានបញ្ចប់​ទាំងស្រុង​កាលពី​រាត្រី​ថ្ងៃទី​២៥ ​ខែតុលា​ឆ្នាំ​២០១៨​កន្លងមកនេះ​ ខណៈ​បវរកញ្ញា ​ដែល​គ្រង​មកុដ​ឯក​សម្រាប់​ឆ្នាំ​២០១៨​នេះ​ បាន​ទៅលើ​បវរកញ្ញា​មកពី​ប្រទេស​ប៉ា​រ៉ា​ហ្កា​គឺ​កញ្ញា Clara Sosa។

​អ្វីដែល​កាន់តែ​ធ្វើ​ឲ្យ​មហាជន​ខ្មែរ​មានការ​សោកស្តាយ​ខ្លាំង​នោះ ​បន្ទាប់ពី​បញ្ចប់​នៃ​ការប្រកួត MissGrand International 2018​ដោយសារ​បវរកញ្ញា​តំណាង​ប្រទេស​កម្ពុជា​គឺ​កញ្ញា ឌី ស្រី​កា ពុំបាន​ទទួលបាន​ចំណាត់ថ្នាក់​ក្នុងការ​ប្រកួត​ណាមួយ​នោះឡើយ​។​ ខណៈ​ដែលមាន​មហាជន​ខ្មែរ​ជាច្រើន​សម្តែង​ការមិន​អស់ចិត្ត​លើ​លទ្ធផល​ដោយហេតុថា កន្លងមក ឌី ស្រី​កា តែង​នាំមុខគេ​ចំពោះ​ការបោះឆ្នោត​គាំទ្រ ។​
​
ថ្វីត្បិតតែ​បវរកញ្ញា​តំណាង​ប្រទេស​កម្ពុជា​គឺ​កញ្ញា ឌី ស្រី​កា មិនបាន​ទទួលបាន​ចំណាត់ថ្នាក់ ក្នុងការ​ប្រកួត Miss Grand International 2018​នៅ​ប្រទេស​មី​យ៉ាន់​ម៉ា​បែបនេះ​ក៏ពិតមែន​ ប៉ុន្តែ​នៅលើ​ផេ​ក Miss Grand Cambodia​ភ្លាមៗ​នេះ​ ក៏បាន​ចេញ​សេចក្តីប្រកាស​ដើម្បី​ថ្លែងអំណរគុណ​ដល់​ទស្សនិកជន​និង​ប្រជាពលរដ្ឋ​ខ្មែរ​ដែល​បាន​ចូលរួម​គាំទ្រ​លើកទឹកចិត្ត​ដល់ក​ញ្ញា ឌី លីកា ផងដែរ​។​
​
ផ្អែក​តាម​ខ្លឹមសារ​ដែល​ត្រូវបាន​បង្ហាញ​នៅលើ​ផេ​ក Miss Grand Cambodia​​ ​លើកឡើងថា​ គណៈកម្មការ​រៀបចំ​កម្មវិធី​ប្រកួត Miss Grand Cambodia ក្រុមការងារ និង​កញ្ញា ឌី លីកា Miss Grand Cambodia 2018 សូម​លំឱនកាយ ថ្លែងអំណរគុណ​ចំពោះ​ប្រិយមិត្ត​ប្រជា​កម្ពុជា​គ្រប់ៗ​រូប ដែល​បាន​ផ្តល់នូវ​ក្តីមេត្តា ជ្រោមជ្រែង ឧបត្ថម្ភ​គាំទ្រ​ដល់​បេក្ខភាព​កម្ពុជា ដើម្បី​កម្ពុជា រហូត​តាំង​ពីថ្ងៃ​ដំបូង​នៃ​កម្មវិធី​ប្រកួត រហូត​ទទួលបាន​នូវ​ពានរង្វាន់​កិត្តិយស​នេះ ពានរង្វាន់ Grand Pageant 's Choice Award ។

ប្រភព​បាន​បន្តថា ​ទោះបីជា​នេះ​ពុំមែន​ជា​ពានរង្វាន់​ផ្លូវការ​នៃ​កម្មវិធី​ប្រកួត ប៉ុន្តែ​យើងខ្ញុំ​ទាំងអស់​ពិតជា​មាន​មោទនភាព​ចំពោះ​ពានរង្វាន់​នេះ​ឥតឧបមា ព្រោះនេះ​ជា​លើក​ទី​២​ដែល​យើង​ទទួលបាន​គឺ​ទទួលបាន​ដោយ​កិច្ចខិតខំ​ប្រឹងប្រែង​ពី​សំណាក់​លោកអ្នក​ជួយ​បោះឆ្នោត​គាំទ្រ​ចំពោះ​បេក្ខភាព​កម្ពុជា​ក្នុងចំណោម​បេ​ក្ខ​នារី​៧៥​ប្រទេស​មកពី​ទូទាំង​ពិភពលោក។ យើងខ្ញុំ​ទាំងអស់​ពិតជា​មានចិត្ត​រំភើប​ចំពោះ​ទឹកចិត្ត​រួបរួម កិច្ចខិតខំ លើ​គ្រប់ការ​បោះឆ្នោត​គាំទ្រ ទាំង​ឈុត​តំណាង​ជាតិ ទាំង​ផ្នែក​ប្រជាប្រិយភាព​ទាំង​បេ​ក្ខ​នារី​សម្រស់​ត្រកាល​នៃ​កម្មវិធី​ប្រកួត​បឋម ឬ​គ្រប់ៗ​វិញ្ញាសា​​។
​
នៅលើ​ផេ​ក Miss Grand Cambodia ដដែល​នេះ​បាន​បញ្ជាក់ថា យើងខ្ញុំ​នឹង​ចាំ​ទុកជា​និច្ច​នូវ​កម្លាំងចលករ​នេះ ដើម្បី​លើកទឹកចិត្ត​ខ្លួន​ក្នុង​ការខិតខំ​ព្យាយាម​បន្តទៅទៀត​។ សូម​ថ្លែងអំណរគុណ​ផងដែរ​ចំពោះ​បណ្តា​ក្រុមហ៊ុន​ចូលរួម​ឧបត្ថម្ភ​កម្មវិធី​ប្រកួត Miss Grand Cambodia និង​បណ្តា​ក្រុមហ៊ុន​ក៏ដូចជា​គ្រប់ផ្នែក​ពាក់ព័ន្ធ​ទាំងអស់​ដែល​បាន​ចូលរួម​ឧបត្ថម្ភ​ក្នុង​ដំណើរ​ឆ្ពោះទៅកាន់​កម្មវិធី​ប្រកួត​Miss Grand International 2018 ។​
​
សូម​គោរព​ជូនពរ​លោកអ្នក​ទទួល​បាន​នូវ​ពុទ្ធពរ​ទាំង​៤​ប្រការ គឺ​អាយុ វណ្ណៈ សុ​ខៈ និង​ពលៈ កុំបី​ឃ្លៀងឃ្លាត​ឡើយ​។​កញ្ញា ឌី លីកា នឹងធ្វើ​ដំណើរ​ត្រឡប់​ម​កម្ពុជា​វិញ​តាមរយៈ​ការហោះហើរ​នៃ​ក្រុមហ៊ុន​អាកាសចរ Emirates ជើងហោះហើរ​លេខ EK 388 មកដល់​រាជធានី​ភ្នំពេញ​វេលា​ម៉ោង ២១:២៥ នាទី​យប់​។​
​
សូមបញ្ជាក់ថា​កម្មវិធី​ប្រកួត​សម្រស់​លំដាប់ថ្នាក់​ពិភពលោក​(Miss Grand International) គឺជា​កម្មវិធី​មួយ​ដែល​បង្កើតឡើង​ក្នុង​គោលបំណង បញ្ចប់សង្គ្រាម និង​អំពើហិង្សា​ដែលមាន​ជាង​៩០​ប្រទេស នៅលើ​ពិភពលោក ចូលរួម​ជា​រៀងរាល់ឆ្នាំ​ចាប់តាំងពី​ឆ្នាំ​២០១៣​មក​។​ ចំណែក​ឆ្នាំ​២០១៨​នេះ​ការប្រកួត​ចាប់ផ្តើម​ពីថ្ងៃ​ទី​១៦ ខែតុលា រហូតដល់​ថ្ងៃទី​២៥ ខែតុលា ឆ្នាំ​២០១៨​ត្រូវបាន​បិទ​បញ្ចប់​ទាំងស្រុង​៕


​

Source: Kampuchea Thmey Daily