សម្រាប់ការប្រកួតជម្រុះលើកទី៣ នៃព្រឹត្តិការណ៍ប្រដាល់ដណ្តើមខ្សែក្រវាត់ខារ៉ាបាវរដូវកាលទី៧ ទម្ងន់៦០គីឡូក្រាមនៅលើសង្វៀនSEA-TV កាលពីរសៀលថ្ងៃទី១៣ តុលា ២០១៨នោះ ឃីម បូរ៉ា អ្នកប្រដាល់កម្ពុជាក្លិបរស្មីភូមិគាបខេត្តបន្ទាយមានជ័យ និងសុខ សាវិន ក្លិបឆ្មាសសែនសុខគុនខ្មែរ បានវាយចាញ់ថៃដូចគ្នា។
ឃីម បូរ៉ា ត្រូវអ្នកប្រដាល់ថៃ Phat Ngenthong វាយអោយសន្លប់ក្នុងទឹកទី២ ហើយសុខ សាវិន បានវាយចាញ់អ្នកប្រដាល់ថៃ Phat Thana ដោយពិន្ទុដាច់៥ទល់០ ។
ដូច្នេះ ឃីម បូរ៉ា និង សុខ សាវិន អ្នកប្រដាល់កម្ពុជាយើង ដែលថិតក្នុងពូលA(ពូលខ្មែរ) ពួកគេទាំងពីររកបាន៧ពិន្ទុម្នាក់ដូចគ្នា ក្នុងជម្រុះ៣លើកនេះ ដោយឈ្នះទាំង២លើក និងចាញ់១លើក ហើយ Phat Ngenthong (ពូលB) បាន៥ពិន្ទុ និង Phat Thana(ពូលB)បាន៧ពិន្ទុ សម្រាប់ការប្រកួតជម្រុះ៣លើកដូចគ្នានោះ ។
សូមបញ្ជាក់ថា ការប្រកួតជើងឯកខារ៉ាបាវរដូវកាលទី៧ ទម្ងន់៦០គីឡូក្រាមលើកនេះ មានអ្នកប្រដាល់ខ្លាំងៗចំនួន ៨ រូប ចូលរួមប្រកួត គឺខ្មែរ៤នាក់ ថៃ៤នាក់ ។ អ្នកប្រដាល់ខ្មែរទាំង៤នាក់នោះ រួមមានឃីម បូរ៉ា ក្លិបរស្មីភូមិគាបខេត្តបន្ទាយមានជ័យ , សុខ សាវិន ក្លិបឆ្មាសសែនសុខគុនខ្មែរ , លី ភា ក្លិបសំរោងកោងខេត្តបាត់ដំបង និងសូត្រ ខេវិន ក្លិបបក្សីស្លាបដែក។ ឯ អ្នកប្រដាល់ថៃ ៤ នាក់វិញ មាន Phat ChhayakPhum , Phat Maha , Phat Ngenthong និង Phat Thana ៕
មុត ខ្លឹមខ្មៅ អ្នកឈ្នះប្រាក់១០លានរៀល
ព្រឹត្តិការណ៍ប្រកួតប្រដាល់ជម្រុះដណ្តើមប្រាក់១០លានរៀល របស់ក្រុមហ៊ុនស្រាបៀរGanzberg ក្នុងប្រភេទទម្ងន់៦៥គីឡូក្រាម នៅលើសង្វៀនទូរទស្សន៍អាស៊ីអាគ្នេយ៍សម្រាប់សប្តាហ៍ចុងក្រោយ យប់ថ្ងៃទី១៣តុលា២០១៨ ដែលជាការប្រកួតផ្តាច់ព្រ័ត្រនោះ មុត ខ្លឹមខ្មៅ អ្នកប្រដាល់ក្លិបមកុដរាជសីហ៍ បានវាយឈ្នះអ៊ុំ វណ្ណេត អ្នកប្រដាល់ក្លិបការិយាល័យទី៥ កងទ័ពជើងគោកដោយពិន្ទុឯកច្ឆ័ន្ទ ។
មុត ខ្លឹមខ្មៅ ឆ្លងកាត់វគ្គជម្រុះ៤ប្រកួតនិង១ប្រកួតក្នុងវគ្គផ្តាច់ព្រ័ត្រនេះ គេឈ្នះរហូត ដែលធ្វើឲ្យគេទទួលបានប្រាក់រង្វាន់១០លានរៀល ក្នុងឋានៈជាអ្នកលេខ១នៃព្រឹត្តិការណ៍ ប្រដាល់ដណ្តើមប្រាក់១០លានរៀល ក្នុងប្រភេទទម្ងន់៦៥គីឡូក្រាមនេះ ។ ចំពោះអ៊ុំ វណ្ណេត ដែលចាញ់នោះ បាន២លានរៀល ។
ឌុន រដ្ឋា ចាញ់ Aboofazei ឯ ផាន់ គ្រាន់ ចាញ់ Loom Leng
ឌុន រដ្ឋា អ្នកប្រដាល់ក្លិបអេភូថងកីឡា បានវាយឈ្នះអ្នកប្រដាល់អ៊ីរ៉ង់Aboofazei ក្នុងទឹកទី៥ ក្នុងការជួបប្រកួតគ្នា នាយប់ថ្ងៃសៅរិ៍ទី១៣តុលា២០១៨ នៅលើសង្វៀនGanzberg Top Fighter នេះដែរ ។
អ្នកប្រដាល់អ៊ីរ៉ង់ Aboofazei បានវាយឌុន រដ្ឋា ដោយកែងបែកចិញ្ចើមខាងស្តាំហូរឈាមខ្លាំងនៅក្នុងទឹកទី៤ ។មកដល់ទឹកទី៥ ដោយសារការរំខានការប្រកួត ធ្វើឲ្យគ្រូពេទ្យសម្រេចបញ្ឈប់ឌុន រដ្ឋា លែងអោយបន្តការប្រកួតទៀត ព្រោះខ្លាចមានគ្រោះថ្នាក់ធ្ងន់ធ្ងរជាងនេះទៀត ។
ចំពោះ អ្នកប្រដាល់ជើងខ្លាំងផាន់ គ្រាន់ ក្លិបពុទ្ធសេរីវង្សកីឡា បានប្រកួតចាញ់អ្នកប្រដាល់ថៃLoom Leng ក្នុងទឹកទី៣ ដោយសារគេរបូតស្មា ដោយការទាត់ត្រូវរបស់Loom Leng ប៉ុន្មានជើងនោះ ។ ពួកគេទាំងពីរ ប្រកួតគ្នាក្នុងទម្ងន់៦៥គីឡូក្រាម៕
Source: Kampuchea Thmey Daily
0 Comments