ការប្រកួតជម្រុះដណ្ដើមខ្សែក្រវាត់ជើងឯកWurkz ទម្ងន់៦៧គីឡូក្រាម នៅសង្វៀនទូរទស្សន៍SEATV នៅរសៀលថ្ងៃអាទិត្យ ទី២៨ ខែតុលា ឆ្នាំ២០១៨នេះ ជាការប្រកួតជុំទី៣ រវាងអ្នកប្រដាល់កម្ពុជាពុទ្ធឆាយរិទ្ធី ក្លិបពុទ្ធសេរីវង្សកីឡា និងអ្នកប្រដាល់ថៃPheach Aroun ខណៈដែលអ្នកប្រដាល់កម្ពុជាមាជ សុខរ៉ា ក្លិបតាព្រហ្មមានជ័យ ត្រូវជួបជាមួយអ្នកប្រដាល់ថៃ Kao Ah។
សម្រាប់ជំនួបក្នុងជុំទី៣នេះ រវាង ពុទ្ធ ឆាយរិទ្ធី និង Pheach Aroun នេះ ពួកគេទាំងពីរនាក់នេះធ្លាប់ជួបគ្នាពីរលើកហើយ កាលពី៣ឆ្នាំមុន(២០១៥) ដោយវាយឈ្នះចាញ់គ្នាដោយពិន្ទុម្ដងម្នាក់។
ពុទ្ធ ឆាយរិទ្ធី និង Pheach Aroun នេះ គេមានសមត្ថភាពប្រហាក់ប្រហែលគ្នាទេ ហើយ មាឌ និងកម្ពស់ក៏ប្រហែលគ្នាដែរ ដោយ ពុទ្ធ ឆាយរិទ្ធី មានកម្ពស់១,៧១ម៉ែត្រ ហើយPheach Aroun ក៏មានកម្ពស់១,៧១ម៉ែត្រដូចគ្នា។ ប៉ុន្តែប្រវត្តិប្រកួតរបស់ Pheach Aroun តិចជាង ឆាយរិទ្ធី ប្រមាណ១៧លើក។
Pheach Aroun គេមានកំណត់ត្រាប្រកួតចំនួន៩២លើក ឈ្នះ៨២លើក ចាញ់១០លើក មិនដែលស្មើ ខណៈ ពុទ្ធ ឆាយរិទ្ធី គេមានកំណត់ត្រាប្រកួត១០៩លើក ឈ្នះ៨៣លើក ចាញ់២៤លើក និងស្មើ០២លើក។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ។ កាលពីប្រកួតជុំទី២ ពុទ្ធ
ឆាយរិទ្ធី ឈ្នះ Kev Kongvan ដោយពិន្ទុ ដែលសរុបពីរប្រកួតឈ្នះ១ ចាញ់១ បាន៤ពិន្ទុ ឯ Pheach Aroun គេវាយឈ្នះ រឿង សារ័ត្ន ក្នុងទឹកទី១ សរុបពីរប្រកួត បាន៦ពិន្ទុ គឺឈ្នះទាំងពីរប្រកួត។ ចាំមើល ក្នុងជុំទី៣នេះ តើនរណារកបាន៣ពិន្ទុនោះ?។
ចំពោះ មាជ សុខរ៉ា និង Kao Ah វិញមិនដឹងថានរណារកបាន៣ពិន្ទុនោះដែរ? សុខរ៉ា និង Kao Ah ពួកគេមិនធ្លាប់ជួបគ្នាទេកន្លងមក។ Kao Ah ជាអ្នកប្រដាល់ចំណូលថ្មី គេប្រកួតបានតែ១ប្រកួតដំបូងប៉ុណ្ណោះ ដោយចាញ់ រឿង សារ័ត្ន ក្នុងទឹកទី៣ ហើយលើកទី២ គេឈ្នះដោយស្វ័យប្រវត្តិដោយសារ ជឹម ចិត្រា បោះបង់ចោលការប្រកួត ដែលធ្វើឲ្យពីរប្រកួតរបស់ Kao Ah ឈ្នះ១ប្រកួត ចាញ់១ប្រកួតបាន៤ពិន្ទុ។ មាជ សុខរ៉ា ក្នុងពីរប្រកួតកន្លងមក បាន២ពិន្ទុ គឺចាញ់ទាំងពីរប្រកួត។ សម្រាប់ការជួប Kao Ah លើកនេះ ពុំដឹងថា មាជ សុខរ៉ា អាចយកឈ្នះ Kao Ah បាន ឬអត់នោះទេ?។
មាជ សុខរ៉ា គេហាក់ដូចជាស្រុតធ្លាក់ជាងមុន ទោះបីរបៀបវាយរបស់គេ នៅតែល្អ និងនៅរហ័សក៏ពិតមែន តែកម្លាំង និងទឹកចិត្តរបស់គេស្រុតចុះ។ សុខរ៉ា គេមានប្រវត្តិប្រកួតចំនួន៦២លើក ឈ្នះ៥២ លើក ចាញ់០៩លើក និងស្មើ០១លើក។ ចំពោះ Kao Ah វិញ ក៏មិនខ្លាំងប៉ុន្មានដែរ។ គេមានប្រវត្តិប្រកួតចំនួន៦៤លើក ឈ្នះ៥៤លើក ចាញ់១០លើក មិនដែលស្មើ។
ចាំមើល ការប្រកួតក្នុងជុំទី៣នេះ រវាងមាជ សុខរ៉ា និង Kao Ah តើនរណារកបាន៣ពិន្ទុនោះ? ចំពោះការការប្រកួតក្រៅពីគូខ្សែក្រវាត់នេះ នួន រ៉ាថេន អ្នកប្រដាល់ក្លិបតាឯកដំបងដែកមានរិទ្ធខេត្តព្រៃវែង
ត្រូវគេផ្គូឲ្យជួបប្រកួតជាមួយ ពុទ្ធ ភារិន្ទ អ្នកប្រដាល់ក្លិបពុទ្ធសេរីវង្សកីឡា ដោយជួបគ្នាក្នុងប្រភេទទម្ងន់៥៧គីឡូក្រាម។ អ្នកប្រដាល់ពីរនាក់នេះ មិនធ្លាប់បានប៉ះគ្នាទេកន្លងមក។
នួន រ៉ាថេន ថ្វីត្បិតតែជាអ្នកប្រដាល់ចាស់វស្សា ប៉ុន្តែគេវាយមិនសូវច្បាស់ប៉ុន្មានឡើយ។ ដូច្នេះសម្រាប់ការប្រកួតជាមួយ ពុទ្ធ ភារិន្ទ ដែលជាអ្នកប្រដាល់ស្រករក្រោយនោះ ពុំដឹងថា រ៉ាថេន អាចយកឈ្នះ ភារិន្ទ បានឬអត់នោះទេ?។ ខាំ ផាន់នី អ្នកប្រដាល់ក្លិបដីឡូត៍មានរិទ្ធខេត្តបន្ទាយមានជ័យ នឹងជួបសាកកណ្ដាប់ដៃជាមួយ វ៉ែន សុវណ្ណ អ្នកប្រដាល់ក្លិបកងកេងមានរិទ្ធខេត្តបាត់ដំបង។ សម្រាប់ការជួបគ្នារវាងអ្នកប្រដាល់ទាំងពីរនាក់នេះ ត្រូវបានគេរំពឹងថា ខាំ ផានី ពុំអាចយកឈ្នះ វ៉ែន សុវណ្ណ បានឡើយ៕
Source: Kampuchea Thmey Daily
0 Comments