ក្រុមបាល់ទាត់ជម្រើសជាតិម៉ាឡេស៊ី បានធ្វើដំណើរមកដល់រាជធានីភ្នំពេញហើយ នៅថ្ងៃអង្គារ ដើម្បីត្រៀមប្រកួតជាមួយបើកឆាកជាមួយក្រុមម្ចាស់ផ្ទះជម្រើសជាតិកម្ពុជា ក្នុងពានរង្វាន់ធំប្រចាំតំបន់អាស៊ាន AFF Suzuki Cup 2018 វគ្គជម្រុះពូល A ដែលនឹងធ្វើឡើងនៅថ្ងៃព្រហស្បតិ៍ សប្ដាហ៍នេះ។
យោងតាមការឲ្យដឹងពីមន្ត្រីរបស់សហព័ន្ធកីឡាបាល់ទាត់កម្ពុជា បានលើកឡើងថា ក្រុមជម្រើសជាតិម៉ាឡេស៊ី បានធ្វើដំណើរមកដល់អាកាសយានដ្ឋានអន្តរជាតិភ្នំពេញ នៅវេលាម៉ោង១២និង៤០នាទីថ្ងៃត្រង់ ថ្ងៃអង្គារនេះដែលមានសមាជិក២៣នាក់ និងដឹកនាំដោយលោក Tan Cheng Hoe ដែលជាគ្រូបង្វឹក។
ចំពោះកីឡាករដែលសហព័ន្ធកីឡាបាល់ទាត់ម៉ាឡេស៊ី កោះហៅ២៣នាក់ចុងក្រោយមានដូចជាអ្នកចាំទី Hafizul Hakim Khairul Nizam Jothy មកពីក្លិបPerak Farizal Marlias មកពីក្លិបJDT Khairul Fahmi Che Mat របស់ក្លិបMelaka United។ ចំពោះខ្សែការពារវិញមានកីឡាករ Aidil Zafuan Abdul Razak របស់JDT កីឡាករAdam Nor Azlin របស់JDT កីឡាករ Shahrul Saad របស់Perakកីឡាករ Amirul Azhan Aznan របស់Perak កីឡាករ Nazirul Naim Che Hashim របស់Perakកីឡាករ Syazwan Andik Ishak របស់Kuala Lumpur កីឡាករ Irfan Zakaria របស់Kuala Lumpurកីឡាករ Syahmi Safari របស់Selangor។
សម្រាប់ខ្សែបម្រើវិញមានកីឡាករSyamer Kutty Abba របស់ក្រុមJDT កីឡាករSafawi Rasid របស់ក្រុមJDT កីឡាករ Kenny Palraj របស់ក្រុមPerak កីឡាករ Akram Mahinan របស់ក្រុមKedah កីឡាករ Syazwan Zainon របស់ក្រុមKedah កីឡាករ Akhyar Rashid របស់ក្រុមKedah កីឡាករ Mohamadou Sumareh របស់Pahang។ ក្រឡេកមើលខ្សែប្រយុទ្ធវិញ មានកីឡាករ Ahmad Hazwan Bakri របស់JDT កីឡាករSyafiq Ahmad របស់JDT កីឡាករ Zaquan Adha Abdul Razak របស់Kuala Lumpur កីឡាករNorshahrul Idlan Talaha របស់Pahang កីឡាករ Shahrel Fikri Md Fauzi របស់Nakhon Ratchasima ប្រទេសថៃ។
ក្រុមជម្រើសជាតិកម្ពុជា ត្រូវប្រកួតជាមួយក្រុមភ្ញៀវម៉ាឡេស៊ី នៅវេលាម៉ោង៦និង៣០នាទីល្ងាច ថ្ងៃព្រហស្បតិ៍ ទី៨ ខែវិច្ឆិកា ឆ្នាំ២០១៨ លើទីលានពហុកីឡដ្ឋានជាតិក្នុងរាជធានីភ្នំពេញ។
ប្រកួតនេះមានផ្សាយផ្ទាល់នៅលើប៉ុស្តិ៍ទូរទស្សន៍ BTV News ផងដែរ។ ចំណែកសំបុត្រសម្រាប់ទស្សនិកជនចង់ចូលរួមទស្សនាផ្ទាល់ត្រូវបានសហព័ន្ធកីឡាបាល់ទាត់កម្ពុជា ដាក់លក់តាំងពីថ្ងៃទី២៩ ខែតុលា ឆ្នាំ២០១៨ មកម្ល៉េះគឺចាប់ពីម៉ោង ៩និង០០ព្រឹក ដល់ម៉ោង ៦និង០០នាទីល្ងាចនៅពហុកីឡដ្ឋានជាតិ ដោយសំបុត្រមានតម្លៃ១២,០០០៛សម្រាប់ប្រភេទទី១និងតម្លៃ៦,០០០៛ សម្រាប់ប្រភេទទី២។ ចំពោះព័ត៌មានបន្ថែមសូមទាក់ទងក្នុងម៉ោងធ្វើការទៅលេខ០៧១ ៤៨ ៦៩ ៤៧៥ ឬ ០១៥ ៤៤ ៧៦ ៨០។
បើនិយាយពីពានរង្វាន់ AFF Suzuki Cup 2018 ឆ្នាំនេះពូល A មានវៀតណាម ម៉ាឡេស៊ី មីយ៉ាន់ម៉ា កម្ពុជា និងឡាវ ខណៈពូល B មានថៃ ឥណ្ឌូណេស៊ី ហ្វីលីពីន សិង្ហបុរី និងក្រុមឈ្នះនៅវគ្គជម្រុះទីម័រខាងកើត។ តាមគម្រោងការវគ្គជម្រុះតាមពូលនេះនឹងធ្វើឡើចាប់ពីថ្ងៃទី៨ ខែវិច្ឆិកា ដល់ថ្ងៃទី១៥ខែធ្នូ ឆ្នាំ២០១៨។ ព្រឹត្តិការណ៍ទាំងមូលនេះនៅកម្ពុជា គឺទទួលសិទ្ធិផ្សាយផ្ទាល់ដោយប៉ុស្តិ៍ BTV News ផងដែរ។
សម្រាប់កម្មវិធីប្រកួតជម្រុះពូល A របស់ក្រុមកម្ពុជា វិញ ក្រៅពីប្រកួតបើកឆាកប៉ះក្រុមម៉ាឡេស៊ី នៅថ្ងៃទី៨ ខែវិច្ឆិកានេះ គឺត្រូវប៉ះម្ចាស់ផ្ទះមីយ៉ាន់ម៉ា នៅថ្ងៃទី១២ ខែវិច្ឆិកា នៅទីក្រុងរ៉ង់ហ្គូន វិញម្តងហើយនៅថ្ងៃទី២០ ខែវិច្ឆិកា ក្រុមកម្ពុជា ត្រូវប៉ះឡាវ នៅរាជធានីភ្នំពេញ ហើយនៅថ្ងៃទី២៤ ខែវិច្ឆិកា ត្រូវធ្វើដំណើរទៅប៉ះម្ចាស់ផ្ទះវៀតណាម នៅទីក្រុងហាណួយ ដែលជាប្រកួតបិទពូល៕
Source: Kampuchea Thmey Daily
0 Comments