ភ្នំពេញ ៖ នៅរសៀលថ្ងៃទី៦ ខែវិច្ឆិកា ឆ្នាំ២០១៨នេះ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញលោកស្រី ថ្លាង ផាណែត បានបើកសវនាការកាត់ទោសជនជាប់ចោទឈ្មោះ ឡូត ហេង ហៅ ម៉េង ពាក់ព័ន្ធនឹងបទកាន់កាប់អាវុធដោយគ្មានការអនុញ្ញាត បទប្រើប្រាស់ឯកសារសាធារណៈក្លែង និងបទចរាចរណ៍ក្រដាស់ប្រាក់ក្លែងក្លាយដោយចេតនា។
ជនជាប់ចោទនៅពេលសវនាការបានឆ្លើយសារភាពថា ខ្លួនពិតជាបានប្រព្រឹត្តដូចការចោទប្រកាន់នេះមែន ហើយក៏បាននិយាយប្រាប់ពីរឿងប្រើហ្គាសនឹងលុយខ្មៅ គឺរូបខ្លួនបានមកពីបុរសជនជាតិថៃម្នាក់បានឲ្យមកខ្លួន ហើយខ្លួនក៏បានទាក់ទងទិញទឹកលាងលុយខ្មៅពីប្រទេសវៀតណាមដែល ហើយរឿងក្លែងពាក់ផ្កាបីនេះ គឺខ្លួនគ្រាន់តែពាក់ថតដាក់ក្នុងទូរស័ព្ទដើម្បីបង្ហាញពួកជនជាតិចិនដើម្បីងាយរកស៊ីតែប៉ុណ្ណោះ។
សូមបញ្ជាក់ថា កាលពីព្រឹកថ្ងៃទី២៦ ខែមីនា ឆ្នាំ២០១៨ កម្លាំងសមត្ថកិច្ចនគរបាលខណ្ឌឫស្សីកែវ បានបញ្ជូនមន្ត្រីយោធាម្នាក់ និង បក្សពួកដែលអួតអាងពីរឿងលាងលុយទៅសាលាដំបូងរាជធានីភ្នំពេញដើម្បីធ្វើការសាកសួរ។
ជនសង្ស័យដែលសមត្ថកិច្ចបញ្ជូនទៅតុលាការ១.ឈ្មោះ ឡូត ហេង ហៅ ម៉េង ភេទប្រុសអាយុ២៩ឆ្នាំ មានទីលំនៅផ្ទះជួល សង្កាត់ផ្សារថ្មី២ ខណ្ឌដូនពេញ មុខរបរយោធា ជាម្ចាស់អាវុធនិងលុយខ្មៅ។ ២.ឈ្មោះ សន ប៊ុនថេង ភេទប្រុស អាយុ២៥ឆ្នាំ មានទីលំនៅផ្ទះជួលភូមិឃ្លាំង សង្កាត់ឫស្សីកែវ ខណ្ឌឫស្សីកែវ តែត្រូវបានតុលាការដោះលែងឲ្យទៅផ្ទះវិញដោយសារមានជាប់ពាក់ព័ន្ធនឹងរឿងនេះ។
ជនសង្ស័យទាំង២នាក់ត្រូវបានសមត្ថកិច្ចបង្ក្រាប ជាក់ស្តែងករណីកាន់កាប់អាវុធខុសច្បាប់(អាវុធប្រើហ្គាស)និងប្រាក់ដុល្លារខ្មៅ នៅថ្ងៃទី២៣ខែមីនាឆ្នាំ២០១៨វេលាម៉ោង២៣និង៣០នាទី នៅចំណុចផ្លូវជាតិលេខ៥ ក្រុមទី៤ ភូមិឃ្លាំងសាំង សង្កាត់ឫស្សីកែវ កម្លាំងចំរុះរបស់អធិការដ្ឋាននគរបាលខណ្ឌឫស្សីកែវពេលចុះរឹតបណ្តឹងច្បាប់ចរាចរណ៍ផ្លូវគោកនៅគោលដៅខាងលើ។ នៅពេលឃាត់ខ្លួនសមត្ថកិច្ចបានដកហូតវត្ថុតាងដូចជា ១.អាវុធខ្លីជ័រប្រើហ្គាសមួយដើម ២.ប្រាក់ដុល្លាខ្មៅចំនួន១៥សន្លឹក ៣.ប្រាក់ដុល្លាចំនួន១០៨០ដុល្លារ ៤.ប្រាក់រៀលចំនួន២៥០០០រៀល
៥.ម៉ូតូមួយគ្រឿងម៉ាកSZ ពណ៌សក្រហម ពាក់ស្លាកលេខ ភ្នំពេញ1BW-8627 ៦.អត្តសញ្ញាណប័ណ្ណយោធា២សន្លឹក មានឈ្មោះ ឡូត ហេង និងឈ្មោះ សន ប៊ុនថេន។
សូមជម្រាបថា ទោះជាយ៉ាងណារឿងក្តីខាងលើនេះប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញលោកជំទាវ ថ្លាង ផាណែត នឹងធ្វើការប្រកាសសាលក្រមនៅរសៀលថ្ងៃទី១៦ខែវិច្ឆិកាឆ្នាំ២០១៨ខាងមុខនេះ៕
Source: Kampuchea Thmey Daily
0 Comments