កំពង់ចាម ៖ ជនសង្ស័យចំនួនពីរនាក់ ត្រូវជាបងថ្លៃ និងប្អូននឹងគ្នា ត្រូវកម្លាំងអធិការដ្ឋាននគរបាលស្រុកកងមាសចាប់ខ្លួន ពីបទរំលោភសេពសន្ថវៈលើនារីតែម្នាក់ បន្ទាប់ពីបែកធ្លាយរឿងអាស្រូវខាងលើនេះ ដោយសារជនសង្ស័យទាំងពីរនាក់នេះហួងហែងចង់ស៊ីនំគមក្មេងស្រីតែម្នាក់ឯង ដូចសុភាសិតថា ភ្នំមួយមិនអាចមានខ្លាពីរបានឡើយ។
ប៉ូលិសបានឲ្យដឹងថា នៅថ្ងៃទី១៨ ខែវិច្ឆិកា ឆ្នាំ២០១៨ មានប្រជាពលរដ្ឋឈ្មោះ (ភស) ភេទស្រី អាយុ៤២ឆ្នាំ នៅភូមិទី៥ ឃុំកងតាណឹង ស្រុកកងមាស ខេត្តកំពង់ចាម បានប្ដឹង សមត្ថកិច្ច នគរបាលស្រុក កងមាស ដោយចោទប្រកាន់ទៅលើមនុស្សចំនួនពីរនាក់មានឈ្មោះដូចខាងក្រោម ៖
ទី១.ឈ្មោះ ហ៊ីម សុខឃាង ភេទប្រុស អាយុ៤២ឆ្នាំ មុខរបរគ្រូបង្រៀន និងបើករកស៊ីវេរប្រាក់តាមវីង។ ទី២.ឈ្មោះ គ្រុយ លីហេង ភេទប្រុស អាយុ៤០ឆ្នាំ មុខរបរកសិករ ទាំងពីរនាក់មានទីលំនៅភូមិទី៥ឃុំកងតាណឹង ស្រុកកងមាស ខេត្តកំពង់ចាម។
យោងតាមពាក្យបណ្ដឹងបញ្ជាក់ថា នៅថ្ងៃទី១២ ខែសីហា ឆ្នាំ២០១៨ ម៉ោង១៥និង០០នាទី កូនស្រីរបស់គាត់ឈ្មោះ ( កញ) អាយុ១៦ឆ្នាំ បានទៅទិញកាតទូរស័ព្ទនៅផ្ទះឈ្មោះ ហ៊ីម សុខឃាង ត្រូវឈ្មោះនេះចាប់រំលោភសេពសន្ថវៈបានសម្រេចមួយដងនៅក្នុងបន្ទប់ក្រោមផ្ទះ ជាបន្ទប់បើកវីងផ្ញើប្រាក់ ហើយជនសង្ស័យបានគំរាមកូនស្រីរបស់គាត់ថា បើហ៊ាននិយាយប្រាប់អ្នកណា គេនឹងសម្លាប់ នាងចោល ដោយភ័យខ្លាច ទើបនាងមិនហ៊ានប្រាប់អាណាព្យាបាល។
អាណាព្យាបាលជនរងគ្រោះបានបន្តថា លុះដល់ថ្ងៃមិនចាំក្នុងខែកញ្ញា ឆ្នាំ២០១៨ វេលាម៉ោង១៥និង១០នាទី កូនស្រីរបស់គាត់ ឈ្មោះ (ក ញ) បានទៅយកសៀវភៅនៅផ្ទះឈ្មោះ គ្រុយ លីហេង ដែលកូនស្រីគេខ្ចីពីថ្ងៃមុន។
នៅពេលទៅដល់ផ្ទះខាងលើនេះ ស្រាប់តែត្រូវឈ្មោះ លី ហេង ចាប់រំលោភសេពសន្ថវៈរហូតបានសម្រេចចំនួនពីរដង។
ប្រភពព័ត៌មានពីកន្លែងកើតហេតុបានឲ្យដឹងថា ជនសង្ស័យទាំងពីរនាក់ ត្រូវជាបងថ្លៃ និងប្អូនប្អូនថ្លៃ ហើយអ្នកទាំងពីរហួងហែងនារីរងគ្រោះទុកជាទាសករ បម្រើតណ្ហារៀងៗខ្លួន។
ដោយចែកគ្នាមិនដាច់ ឈ្មោះហ៊ីម សុខឃាង ជាប្អូនថ្លៃ បានទម្លាយរឿងអាស្រូវនេះ ប្រាប់អាណាព្យាបាលរបស់នារីរងគ្រោះ តែអ្នកសាងអំពើអាក្រក់ អំពើអាក្រក់តែងតែទទួលផលអាក្រក់ គឺ អ្នកដែលទម្លាយរឿងអាស្រូវនេះក៏ត្រូវសមត្ថកិច្ចចាប់ខ្លួនដែរ។
ប៉ូលិសបានបញ្ជាក់ថា ក្រោយទទួលបណ្ដឹងខាងលើភ្លាម សមត្ថកិច្ចជំនាញស្រុក សហការជាមួយប៉ុស្តិ៍ ចុះដល់កន្លែងកើតហេតុ ធ្វើការស្រាវជ្រាវ និងបាននាំមុខសញ្ញាសង្ស័យទាំងពីរនាក់មកកាន់ស្នាក់ការប៉ុស្តិ៍ ដើម្បីសាកសួរ និងបំពេញសំណុំរឿងតាមនីតិវិធីច្បាប់៕
Source: Kampuchea Thmey Daily
0 Comments