ភ្នំពេញ ៖ សិលាចារិកលែងក្លាយទៅជាអាថ៌កំបាំងសម្រាប់ប្រជាជនកម្ពុជា យុវជនសម័យទំនើបទៀតហើយ ព្រោះកម្ពុជាបង្កើតឲ្យមាន” កម្មវិធីអូស៊ីអខ្មែរ និងអក្សរខ្មែរបុរាណក្នុងបច្ចេកវិទ្យាព័ត៌មាន” ក្រោមការឧបត្ថម្ភគាំទ្រថវិកាពីរាជរដ្ឋាភិបាលកម្ពុជាតាមរយៈរាជបណ្ឌិត្យសភាកម្ពុជា។
លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានមានប្រសាសន៍ថ្លែងអំណរគុណចំពោះរាជរដ្ឋាភិបាលកម្ពុជាដែលបានឧបត្ថម្ភដល់គម្រោងស្រាវជ្រាវ នៃរាជរដ្ឋាភិបាលកម្ពុជាដើម្បីរៀបចំសិក្ខាសាលាស្ដីពី ” កម្មវិធីអូស៊ីអខ្មែរ និង អក្សរខ្មែរបុរាណក្នុងបច្ចេកវិទ្យាព័ត៌មាន” ដែលជាប្រធានបទមួយដ៏មានសារៈសំខាន់ និងចាំបាច់ និងមានលក្ខណៈវិទ្យាសាស្ត្រ និងបច្ចុប្បន្នភាពដើម្បីពង្រីក និងពង្រឹង ភាសាអក្សរខ្មែរ ទាំងបុរាណ និងសម័យក្នុងវិស័យវិទ្យាសាស្ត្រ ជាពិសេសវិស័យបច្ចេកវិទ្យាព័ត៌មាន ក៏ដូចជាដើម្បីរួមចំណែកបំពេញតម្រូវការចាំបាច់បច្ចុប្បន្នរបស់អ្នកប្រើប្រាស់កុំព្យូទ័រក្នុង និងក្រៅប្រទេសកម្ពុជាតាមរយៈការបង្កើតពុម្ពអក្សរខ្មែរបុរាណ និងការបង្កើតកម្មវីធីអូស៊ីអខ្មែរសម្រាប់ស្គែនពុម្ពអក្សរខ្មែរសម័យទំនើប។
រាជបណ្ឌិត្យសភាកម្ពុជាបានសិក្សាគម្រោងស្រាវជ្រាវចំនួនពីរ គឺគម្រោង”ការបង្កើតសុសវែរ Khmer Intelligent OCR “និងគម្រោង”វចនានុក្រមភាសាខ្មែរបុរាណសម័យអង្គរតាមរយៈសិលាចារិកសតវត្សទី៩ ដល់ទី១៥” ដែលជារបកគំហើញថ្មី នៃស្នាដៃរបស់បណ្ឌិត មាឃ បូរ៉ា លោក បណ្ឌិត ឈិត វណ្ណឫទ្ធិ លោកបណ្ឌិត លឹម សេងឌី រួមនឹងសហការីមួយចំនួនទៀត។
គម្រោងទាំងពីរខាងលើនេះធ្វើការស្រាវជ្រាវឡើងក្នុងរយៈពេលមួយឆ្នាំ ក្រោមការឧបត្ថម្ភគាំទ្រថវិកាពីរាជរដ្ឋាភិបាលកម្ពុជា។
លោកបណ្ឌិតសភាចារ្យ សុខ ទូច បានបង្ហាញក្ដីរីករាយថា នេះគឺជាវិសាលភាពដ៏ធំមួយក្នុងប្រវត្តិសាស្ត្រខ្មែរ ដែលអ្នកវិទ្យាសាស្ត្របានផ្សារភ្ជាប់រវាងសម័យបុរាណមកសម័យទំនើប មានន័យថាមនុស្សសាមញ្ញ មិនចេះអក្សរភាសាបុរាណ ឬសិលាចារិកពីមុននោះ ក្លាយទៅជាអាចអានបានតាមរយៈពុម្ពអក្សរខ្មែរបុរាណថ្មីដែលទើបនឹងបង្កើតឡើងនេះ។
សិក្ខាសាលាស្ដីពី” កម្មវិធីអូស៊ីអខ្មែរ និង អក្សរខ្មែរបុរាណក្នុងបច្ចេកវិទ្យាព័ត៌មាន ”បានរៀបចំឡើងនាព្រឹកថ្ងៃទី០៦ ខែវិច្ឆិកា ឆ្នាំ២០១៨ នៅរាជបណ្ឌិត្យសភាកម្ពុជា ដោយមានការចូលរួមពីអ្នកស្រាវជ្រាវជាតិ និងអន្តរជាតិ វាគ្មិនកិត្តិយស ដើម្បីចែករំលែកចំណេះដឹង និងបទពិសោធន៍ដែលបានមកពីការស្រាវជ្រាវលើការបង្កើតកម្មវិធីអូស៊ីអខ្មែរ សម្រាប់អត្ថបទខ្មែរសម័យទំនើប និងពុម្ពអក្សរខ្មែរបុរាណក្នុងវិស័យបច្ចេកវិទ្យាព័ត៌មាន៕
Source: Kampuchea Thmey Daily
0 Comments