ភ្នំពេញ ៖ ថ្លែងក្នុងកិច្ចប្រជុំសម្រាប់រៀបចំការពារសន្តិសុខ សណ្តាប់ធ្នាប់ក្នុងឱកាសបុណ្យអុំទូកបណ្តែតប្រទីបសំពះព្រះខែនិងអកអំបុកកាលពីថ្ងៃទី១៦វិច្ឆិកា លោកនាយឧត្តមសេនីយ៍សន្តិបណ្ឌិតនេតសាវឿន បានថ្លែងថា យើងនឹងត្រៀមកម្លាំងការពារសណ្តាប់ធ្នាប់សន្តិសុខជាង១ម៉ឺន៣ពាន់នាក់ ទាំងកម្លាំងចម្រុះទាំងចំហ និង សម្ងាត់ ដើម្បីរៀបចំការពារសន្តិសុខ សណ្តាប់ធ្នាប់ក្នុងឱកាសបុណ្យអុំទូក។
លោកនាយឧត្តមសេនីយ៍ថ្លែងបែបនេះ នៅក្នុងកិច្ចប្រជុំរៀបចំការពារសន្តិសុខ សណ្តាប់ធ្នាប់ក្នុងឱកាសបុណ្យអុំទូកកាលពីថ្ងៃទី១៦ ខែវិច្ឆិកា ឆ្នាំ២០១៨នេះ នៅអគ្គស្នងការដ្ឋាននគរបាលជាតិ។ នេះបើតាមឧត្តមសេនីយ៍ ទូច ណារ៉ុថ អគ្គស្នងរងនគរបាលជាតិ និងជាប្រធាននាយកដ្ឋានអង្គរក្សបានថ្លែងប្រាប់អ្នកសារព័ត៌មានបន្ទាប់ពីអគ្គស្នងការនគរបាលជាតិបើកកិច្ចប្រជុំដើម្បីការពារសន្តិសុខសណ្តាប់ធ្នាប់ជូនដល់បងប្អូនប្រជាពលរដ្ឋក៏ដូចជាថ្នាក់ដឹកនាំក្រសួងក្នុងឱកាសបុណ្យអុំទូកនៅថ្ងៃ២១ដល់២៣ ខែវិច្ឆិកា ឆ្នាំ២០១៨ខាងមុខ។
ឧត្តមសេនីយ៍ ទូច ណារ៉ុថបានថ្លែងបន្តថា យើងនឹងត្រៀមកម្លាំងជាច្រើននាក់ទាំងចំហនិងសម្ងាត់ ក្នុងបុណ្យជាតិនេះ ខណៈព្រឹត្តិការណ៍នេះនឹងប្រព្រឹត្តទៅធំជាងឆ្នាំមុន ព្រោះឆ្នាំនេះគឺមានទូកសរុបប្រមាណ២៩៥ទូក និង កីឡាករអុំមានរហូតដល់ជិតពីរម៉ឺននាក់និងប្រទីប មានចំនួន១៥ចំណុះឲ្យស្ថាប័ននានាទូទាំងប្រទេស។
ជាមួយគ្នានោះ សមត្ថកិច្ច ក៏បានអំពាវនាវដល់បងប្អូនប្រជាពលរដ្ឋឲ្យមានការប្រុងប្រយ័ត្ន និងធ្វើការសហការជាមួយសមត្ថកិច្ចផងដែរដើម្បីឲ្យឱកាសបុណ្យនេះប្រព្រឹត្តិទៅប្រកបដោយសប្បាយរីករាយនិងសណ្តាប់ធ្នាប់ល្អគ្មានបញ្ហាអ្វីកើតឡើងនោះ។
នៅក្នុងកិច្ចប្រជុំដើម្បីត្រៀមការពារសន្តិសុខសណ្តាប់ធ្នាប់នេះដែរ លោកនាយឧត្តមសេនីយ៍សន្តិបណ្ឌិតនេត សាវឿន អគ្គស្នងការនគរបាលជាតិ និង ជាប្រធានអនុគណៈកម្មការការពាររក្សាសន្តិសុខរបៀបរៀបរយសណ្តាប់ធ្នាប់សង្គមចរាចរណ៍ និង សុខភាពក៏បានជំរុញ ដល់កងកម្លាំងទាំងអស់ត្រូវតែការពារឲ្យបានដាច់ខាតនៅសន្តិសុខនិងសណ្តាប់ធ្នាប់ក្នុងឱកាសបុណ្យនេះឲ្យបានល្អបំផុត និងត្រូវផ្តល់ព័ត៌មានផ្សេងៗដល់បងប្អូនប្រជាពលរដ្ឋឲ្យបានទាន់ពេលវេលាខណៈដែលមានមុខសញ្ញាណាមួយមិនប្រក្រតីនោះ៕
Source: Kampuchea Thmey Daily
0 Comments