កណ្តាល ៖ ក្រុមជនសង្ស័យពាក់ព័ន្ធជួញដូរថ្នាំញៀនចំនួន២នាក់ ត្រូវបានសមត្ថកិច្ចនគរបាលបង្ក្រាបបានកាលពីល្ងាចថ្ងៃទី១៥ ខែវិច្ឆិកា ឆ្នាំ២០១៨ នៅចំណុចក្នុងបរិវេណវត្តអង្គស្លែង ភូមិស្លែងឃុំជ្រៃលាស់ ស្រុកពញាឮ ខេត្តកណ្តាល ដែលកាលពីសប្តាហ៍មុននេះ ចាប់បានក្រុមជនល្មើសជួញដូរថ្នាំញៀនបានចំនួន៣នាក់ ដកហូតបានថ្នាំញៀន១៤កញ្ចប់។
ប៉ូលិសបានឲ្យដឹងថា ជនសង្ស័យចំនួន២នាក់ ដែលបានឃាត់ខ្លួននៅពេលនេះ១. ឈ្មោះ តន ថា ភេទប្រុស អាយុ៣១ឆ្នាំ ជនជាតិខ្មែរ មុខរបរកម្មករលីសែង មានទីលំនៅ ភូមិស្លែង ឃុំជ្រៃលាស់ ស្រុកពញាឮ ខេត្តកណ្តាល(គ្មានផ្ទុកនូវសារធាតុញៀនក្នុងទឹកនោមទេ)។ ២.ឈ្មោះ អ៊ឹម ម៉ៅ ភេទស្រី អាយុ៣៣ឆ្នាំ ជនជាតិខ្មែរ មុខរបរលក់នំក្មេងនៅតាមសាលារៀន មានទីលំនៅភូមិស្លែង ឃុំជ្រៃលាស់ ស្រុកពញាឮ ខេត្តកណ្តាល (គ្មានផ្ទុកសារធាតុញៀនក្នុងទឹកនោមទេ)។
នៅក្នុងការបង្ក្រាបនោះ សមត្ថកិច្ចដកហូតបាន សារធាតុញៀន ម៉េតំហ្វតាមីន(ice) ចំនួន ០២កញ្ចប់តូច ទម្ងន់០,៣៦ក្រាម និងឧបករណ៍ប្រើប្រាស់សារធាតុញៀន( ដបច្នៃជក់ថ្នាំចំនួន០២ រួមទាំង ម៉ូតូ ០១គ្រឿងម៉ាក គុប ស្លាកលេខ ផ2902ភព។
ប្រភពព័ត៌មានសមត្ថកិច្ច លោក វរសេនីយ៍ឯក ដួង តេង អធិការនគរបាលស្រុកពញាឮ បានមានប្រសាសន៍ថា នៅមុនថ្ងៃកើតហេតុ ខាងកម្លាំងសមត្ថកិច្ចផ្នែកជំនាញរបស់លោកបានទទួលព័ត៌មាន ពីកម្លាំងភ្នាក់ងារសម្ងាត់មកថា នៅត្រង់ចំណុចកើតហេតុ(ក្នុងនៅក្នុងបរិវេណវត្តអង្គស្លែង ភូមិស្លែងឃុំជ្រៃលាស់)មានមុខសញ្ញាជួញដូរគ្រឿងញៀន មកធ្វើសកម្មភាព។ ក្រោយពីទទួលបានព័ត៌មាននេះរួចមក កម្លាំងផ្នែកជំនាញបានធ្វើការសហការជាមួយកម្លាំងនគរបាលប៉ុស្តិ៍រដ្ឋបាលជ្រៃលាស់ បានចុះទៅដល់កន្លែងកើតហេតុសើបអង្កេត បានរកឃើញសកម្មភាពជនសង្ស័យឈ្មោះ អ៊ឹម ម៉ៅ កំពុងធ្វើសកម្មភាពជួញដូរគ្រឿងញៀនពិតមែន ទើបធ្វើការបង្ក្រាប ឃាត់ខ្លួនជនសង្ស័យរូបនេះខណៈឆែករកឃើញវត្ថុតាងជាក់ស្តែងថ្នាំញៀន០១កញ្ចប់តូច។
ប្រភពដដែលបានបញ្ជាក់ថា ជនសង្ស័យខាងលើបានសារភាពថា ថ្នាំញៀន០១ កញ្ចប់តូចនេះខ្លួនយកមកលក់ឲ្យគេក្នុងតម្លៃ២៥០០០រៀល។ គេបានបញ្ជាក់ថា ថ្នាំញៀននេះបានយកពីប្តីរបស់ខ្លួនឈ្មោះ តន ថា បន្ទាប់មកកម្លាំងសមត្ថកិច្ចបានបន្តស្រាវជ្រាវឃាត់ខ្លួនឈ្មោះ តន ថា ជាប្តីដោយឆែកឆេរ និងចាប់យកថ្នាំញៀនបានចំនួន០១ កញ្ចប់តូចទៀត រួមនិងឧបករណ៍សម្រាប់សេព(ដបជក់ថ្នាំញៀន)ចំនួន០២កំប្លេរផងដែរ។
ចំណែកឯជនសង្ស័យឈ្មោះតន ថា វិញបានសារភាពថា ថ្នាំញៀនដែលខ្លួនបានយកមកលក់ពេលកើតហេតុនេះ គឺបានទិញមកពីជនមិនស្គាល់ឈ្មោះ ជនជាតិវៀតណាម នៅព្រែកព្នៅ ផ្ទះលើបែរ តាមដងទន្លេ ខ្លួនទិញថ្នាំញៀនមកទុកគ្រាន់ប្រើប្រាស់ខ្លួនឯងទេ ប៉ុន្តែដោយមានក្មេងៗក្នុងភូមិ តែងតែសុំចែកទិញបន្ត ក៏លក់ចែកចាយបន្តទៅ។ បច្ចុប្បន្នជនសង្ស័យទាំង០២នាក់ បានឃាត់ខ្លួននៅអធិការដ្ឋាននគរបាលស្រុកពញាឮ បន្តចាត់ការតាមនីតិវិធី។
កាលពីសប្តាហ៍មុនសមត្ថកិច្ចនគរបាលស្រុកពញាឮ បានបង្ក្រាបក្រុមជួញដូរថ្នាំញៀនបានចំនួន៣នាក់ និង ដកហូតបានថ្នាំញៀនចំនួន១៤កញ្ចប់ធំនិងតូចនៅភូមិតាពេជ ឃុំឈ្វាំង បញ្ជូនទៅតុលាការចាត់ការតាមច្បាប់៕
Source: Kampuchea Thmey Daily
0 Comments