ភ្នំពេញ ៖ សាធារណរដ្ឋកូរ៉េបានជួយបណ្តុះបណ្តាលស្តីពីភាពជាអ្នកដឹកនាំនិងការអភិវឌ្ឍសេដ្ឋកិច្ចមូលដ្ឋានដល់មន្ត្រីរដ្ឋបាលជាន់ខ្ពស់រាជធានីខេត្តនៅកម្ពុជាដើម្បីលើកកម្ពស់សមត្ថភាពលើការដឹកនាំឲ្យកាន់តែមានប្រសិទ្ធភាពខ្ពស់ក្នុងការបម្រើសេវាសាធារណៈជួនប្រជាពលរដ្ឋឲ្យកាន់តែប្រសើរឡើង។
លោក ប៉ាក់ ចែ មីន នាយកវិទ្យាស្ថានអភិវឌ្ឍន៍មន្ត្រីរដ្ឋបាលមូលដ្ឋានមកពីប្រទេសកូរ៉េបានថ្លែងនៅក្នុងសិក្ខាសាលាមន្ត្រីរដ្ឋបាលជាន់ខ្ពស់ស្តីពីភាពជាអ្នកដឹកនាំនិងការអភិវឌ្ឍសេដ្ឋកិច្ចមូលដ្ឋានកាលពីព្រឹកថ្ងៃទី៦ ខែវិច្ឆិកា ឆ្នាំ២០១៨ នៅសណ្ឋាគារសាន់វ៉េ ឲ្យដឹងថា អ្នកជំនាញកូរ៉េនឹងធ្វើការបណ្តុះបណ្តាលដល់មន្ត្រីរដ្ឋបាលជាន់ខ្ពស់ថ្នាក់ជាតិនិងក្រោមជាតិទាក់ទិនទៅអភិបាលកិច្ចល្អ ស្វ័យភាពមូលដ្ឋាន ការអភិវឌ្ឍសហគមន៍មូលដ្ឋាននិងការអភិវឌ្ឍជនបទនិងចលនាភូមិថ្មីនៅកម្ពុជា។
លោកសង្ឃឹមថា តាមរយៈការបណ្តុះបណ្តាលជំនាញទាំងនេះនឹងជួយធ្វើឲ្យមានការអភិវឌ្ឍសេដ្ឋកិច្ចនៅតាមរាជធានីខេត្តប្រទេសកម្ពុជាកាន់តែរីកចម្រើនថែមទៀត។
លោក ង៉ាន់ ចំរើន រដ្ឋលេខាធិការក្រសួងមហាផ្ទៃបានមានប្រសាសន៍ថា វគ្គបណ្តុះបណ្តាលនេះនឹងជួយឲ្យមន្ត្រីរដ្ឋបាលជាន់ខ្ពស់មកពីក្រសួងមហាផ្ទៃនិងរដ្ឋបាលរាជធានីខេត្តមានចំណេះដឹងកាន់តែខ្ពស់ថែមទៀតពីការគ្រប់គ្រងនិងដឹកនាំក្នុងមូលដ្ឋានកាន់តែមានប្រសិទ្ធភាព តម្លាភាព គណនេយ្យភាព សមធម៌និងបរិយាប័ន្នសំដៅលើកកម្ពស់គុណភាពជីវិតរបស់ប្រជាពលរដ្ឋនៅមូលដ្ឋានឲ្យកាន់តែប្រសើរ។
លោកបានបន្តថា ជាងនេះទៅទៀតក៏ជួយឲ្យមន្ត្រីរដ្ឋបាលជាន់ខ្ពស់មានសមត្ថភាព មានទស្សនវិស័យ មានគំនិតច្នៃប្រឌិតក៏ដូចជាឆន្ទៈនិងការតាំងចិត្តខ្ពស់ក្នុងការគិតគូរពិចារណាអំពីការអភិវឌ្ឍសង្គមសេដ្ឋកិច្ចនៅមូលដ្ឋានរបស់ខ្លួនដើម្បីបង្កលក្ខណៈឲ្យប្រជាពលរដ្ឋអាចរស់នៅក្នុងជីវភាពកាន់តែធូរធារ ផាសុកភាពនិងសុវត្ថិភាពព្រមទាំងទទួលបានសេវាសង្គមសមស្របប្រកបដោយសមធម៌និងគណនេយ្យភាព។
លោកបានបន្ថែមទៀតថា កន្លងមកក្រសួងមហាផ្ទៃបានធ្វើការកំណែទម្រង់រដ្ឋបាលថ្នាក់ក្រោមជាតិតាមប្រព័ន្ធគ្រប់គ្រងរដ្ឋបាលបែបវិមជ្ឈការនិងសហវិមជ្ឈការដើម្បីផ្តល់ស្វ័យភាពដល់រដ្ឋបាលថ្នាក់ក្រោមជាតិនីមួ យៗដូចជាការផ្ទេរសិទ្ធិ អំណាចការទទួលខុសត្រូវនិងធនធានសមស្របក្នុងការអនុវត្តនូវមុខងារពាក់ព័ន្ធ សេវាសាធារណៈចាំបាច់នានាដើម្បីឆ្លើយតបនឹងតម្រូវការរបស់ប្រជាពលរដ្ឋ។
លោករដ្ឋលេខាធិការបានស្នើឲ្យសិក្ខាកាមទាំងអស់ត្រូវខិតខំសិក្សារៀនសូត្រពីវគ្គបណ្តុះបណ្តាលនេះនិងស្តាប់ការពន្យល់ពីសាស្ត្រាចារ្យកូរ៉េដើម្បីយកចំណេះដឹងទៅអនុវត្តបន្តនៅតាមមូលដ្ឋានរបស់ខ្លួនឲ្យបានល្អនិងកាន់តែរីកចម្រើនថែមទៀតសំដៅចូលរួមលើកស្ទួយជីវភាពរស់នៅរបស់ប្រជាពលរដ្ឋ។
គួរបញ្ជាក់ថា វគ្គបណ្តុះបណ្តាលស្តីពីភាពជាអ្នកដឹកនាំនិងការអភិវឌ្ឍសេដ្ឋកិច្ចមូលដ្ឋានដល់មន្ត្រីរដ្ឋបាលជាន់ខ្ពស់រាជធានីខេត្តនៅកម្ពុជានេះបន្ទាប់ពីក្រសួងមហាផ្ទៃកម្ពុជានិងក្រសួងមហាផ្ទៃនិងសុវត្ថិភាពកូរ៉េបានចុះអនុស្សរណៈនៃការយោគយល់រួមគ្នាមួយកាលពីឆ្នាំ២០១៧កន្លងទៅ៕
Source: Kampuchea Thmey Daily
0 Comments