ភ្នំពេញ ៖ ក្រសួងការងារ និងបណ្ដុះបណ្ដាលវិជ្ជាជីវៈ បានតម្រូវឲ្យថៅកែរោងចក្រសហគ្រាសនានា អនុញ្ញាតឲ្យកម្មករបានឈប់សម្រាកចំនួន៣ថ្ងៃ ដើម្បីបានទៅចូលរួមនៅក្នុងឱកាសពិធីបុណ្យអុំទូកបណ្ដែតប្រទីប អកអំបុក និងសំពះព្រះខែ ខាងមុខនេះ។
លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានណែនាំដល់ថៅកែរោងចក្រ ឬម្ចាស់សហគ្រាសគ្រឹះស្ថានការងារទាំងអស់ ត្រូវអនុញ្ញាតឲ្យកម្មករបានឈប់សម្រាកទៅចូលរួមពិធីបុណ្យអុំទូកបណ្ដែតប្រទីប អកអំបុក និងសំពះព្រះខែខាងមុខនេះដោយរក្សាទុកប្រាក់ឈ្នួល និងប្រាក់រង្វាន់ធ្វើការទៀងទាត់ដូចថ្ងៃធម្មតា។
តាមរយៈសេចក្ដីជូនដំណឹងរបស់ក្រសួងការងារ និងបណ្ដុះបណ្ដាលវិជ្ជាជីវៈកាលពីថ្ងៃទី០៥ ខែវិច្ឆិកាឆ្នាំ២០១៨ លោកបណ្ឌិត អ៊ិត សំហេង បានឲ្យដឹងថា «យោងតាមច្បាប់ស្ដីពីការងារ និងប្រកាសរបស់ក្រសួងស្ដីពីការឈប់សម្រាកថ្ងៃបុណ្យដែលត្រូវមានប្រាក់ឈ្នួលប្រចាំឆ្នាំ២០១៨ សូមលោកលោកស្រីអនុញ្ញាតឲ្យកម្មករនិយោជិតទាំងអស់របស់ខ្លួនបានឈប់សម្រាកដោយមានប្រាក់ឈ្នួលនៅក្នុងពិធីអុំទូកបណ្ដែតប្រទីប អកអំបុក និងសំពះព្រះខែខាងមុខនេះ ដើម្បីឲ្យពួកគេបានទៅចូលរួមសប្បាយនៅក្នុងពិធី»។
តែយ៉ាងណាក៏ដោយ លោកបណ្ឌិត អ៊ិត សំហេង បានអះអាងថា ប៉ុន្តែក្នុងករណីចាំបាច់បំផុតដែលសហគ្រាសគ្រឹះស្ថានមិនអាចបញ្ឈប់សកម្មភាពរបស់ខ្លួនបាននៅក្នុងឱកាសពិធីបុណ្យអុំទូកបណ្ដែតប្រទីប អកអំបុក និងសំពះព្រះខែខាងមុខនេះ ម្ចាស់និងសហគ្រាសគ្រឹះស្ថានត្រូវសម្របសម្រួលជាមួយកម្មករនិយោជិតឲ្យមានការស្ម័គ្រចិត្ត ព្រមទាំងបែងចែកឲ្យមានពេលវេលា និងថ្ងៃឈប់សម្រាកបុណ្យបានសមរម្យ។
លោកបណ្ឌិត អ៊ិត សំហេង បានបញ្ជាក់ថា កម្មករនិយោជិកដែលធ្វើការនៅក្នុងថ្ងៃឈបក្នុងព្រះរាជពិធីបុណ្យនេះមានសិទ្ធទទួលបាននូវប្រាក់បំណាច់បន្ថែមដែលមានចំនួនស្មើនឹងប្រាក់ឈ្នួលថ្ងៃធ្វើការធម្មតា។
រដ្ឋមន្ត្រីក្រសួងការងារសង្ឃឹមយ៉ាងមុតមាំថា ថៅកែ រោងចក្រ សហគ្រាស គ្រឹះស្ថានការងារទាំងអស់នឹងអនុវត្តឲ្យបានត្រឹមត្រូវតាមសេចក្ដីជូនដំណឹងនេះប្រកបដោយប្រសិទ្ធភាពខ្ពស់។
គួរបញ្ជាក់ថា ពិធីបុណ្យអុំទូកបណ្ដែតប្រទីប អកអំបុក និងសំពះព្រះខែនៅឆ្នាំនេះ នឹងប្រព្រឹត្តិទៅនៅថ្ងៃទី២១ ២១ និង២៣ ខែវិច្ឆិកា ឆ្នាំ២០១៨ខាងមុខនេះ៕
Source: Kampuchea Thmey Daily
0 Comments