តាកែវ ៖ ជនរងគ្រោះម្នាក់ បានស្លាប់បាត់បង់ជីវិតភ្លាមៗមួយរំពេច ព្រោះរថយន្តដឹកទំនិញស៊េរីចាស់មួយគ្រឿងឡើងចំណោតមិនរួច និងរអិលចុះក្រោមស្របពេលដែលគាត់នៅពីក្រោយរថយន្ត។
ករណីគ្រោះថ្នាក់ចរាចរណ៍នេះ កើតឡើងនៅវេលាម៉ោង១៥និង៣០នាទី ថ្ងៃទី០៥ ខែវិច្ឆិកា ឆ្នាំ២០១៨ លើផ្លូវលំក្រាលក្រួសក្រហមត្រង់ចំណុចភូមិចំបកទឹម ឃុំគីរីចុងកោះ ស្រុកគីរីវង់ ខេត្តតាកែវ រវាងរថយន្តនិងម៉ូតូដែលមានទិសដៅស្របគ្នា។
ប៉ូលិសជំនាញនៃអធិការដ្ឋាននគរបាលស្រុកគីរីវង់បានប្រាប់ថា រថយន្តបង្កម៉ាកហ៊ីយ៉ាន់ដាយ២តោនកន្លះពណ៌ខៀវ ពាក់ស្លាកលេខ ភ.ព៣ . ដ០១៤៦បើកបរពីជើងទៅត្បូង ចំណែកអ្នកបើកបរមិនស្គាល់អត្តសញ្ញាណនោះទេ ព្រោះក្រោយកើតហេតុ បានរត់គេចខ្លួនបាត់ស្រមោល។ ចំណែកម៉ូតូជនរងគ្រោះម៉ាកហុងដាវ៉េវពណ៌ខ្មៅ គ្មានស្លាកលេខ បើកបរដោយឈ្មោះ ទុយ ស្វាំង ភេទប្រុស អាយុ៦០ឆ្នាំ រស់នៅភូមិពោធិ៍ ឃុំព្រះបាទជាន់ជុំ ស្រុកគីរីវង់ ខេត្តតាកែវ មុខរបរកសិករ មិនពាក់មួកសុវត្ថិភាព បានស្លាប់នៅនឹងកន្លែងកើតហេតុ។ អ្នកឃើញហេតុការណ៍បានប្រាប់ដែរថា រថយន្តបង្កបានឡើងចំណោតមិនរួចនៅចំណុចផ្លូវទួល រួចក៏បានរអិលថយក្រោយកិនម៉ូតូនិងមនុស្សបណ្តាលឲ្យស្លាប់នៅនឹងកន្លែងតែម្តងទៅ។
ក្រោយកើតហេតុសមត្ថកិច្ចស្រុក បានចុះដល់ធ្វើកំណត់ហេតុ និងបានប្រគល់សពដល់ក្រុមគ្រួសារយកទៅធ្វើបុណ្យតាមប្រពៃណី ចំណែកវត្ថុតាងរថយន្តនិងម៉ូតូត្រូវបានដកហូតយកមករក្សាទុកនៅអធិការដ្ឋាននគរបាលស្រុកគីរីវង់ ដើម្បីកសាងសំណុំរឿងតាមនីតិវិធីច្បាប់៕
Source: Kampuchea Thmey Daily
0 Comments