ភ្នំពេញ ៖ ក្រុមបុរសញៀនល្បែងស៊ីសងចំនួន៥នាក់ ត្រូវបានសមត្ថកិច្ចនគរបាលខណ្ឌសែនសុខ បង្ក្រាបខណៈដែលពួកគេកំពុងនាំគ្នាបញ្ជល់មាន់ភ្នាល់ដាក់លុយ កាលពីល្ងាចថ្ងៃអាទិត្យ ទី១៨ ខែវិច្ឆិកា ឆ្នាំ២០១៨ នៅភូមិទំនប់ សង្កាត់ភ្នំពេញថ្មី ខណ្ឌសែនសុខ។
សមត្ថកិច្ចបានឲ្យដឹងថា នៅមុនពេលឃាត់ខ្លួនពួកគេ មានប្រជាពលរដ្ឋល្អបានរាយការណ៍មកថា នៅចំណុចកើតហេតុមានបុរសមួយក្រុមកំពុងនាំគ្នាបញ្ជល់មាន់ ភ្នាល់ដាក់លុយ ហើយថា ចំណុចនោះតែងតែមានការបញ្ជល់មាន់ភ្នាល់ដាក់លុយយ៉ាងដូច្នេះញឹកញយណាស់ ដែលនោះជាអំពើល្មើសច្បាប់។
ប្រភពដដែលបានបញ្ជាក់ថា ក្រោយពេលទទួលបានព័ត៌មាននេះភ្លាម សមត្ថកិច្ចក៏បានបញ្ជូនកម្លាំងសម្ងាត់ឲ្យទៅស៊ើបការណ៍មើល រកឃើញថាទីនោះពិតជាមានសកម្មភាពលេងល្បែងស៊ីសង បញ្ជល់មាន់ខុសច្បាប់ពិតមែន ទើបបញ្ជូនកងកម្លាំងទៅឆ្មក់បង្ក្រាបតែម្ដង។
នៅក្នុងការបង្ក្រាបនោះ សមត្ថកិច្ចបានឃាត់ខ្លួនមនុស្សប្រុសចំនួន៥នាក់ នៅក្នុងរង្វង់ទីតាំងលេងល្បែងស៊ីសងនោះ និងរឹបអូសបានវត្ថុតាងមួយចំនួនដូចជា មាន់គកមួយគូ ជញ្ជីងសម្រាប់ថ្លឹង ខ្នាយដែក និងលុយខ្មែរជាង១១ម៉ឺនរៀល និងលុយអាមេរិកចំនួន២១៥ដុល្លារទៀត។
ក្រុមជនដែលពាក់ព័ន្ធ ត្រូវបានឃាត់ខ្លួនទាំង៥នាក់ខាងលើ ១.ឈ្មោះ ង្វៀង វ៉ាងយ៉ាង អាយុ៣៥ឆ្នាំ ជនជាតិយួន មានទីលំនៅភូមិសាមគ្គី ខណ្ឌឫស្សីកែវ។ ២.ឈ្មោះ លឹម ឈុនហ៊ី អាយុ៣៣ឆ្នាំ មានទីលំនៅភូមិចម្ការឪឡឹក សង្កាត់កាកាប ខណ្ឌពោធិ៍សែនជ័យ។ ៣.ឈ្មោះ ហាន់ ទូច អាយុ៣៤ឆ្នាំ ទីលំនៅភូមិបាយ៉ាប។ ៤.ឈ្មោះ ឡឹង សុខណាត អាយុ៣២ឆ្នាំ មានទីលំនៅភូមិភ្នំពេញថ្មី សង្កាត់ភ្នំ
ពេញថ្មី ខណ្ឌសែនសុខ។ ៥.ឈ្មោះ ផន ប៊ុនធឿន អាយុ៣៥ឆ្នាំ មានទីលំនៅភូមិជម្រៅ សង្កាត់គោករកា ខណ្ឌព្រែកព្នៅ។
ប៉ូលិសបានឃុំខ្លួនពួកគេជាបណ្ដោះអាសន្ន និងបន្ត បញ្ជូនទៅតុលាការដោយសារវាជាអំពើខុសច្បាប់ក្នុងការបើកល្បែងស៊ីសងនេះ ហើយនៅក្នុងករណីបង្ក្រាបនេះ ក៏មានបញ្ជាពីមន្ត្រីតុលាការអនុញ្ញាតឲ្យបង្ក្រាបដែរ ដូច្នេះអំណាចគ្រប់គ្រងច្បាប់ពាក់ព័ន្ធបទល្មើសនេះតុលាការជាអ្នកសម្រេចសេចក្ដី៕
Source: Kampuchea Thmey Daily
0 Comments