ភ្នំពេញ ៖ កម្ពុជា-ចិនបានរួមគ្នាលើកកម្ពស់ពង្រឹងកិច្ចសហប្រតិបត្ដិការ និងការផ្លាស់ប្ដូរវិស័យទេសចរណ៍ប្រទេសទាំងពីរឲ្យកាន់តែរីកចម្រើនថែមទៀតពិសេសរវាងទីក្រុងភ្នំពេញនិងទីក្រុងណាននីងខេត្តក្វាងស៊ីប្រទេសចិន។
ថ្លែងក្នុងពិធីជួបជុំផ្សព្វផ្សាយទេសចរណ៍ណាននីងកាលពីរសៀលថ្ងៃទី ១៦ខែវិច្ឆិកានៅសណ្ឋាគារសុខាលោក Cai Zhizhong អគ្គលេខាធិការរងនៃរដ្ឋាភិបាលទីក្រុងណាននីង ខេត្ដក្វាងស៊ីនៃប្រទេសចិនបានឲ្យដឹងថា កិច្ចប្រជុំផ្សព្វផ្សាយទេសចរណ៍ណាននីងនេះ គឺដើម្បីបង្ហាញពីសក្តានុពលវិស័យទេសចរណ៍នៅទីក្រុងណាននីងដល់បណ្តាក្រុមហ៊ុនទេសចរកម្ពុជាក៏ដូចជាជំរុញឲ្យប្រជាពលរដ្ឋកម្ពុជាបានទៅកំសាន្តនិងមើលពីទេសភាពដ៏ស្រស់ត្រកាលនៅទីក្រុងណាននីងផងដែរ។
លោកសង្ឃឹមថា តាមរយៈកិច្ចសហប្រតិបត្តិការយ៉ាងសកម្ម និង ការផ្លាស់ប្តូរវិស័យទេសចរណ៍នៃប្រទេសទាំងពីរប្រជាជននៃប្រទេសទាំងពីរអាចរីករាយនឹងធនធានទេសចរណ៍ដ៏សម្បូរបែប និង ស្រស់ស្អាតរបស់គ្នាទៅវិញទៅមក។
គួរបញ្ជាក់ថា ទីក្រុងណាននីងនិងភ្នំពេញបានសហការគ្នាទៅលើវិស័យទេសចរណ៍វប្បធម៌ និង សេដ្ឋកិច្ច ក៏ដូចជាការដោះដូរពាណិជ្ជកម្មកាន់តែមានភាពជិតស្និទ្ធខ្លាំងឡើងដោយពីភ្នំពេញទៅណាននីងចំនួនភ្ញៀវទេសចរបានកើនឡើងជាបន្តបន្ទាប់ពីមួយឆ្នាំទៅមួយឆ្នាំ ហើយរាជធានីភ្នំពេញបានក្លាយជាប្រភពដ៏សំខាន់មួយនៃភ្ញៀវទេសចរ ដែលបានមកទស្សនានៅណាននីង។
ដើម្បីបង្កើនការយល់ដឹងអំពីស្ថានភាពបច្ចុប្បន្ននៃវិស័យទេសចរណ៍របស់ទីក្រុងណាននីងនិងក្នុងឧស្សាហកម្មទេសចរណ៍និងព័ត៌មានក្នុងទីក្រុងភ្នំពេញទីក្រុងណាននីងបានរួមបញ្ចូលផលិតផលទេស ចរណ៍ណាននីងទៅតាមតម្រូវការទេសចរណ៍របស់ភ្ញៀវទេសចររាជធានីភ្នំពេញ និង បានបើកដំណើរការផ្លូវទេសចរណ៍ ដែលមានគុណភាពខ្ពស់ជាពិសេសសម្រាប់ភ្ញៀវទេសចរ។
បច្ចុប្បន្នក្រុងណាននីងបានបើកជើងហោះហើរអន្តរជាតិចំនួន ២៥ ទៅកាន់បណ្តាប្រទេសអាស៊ានចំនួន១០ ក្នុងនោះមានផ្លូវអាកាសចំនួន ៣ដែលហោះចេញពីណាននីងទៅកាន់កម្ពុជាគឺណានីងទៅកាន់ភ្នំពេញ សៀមរាប និង ព្រះសីហនុ។
លោក សូ ម៉ារ៉ា អនុរដ្ឋលេខាធិការក្រសួងទេសចរណ៍ បានស្វាគមន៍ចំពោះកិច្ចសហប្រតិបត្តិការលើវិស័យទេសចរទីក្រុងណាននាពេលនេះហើយសន្យាថានឹងជំរុញអ្នកទេសចររបស់កម្ពុជាទៅកម្សាន្ដទីក្រុងណាននីងឲ្យកាន់តែច្រើន។
ជាមួយគ្នានេះដែរ លោកបានស្នើឲ្យគណៈប្រតិភូទេសចរណាននីងធ្វើការផ្លាស់ប្តូរទៅវិញទៅមករវាងក្រុមហ៊ុនទេសចរនិងអ្នកសារព័ត៌មានដើម្បីបានផ្សព្វផ្សាយពីវិស័យទេសចររបស់ទីក្រុងណាននីងក៏ដូចជាប្រទេសកម្ពុជាដល់ប្រជាពលរដ្ឋទាំងពីរបានដឹងកាន់តែទូលំទូលាយ។
លោកបានបញ្ជាក់ថា ដើម្បីបម្រើសេចក្ដីត្រូវរបស់ ភ្ញៀវទេសចរណ៍ចិន និងជំរុញកិច្ចសហការផ្នែកទេសចរណ៍ក្នុងក្របខណ្ឌខ្សែក្រវាត់ និងវិថីសូត្រ ក្រសួងទេសចរណ៍បានរៀបចំយុទ្ធសាស្ដ្រទាក់ទាញភ្ញៀវទេសចរណ៍ឆ្នាំ២០១៦-២០២០ជាពិសេស បានដាក់ចេញនូវសៀវភៅសរ ស្ដីពីការអភិវឌ្ឍទេសចរណ៍ចិនផងដែរ។
លោកបានបន្ដឲ្យដឹងទៀតថា យុទ្ធសាស្ត្រនេះគឺវាស្របជាមួយនឹងផែនការយុទ្ធសាស្ដ្រអភិវឌ្ឍន៍ទេសចរណ៍អាស៊ានឆ្នាំ២០១៦-២០២៥ និងគ្រោងបង្កើតនៅមជ្ឈមណ្ឌលកម្ពុជា-ចិនសម្រាប់ការអភិវឌ្ឍទេសចរណ៍ចិនព្រោះថា រាជរដ្ឋាភិបាលបានចាត់ទុកទីផ្សារទេសចរណ៍ចិន គឺជាទេសចរណ៍ដ៏ធំ ដែលមានសក្ដានុពលសម្រាប់ទេសចរណ៍នៅប្រទេសកម្ពុជាខណៈនៅឆ្នាំ២០២០ខាងមុខនេះកម្ពុជានឹងត្រៀមទទួលភ្ញៀវទេសចរចិនយ៉ាងតិចបំផុត៣លាន៣សែន ។
លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការ នៃរដ្ឋលេខាធិការដ្ឋានអាកាសចរស៊ីវិលកម្ពុជា បានឲ្យដឹងថា អាកាសយានដ្ឋានកម្ពុជា មានការតភ្ជាប់ជើងហោះហើរ ទៅកាន់ទីក្រុងនៃប្រទេសចិនដោយបច្ចុប្បន្នមាន២៨គោលដៅ ចេញពីអាកាសយានដ្ឋានអន្ដរជាតិទាំង៣ រួមមាន១៦គោលដៅចេញពី អាកាសយានដ្ឋានសៀមរាប ទៅប្រទេសចិន, ១២គោលដៅចេញពីអាកាសយានដ្ឋានអន្ដរជាតិភ្នំពេញ និង១២គោលដៅ និងចេញពីអាកាសយានដ្ឋានអន្ដរជាតិព្រះសីហនុ សរុបមកជើងហោះហើរចំនួន៣៤៣ជើង ក្នុង១សប្ដាហ៍ ដែលប្រតិបត្តិដោយក្រុមហ៊ុនអាកាសរចណ៍ក្នុងស្រុក៦ និងក្រុមហ៊ុនអាកាសចរណ៍អន្ដរជាតិចំនួន១០ ។
លោក ស៊ូម៉ារ៉ាបានឲ្យដឹងថា ឆ្នាំ២០១៨នេះចំនួនភ្ញៀវទេសចរចិននឹងមកកម្សាន្ដនៅប្រទេសកម្ពុជា ប្រមាណជិត២លាន់នាក់ហើយចំនួននេះនឹងកើនឡើងដល់៣លាន៣សែននាក់នៅឆ្នាំ២០២០ខាងមុខនេះ។
គួរបញ្ជាក់ថា នៅក្នុងកិច្ចប្រជុំលើកកម្ពស់ទេសចរណ៍នៅណាននីងនោះដែរ នាយកដ្ឋានទេសចរណ៍ទីក្រុងណាននីងក៏បានចុះហត្ថលេខាលើលិខិតស្នើសុំកិច្ចសហប្រតិបត្តិការយុទ្ធសាស្ត្រទេសចរណ៍ជាមួយ សមាគមទេសចរកម្ពុជាCATA ផងដែរ៕
Source: Kampuchea Thmey Daily
0 Comments