សៀមរាប ៖ ការជក់បារី ផ្ដល់ផលវិបាកយ៉ាងច្រើនដល់សុខភាព អ្នកជក់បារីនឹងក្លាយជាញៀនបារីយ៉ាងឆាប់រហ័សដោយសារនីកូទីន និងអាចបណ្តាលឲ្យស្លាប់ និងមានជំងឺធ្ងន់ធ្ងរជាច្រើន ដែលបណ្តាលឲ្យមានការប្រឈមនឹងការស្លាប់មុនអាយុ។
ក្នុងពិធីប្រកាសរដ្ឋបាលក្រុងសៀមរាបគ្មានផ្សែង នាព្រឹកថ្ងៃទី០៦ ខែវិច្ឆិកា ឆ្នាំ២០១៨ នៅសាលាក្រុងសៀមរាប លោក សូ ប្លាតុង អភិបាលក្រុងសៀមរាប បានថ្លែងថា ផ្សែងបារី ដែលជាសារធាតុញៀនមួយដែលធ្វើឲ្យអ្នកជក់បារីកាន់តែចង់ជក់បារីថែមទៀត។
ក្រសួងសុខាភិបាលកំពុងស្វែងរកកិច្ចសហការពីបណ្ដាក្រសួងស្ថាប័នរដ្ឋនានា ចូលរួមបង្កើតកន្លែងធ្វើការគ្មានផ្សែងបារី នៅគ្រាដែលរដ្ឋាភិបាលក៏បានជំរុញឲ្យមានការអនុវត្តវិធានការនេះឲ្យបាននៅទូទាំងប្រទេស។ ការចូលរួមបង្កើតទីកន្លែងធ្វើការក្នុងស្ថាប័នរបស់ខ្លួនគ្មានផ្សែងបារី ជាប្រយោជន៍ចូលរួមកាត់បន្ថយភាពក្រីក្ររបស់ពលរដ្ឋ។
លោកបានបន្តថា ផលិតផលថ្នាំជក់បង្កគ្រោះថ្នាក់ធ្ងន់ធ្ងរដល់ទាំងអ្នកជក់ និងអ្នកស្រូបផ្សែងបារីពីគេ។ ថ្នាំជក់ជាឃាតកលាក់មុខ ហើយវាជាឧបសគ្គ នៃការអភិវឌ្ឍប្រទេស។ ទីក្រុងគ្មានផ្សែងបារី គឺសំដៅដល់ការហាមមិនឲ្យជក់បារីនៅកន្លែងដែលមានដំបូល ក្រៅពីកន្លែងដែលមានដំបូល អ្នកជក់មានសិទ្ធិជក់។
ដោយឡែក កន្លែងមួយចំនួនដូចជា សាលារៀន វត្តអារាម រមណីយដ្ឋានប្រវត្តិសាស្ត្រ គ្រឹះស្ថានសុខាភិបាល សួនកុមារ កន្លែងងាយឆាបឆេះ ជាដើម ត្រូវបានហាមឃាត់មិនឲ្យជក់ក្នុងបរិវេណទាំងស្រុង។
សូមបញ្ជាក់ថា ក្នុងបណ្ដាប្រទេសអាស៊ាន មានទីក្រុងជាច្រើនដែលបានប្រកាសថា ទីក្រុងគ្មានផ្សែងបារី រួចហើយ ដូចជា ទីក្រុងម៉ាឡាកា ទីក្រុងប៉េណាំង ប្រទេសម៉ាឡេស៊ី វៀងចន្ទន៍ ហ្លួងប្រាបាង ខេត្តចំប៉ាសាក់ ប្រទេសឡាវ ទីក្រុងហាយឡុង ហ៊័យអាន ប្រទេសវៀតណាម ខេត្តក្រាបី ប្រទេសថៃ ទីក្រុងម៉ាកាទី ក្រុងអីឡូអីឡូ ប្រទេសហ្វីលីពីន ជាដើម។
គួរឲ្យដឹងផងដែរថា ក្រសួងសុខាភិបាលព្រមានផាកពិន័យក្រុមហ៊ុនផលិតផលថ្នាំជក់ ដែលមិនអនុវត្តតាមច្បាប់ស្ដីពីការត្រួតពិនិត្យផលិតផលថ្នាំជក់ អនុក្រឹត្យស្ដីពីការបោះពុម្ពសារព្រមានសុខភាពជាភាសាខ្មែរ និងជារូបភាពលើកញ្ចប់ផលិតផលថ្នាំជក់ ទំហំ៥៥% បានចូលជាធរមាន តាំងពីថ្ងៃទី២២ ខែកក្កដា ឆ្នាំ២០១៦។
ក្រសួងសុខាភិបាល ក៏បានព្រមានដល់ក្រុមហ៊ុនផលិតផលថ្នាំជក់ទាំងអស់ កុំឲ្យបន្តរំលោភច្បាប់ទៀត។ ក្នុងករណីមិនគោរពលិខិតព្រមាននេះ ក្រសួងសុខាភិបាល នឹងធ្វើការផាកពិន័យក្រុមហ៊ុនផលិតផលថ្នាំជក់ដែលល្មើសទាំងនេះ ដូចមានចែងក្នុងច្បាប់ស្ដីពីការត្រួតពិនិត្យផលិតផលថ្នាំជក់ជាធរមាន។
បើតាមការស្រាវជ្រាវបានឲ្យដឹងថា ការជក់បារីអាចបណ្ដាលឲ្យស្ទះផ្លូវដង្ហើម រលាកទងសួត កើតរោគមហារីក និងការចុះខ្សោយផ្លូវភេទជាដើម។
ក្រៅពីនេះ ការជក់បារីអាចធ្វើឲ្យអ្នកគេងមិនលក់ បាយមិនបាន ឆាប់ហេវហត់អស់កម្លាំង និងកាត់បន្ថយអាយុផងដែរ។ ចំពោះស្ត្រីមានផ្ទៃពោះវិញ ការជក់បារីអាចបណ្ដាលឲ្យទារកកើតមិនគ្រប់ខែ ឬស្លាប់ និងបង្កគ្រោះថ្នាក់ចំពោះម្ដាយ។ ជាតិនីកូទីននៅក្នុងថ្នាំជក់ អាចបណ្ដាលឲ្យត្បៀតសរសៃឈាមក្នុងទងសុក ដែលធ្វើឲ្យបរិមាណអុកស៊ីហ្សែនផ្គត់ផ្គង់ទៅគភ៌មានការថយចុះ ជាហេតុបង្កហានិភ័យយ៉ាងខ្លាំងក្នុងពេលទារកប្រសូត។ បារីគ្មានប្រយោជន៍ចំពោះសុខភាពនោះទេ គឺមានតែផលប៉ះពាល់ម្យ៉ាងប៉ុណ្ណោះ៕
Source: Kampuchea Thmey Daily
0 Comments