ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិបានអះអាងថា សំណង់វិមានឈ្នះឈ្នះ ជាមរតកវប្បធម៌ និងប្រវត្តិសាស្ត្រ ហើយមិនគ្រាន់តែជាមជ្ឈមណ្ឌលបង្ហាញពីវប្បធម៌បុរាណ ដូចជាប្រាង្គប្រាសាទជាដើមប៉ុណ្ណោះទេ ប៉ុន្តែវាជាឃ្លាំងស្តុកនូវឯកប្រវត្តិសាស្ត្រស្តីពីនយោបាយឈ្នះឈ្នះរបស់សម្តេចតេជោទៀតផង ពោលគឺខុសពីប្រាង្គប្រាសាទផ្សេងៗ។
សម្តេចពិជ័យសេនា ទៀ បាញ់ មានប្រសាសន៍បែបនេះ ខណៈចូលរួមធ្វើបាឋកថា នៅក្នុងសិក្ខាសាលាស្តីពីចក្ខុវិស័យក្នុងការកសាងវិមានឈ្នះឈ្នះ "ព្រឹត្តិការណ៍បង្កើតព្រឹត្តិការណ៍" ដែលធ្វើឡើងនៅវិមានសន្ដិភាព កាលពីព្រឹក ថ្ងៃទី០៦ ខែវិច្ឆិកា ឆ្នាំ២០១៨។
ថ្លែងទៅកាន់អង្គសិក្ខាសាលានាព្រឹកនោះ សម្តេចពិជ័យសេនា ទៀ បាញ់ បានលើកឡើងថា សំណង់វិមានឈ្នះឈ្នះនេះ ជាមរតកវប្បធម៌ និងប្រវត្តិសាស្ត្រ មិនគ្រាន់តែជាមជ្ឈមណ្ឌលបង្ហាញពីវប្បធម៌បុរាណ ដូចជាប្រាង្គប្រាសាទកោះកេរ អង្គរវត្ត បាយ័ន ជាដើមប៉ុណ្ណោះទេ ប៉ុន្តែវាជាឃ្លាំងស្តុកនូវឯកប្រវត្តិសាស្ត្រស្តីពីនយោបាយឈ្នះឈ្នះទៀតផង។ ពោល គឺខុសពីប្រាង្គប្រាសាទផ្សេងៗ ពីព្រោះវិមានឈ្នះឈ្នះតម្កល់សុទ្ធតែឯកសារប្រវត្តិសាស្ត្ររបស់សម្តេចតេជោ ហ៊ុន សែន និងកិច្ចការទាំងអស់ ដែលសម្តេចបានធ្វើក្នុងសម័យថ្មី។ វាស្របទៅនឹងគោលនយោបាយឈ្នះឈ្នះ ដែលយើងបានឃើញ។
តាមសម្តេចពិជ័យសេនា ទៀ បាញ់ វិមានឈ្នះឈ្នះ ជានិមិត្តរូបនៃការពង្រឹងនូវការអនុវត្តក្នុងសង្គមខ្មែរ ក្លាយទៅជាអ្នកមានជីវភាពសម្បូរបែប ហើយទាំងអស់នេះ ក៏ដោយសាមនុញ្ញផលនៃនយោបាយឈ្នះឈ្នះ ដែលបាននាំមកនូវសុខសន្តិភាព និងផ្តល់ឱកាស ដែលទាំងនេះ គឺជាសញ្ញានៃការពង្រឹងការអនុវត្តនៅក្នុងសង្គមខ្មែរ។ សម្តេចពិជ័យសេនាបន្តថា តាមគំរោង ដែលបានគ្រោងទុក ដែលមាននៅក្នុងប្លង់មេ វិមានឈ្នះឈ្នះ ត្រូវបានចែកជា៣តំបន់ គឺតំបន់ទី១បង្ហាញពីសុខដុមនីយកម្មក្នុងប្រវត្តិសាស្ត្រខ្មែរ តំបន់ទី២ គឺសន្តិភាពពេញលេញតាមរយៈនយោបាយឈ្នះឈ្នះ និងតំបន់ទី៣ សាមគ្គីផលនានា ដែលទទួលបានពីនយោបាយឈ្នះឈ្នះ ចាប់ពីឆ្នាំ១៩៩៨ រហូតដល់ឆ្នាំ២០១៨ ហើយតំបន់ទាំងនេះត្រូវបានកសាងឡើង ដោយមានការចូលរួមពីគ្រប់មជ្ឈដ្ឋាន ទាំងធនធាន គំនិត និងប្រាជ្ញា របស់មន្ត្រីរាជការ កងកំលាំងប្រដាប់អាវុធ និងព្រះសង្ឃជាដើម។
សូមបញ្ជាក់ថា វិមានឈ្នះឈ្នះ បានបើកការដ្ឋានសាងសង់ នៅថ្ងៃទី២៥ ខែកុម្ភៈ ឆ្នាំ២០១៦ ក្រោមអធិបតីភាពសម្ដេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ នៅផ្ទៃដីចំនួន១៥ហិកតា ដែលមានកម្ពស់វិមានចំនួន៥៤ម៉ែត្រ ស្ថិតនៅក្នុងតំបន់អភិវឌ្ឍន៍លីយ៉ុងផាត់ ក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ហើយគ្រោង នឹងសម្ពោធនៅថ្ងៃទី២៩ ខែធ្នូ ឆ្នាំ២០១៨ខាងមុខនេះ ក្រោមវត្តមានដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយនឹងពិព័រណ៍ចំនួនបីថ្ងៃផងដែរ។
ការកសាងវិមានឈ្នះឈ្នះនេះ គណៈកម្មការសាងសង់ ដែលដឹកនាំដោយសម្ដេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានរៀបចំនូវទម្រង់ និងខ្លឹមសារជាច្រើន សម្រាប់បង្ហាញនូវនិមិត្តរូបក៏ដូចជាអត្តសញ្ញាណជាតិ និងព្រលឹងរបស់ជាតិសម្រាប់បង្ហាញជាប្រវត្តិសាស្ត្រ នៅសក្ខីកម្មនៃសន្តិភាព និងសុខដុមនីយភាព និងការអភិវឌ្ឍប្រទេសជាតិ ក្រោយទទួលបានសន្តិភាពទាំងស្រុង បន្ទាប់ពីបញ្ចប់សង្គ្រាមស៊ីវិលរយៈពេលជាច្រើនទសវត្សរ៍មក៕
Source: Kampuchea Thmey Daily
0 Comments