ប្រទេសរុស្ស៊ីបាននិយាយកាលពីថ្ងៃអាទិត្យថា កិច្ចចរចានាពេលខាងមុខស្តីពីការដោះស្រាយជម្លោះជាមួយប្រទេសជប៉ុនលើប្រជុំកោះមួយដែលទាមទារដោយទីក្រុងតូក្យូគឺនឹងមិនមានលទ្ធដែលក្រុងមូស្គូនឹងត្រូវលះបង់ប្រជុំកោះនេះទេ។
អ្នកនាំពាក្យវិមានក្រឹមឡាំងលោក Dmitry Peskov បាននិយាយប្រាប់ទូរទស្សន៍រុស្ស៊ីក្នុងការលើកឡើងដែលរាយការណ៍ដោយភ្នាក់ងារ TASS ថា “តើអ្នកអាចនិយាយបានទេថា នេះមានន័យថាជាការប្រគល់ទឹកដីមួយចំនួនដោយស្វ័យប្រវត្តិឬ? ពិតជាមិនមែនទេ”។
ជម្លោះជុំវិញប្រជុំកោះ Kuril គឺបានកើតឡើងតាំងពីចុងបញ្ចប់នៃសង្គ្រាមលោកលើកទី២មកម្ល៉េះនៅពេលដែលការកាត់យករបស់ពួកគេដោយសហភាពសូវៀតត្រូវបានបញ្ជាក់នៅក្នុងសន្ធិសញ្ញាសន្តិភាពរវាងមហាអំណាចដែលទទួលបានជ័យជំនះហើយទទួលយកដោយជប៉ុន។
យ៉ាងណាក្តី ក្រុងតូក្យូបានអះអាងថា កោះមួយចំនួនដែលខ្លួនសំដៅទៅលើដែនដីភាគខាងជើងរបស់ខ្លួនគឺមិនមាននៅក្នុងកិច្ចព្រមព្រៀងនោះទេហើយគួរតែត្រូវប្រគល់ត្រឡប់មកឲ្យវិញ។
កាលពីសប្តាហ៍មុន ប្រធានាធិបតីរុស្ស៊ីលោក Vladimir Putin និងមេដឹកនាំជប៉ុនលោក Shinzo Abe បានឯកភាពគ្នានៅប្រទេសសិង្ហបុរីដើម្បីពន្លឿនកិច្ចចរចាស្តីពីកោះចំនួន៤។
សេចក្តីថ្លែងការណ៍រួមឆ្នាំ១៩៥៦បាននិយាយអំពីកោះត្រឹមតែពីរប៉ុណ្ណោះហើយត្រូវបានលុបចោលដោយសហភាពសូវៀតក្នុងឆ្នាំ១៩៦០បន្ទាប់ពីប្រទេសជប៉ុនបានចុះកិច្ចព្រមព្រៀងសហប្រតិបត្តិការមួយជាមួយសហរដ្ឋអាមេរិកក្នុងអំឡុងសង្គ្រាមត្រជាក់។
អ្នកនាំពាក្យម្នាក់នៃក្រសួងការបរទេសជប៉ុនបាននិយាយកាលពីសប្តាហ៍មុនថា លោក Abe នឹងធ្វើដំណើរទៅប្រទេសរុស្ស៊ីនៅដើមឆ្នាំក្រោយនេះសម្រាប់កិច្ចចរចា៕ AFP
Source: Kampuchea Thmey Daily
0 Comments