ក្រុមបាល់ទាត់សមាជិកក្នុងលីគកំពូលកម្ពុជា (Metfone Cambodian League) មួយចំនួនបានចាប់ផ្តើមប្រមូលផ្តុំកូនហ្វឹកហាត់ និងប្រកួតមិត្តភាពកម្តៅសាច់ដុំបណ្តើរៗ ហើយដើម្បីត្រៀមខ្លួនទទួលរដូវកាលថ្មីឆ្នាំ២០១៩ខាងមុខ។
ចំពោះក្រុមភ្នំពេញក្រោន ដែលទើបតែងតាំងគ្រូបង្វឹកថ្មី បានប្រកួតឈ្នះលើក្រុមម្ចាស់ផ្ទះគីរីវង់សុខសែនជ័យ ដោយលទ្ធផល៥ទល់១ នៅថ្ងៃសៅរ៍ ទី១៧ ខែវិច្ឆិកា ថ្មីៗនេះលើទីលានកីឡដ្ឋានគីរីវង់ ក្នុងក្រុងដូនកែវ។ នេះជាប្រកួតលើកទី២របស់ក្រុមភ្នំពេញក្រោន ខណៈកាលប្រកួតដំបូងកាលពីចុងសប្ដាហ៍មុន បានប្រកួតចាញ់ក្រុមក្រសួងការពារជាតិ ៣ទល់១ លើទីលានកីឡដ្ឋាន RSN Stadium របស់ខ្លួន។
ចំណែកប្រកួត១គូទៀតនឹងធ្វើឡើងនៅវេលាម៉ោង៣រសៀល ថ្ងៃអង្គារ ទី២០ ខែវិច្ឆិកា ឆ្នាំ២០១៨ នេះក្រុមបឹងកេតអែហ្វស៊ី ដែលជាក្រុមជើងឯករងឆ្នាំចាស់បានណាត់ក្រុមជើងឯកណាហ្គាវើល ប្រកួតមិត្តភាពផងដែរ ដោយប្រកួតនេះធ្វើឡើងនៅកីឡដ្ឋានអគ្គីសនីកម្ពុជា ក្នុងទឹកដីទួលសង្កែ។ ទស្សនិកជនអាចចូលរួមទស្សនាការប្រកួតនេះបានដោយសេរី ផងដែរ។ ចំពោះណាហ្គាវើល មានបេសកកម្មត្រូវត្រៀមប្រកួតក្នុងពានរង្វាន់លីគលំដាប់ទី២ប្រចាំទ្វីបអាស៊ី AFC Cup នៅឆ្នាំ២០១៩ខាងមុខក្នុងនាមជាក្រុមជើងឯកលីគកំពូលកម្ពុជា។
សូមបញ្ជាក់ថា ក្រុមដែលជាសមាជិកពានរង្វាន់លីគកំពូលកម្ពុជា បានចាប់ផ្តើមប្រមូលផ្តុំកីឡាករឡើងវិញក្រោយសម្រាកមួយរយៈបន្ទាប់ពីបញ្ចប់បេសកកម្មក្នុងរដូវកាលចាស់ ហើយនេះជាដំណាក់កាលដែលក្រុមទាំងអស់ត្រូវតាមដាននិងត្រួតពិនិត្យសមត្ថភាពកូនក្រុមរបស់ខ្លួនឡើងវិញទាំងសមាជិកចាស់ និងសមាជិកថ្មីៗទាំងខ្មែរនិងបរទេស ឬកីឡាករខ្លះទើបតែជ្រើសរើសចេញពីក្រុមថ្នាលយុវជន ព្រមទាំងកីឡាករមួយចំនួនដែលកំពុងស្ថិតក្នុងដំណាក់កាលធ្វើតេស្តសាកល្បងមុននឹងសម្រេចបញ្ចូលពួកគេទៅក្នុងក្រុមឈុតធំ ឬ យ៉ាងណានោះ មុនរដូវកាលឆ្នាំ២០១៩ មកដល់៕
Source: Kampuchea Thmey Daily
0 Comments