​មុន​ថ្ងៃ​បោះឆ្នោត​ ៖ អាមេរិក​ព្រមាន​អ្នកបោះឆ្នោត​ដែល​មើល​ព័ត៌មាន​ក្លែងក្លាយ​របស់​រុស្ស៊ី​

ទីភ្នាក់ងារ​អនុវត្ត​ច្បាប់​និង​ភ្នាក់ងារ​ស៊ើបការណ៍​សហរដ្ឋអាមេរិក​បាន​និយាយ​មុន​ថ្ងៃ​បោះឆ្នោត​ពាក់កណ្តាល​អាណត្តិ​ដ៏​សំខាន់​របស់​អាមេរិក​ថា ពួកគេ​មិនមាន​ការបង្ហាញ​អំពី​កិច្ចខិតខំ​ប្រឹងប្រែង​ដើម្បី​រំខាន​ដល់​ហេដ្ឋារចនាសម្ព័ន្ធ​នៃ​ការបោះឆ្នោត​ទេ ​ប៉ុន្តែ​ថា ជនជាតិ​អាមេរិក​គួរតែ​ប្រុងប្រយ័ត្ន​ចំពោះ​ការប៉ុនប៉ង​របស់​រុស្ស៊ី​ក្នុងការ​ផ្សព្វផ្សាយ​ព័ត៌មាន​ក្លែងក្លាយ​។​
​
សេចក្តីប្រកាស​នេះ​បាន​ធ្វើឡើង​ប៉ុន្មាន​ថ្ងៃ​បន្ទាប់ពី​ការស្រាវជ្រាវ​ថ្មី​មួយ​បាន​រកឃើញថា ព័ត៌មាន​មិន​ពិត​លើ​ប្រព័ន្ធ​ផ្សព្វផ្សាយ​សង្គម​បាន​រីក​រាលដាល​ក្នុង​អត្រា​ខ្ពស់ជាង​អំឡុងពេល​នៃ​ការបោះឆ្នោត​ប្រធានាធិបតី​ឆ្នាំ​២០១៦​ដែល​ប្រទេស​រុស្ស៊ី​ត្រូវ​រង​ការចោទប្រកាន់ថា​បាន​ប្រើ​យុទ្ធនា​ការឃោសនា​ដ៏​ធំ​មួយ​ដើម្បី​គាំទ្រ​ដល់​លោក Donald Trump​។​
​
សេចក្តីថ្លែងការណ៍​រួមមួយ​របស់​រដ្ឋមន្ត្រីក្រសួង​សន្តិសុខ​ដែនដី​លោកស្រី Kirstjen Nielsen, អគ្គមេធាវី​លោក Jeff Sessions, នាយក​ផ្នែក​ស៊ើបការណ៍​ជាតិ​លោក Dan Coats និង​នាយក​ភ្នាក់ងារ FBI លោក Christopher Wray បាន​និយាយថា “​នៅពេលនេះ យើង​មិនមាន​ការចង្អុលបង្ហាញ​អំពី​ការធ្វើ​ឲ្យ​ខូច​ដល់​ហេដ្ឋារចនាសម្ព័ន្ធ​នៃ​ការបោះឆ្នោតជាតិ​របស់​យើង​ដែល​នឹង​រារាំង​ការបោះឆ្នោត ផ្លាស់ប្តូរ​ការរាប់​សន្លឹក​ឆ្នោត​ឬ​រំខាន​ដល់​លទ្ធភាព​នៃ​ការបោះឆ្នោត​ទេ​”​។​
​
សេចក្តីថ្លែងការណ៍​ដដែល​បាន​បន្តថា “​ប៉ុន្តែ​ប្រជាជន​អាមេរិក​គួរតែ​យល់​ដឹងថា តួអង្គ​បរទេស​ជាពិសេស​រុស្ស៊ី​កំពុង​ព្យាយាម​បន្ត​ដាក់​ឥទ្ធិពល​លើ​មនោសញ្ចេតនា​សាធារណៈ​និង​ការយល់ដឹង​របស់​អ្នកបោះឆ្នោត​តាមរយៈ​សកម្មភាព​ដែល​មានបំណង​សាបព្រោះ​ភាពមិន​ចុះសម្រុង​”​។​
“​ពួកគេ​អាច​ធ្វើដូច្នេះបាន​ដោយ​ផ្សព្វផ្សាយ​ព័ត៌មាន​ក្លែងក្លាយ​អំពី​ដំណើរការ​នយោបាយ​និង​បេក្ខជន​ដោយនិយាយ​កុហក​អំពី​សកម្មភាព​ជ្រៀតជ្រែក​របស់​ពួកគេ ផ្សព្វផ្សាយ​ព័ត៌មាន​ឃោសនា​លើ​ប្រព័ន្ធ​ផ្សព្វផ្សាយ​សង្គម​និង​តាមរយៈ​យុទ្ធសាស្ត្រ​ផ្សេងទៀត​”​។​
“​សាធារណៈជន​អាមេរិក​អាច​កាត់បន្ថយ​កិច្ចខិតខំ​ប្រឹងប្រែង​ទាំងនេះ​ដោយ​រក្សា​ព័ត៌មាន​ហើយ​រាយការណ៍​សកម្មភាព​គួរ​ឲ្យ​សង្ស័យ​និង​ការយកចិត្តទុកដាក់​ដ​ល់​អ្នកប្រើប្រាស់​ព័ត៌មាន​”​។​
​
ក្រុម​អ្នកស្រាវជ្រាវ​នៅ​វិទ្យាស្ថាន​អ៊ីនធឺណិត Oxford បាន​និយាយ​ក្នុងការ​សិក្សា​មួយ​ដែល​បញ្ចេញ​កាលពី​ថ្ងៃ​ព្រហស្បតិ៍​មុន​ថា បើទោះបីជា​មានការ​បង្ក្រាប​យ៉ាងខ្លាំង​ក្លា​ពី​សំណាក់​ក្រុមហ៊ុន​ប្រព័ន្ធ​ផ្សព្វផ្សាយ​សង្គម​ក៏ដោយ ព័ត៌មាន​មិន​ពិត​ឬ​គេ​ហៅថា “junk news” កំពុង​រីក​រាលដាល​ក្នុង​អត្រា​ខ្ពស់ជាង​កាលពី​ឆ្នាំ​២០១៦​លើ​ប្រព័ន្ធ​ផ្សព្វផ្សាយ​សង្គម​មុន​ការបោះឆ្នោត​ពាក់កណ្តាល​អាមេរិក​៕ AFP

​

Source: Kampuchea Thmey Daily