លួច​រថយន្ត​ពី​ស្រុក​ជើងព្រៃ​ ភ័យ​ពេក​បុក​រថយន្ត​២​គ្រឿង​ ត្រូវ​អស់​លក្ខណ៍

កំពង់ចាម​ ៖​ កម្លាំង​អធិការដ្ឋាន​នគរបាល​ក្រុង​ បាន​ឃាត់​ខ្លួន​ជន ​សង្ស័យ​ម្នាក់​ បន្ទាប់ពី​បាន​ធ្វើ​សកម្មភាព​លួច​រថយន្ត​ពី​ ស្រុក​ជើងព្រៃ ខេត្ត​កំពង់ចាម​ ហើយ​បើក​មកដល់​ក្រុង​កំពង់ចាម​ ក៏​បើក​បុក​និង​កៀរ​រថយន្ត​ចំនួន​២​គ្រឿង​ហើយ ​ក៏​ជ្រុល​ឡើង​ខឿន​សួនច្បារ ​ផ្លូវ​ភ្លោះ​បុក​គល់​ដូង​ជាប់​គាំង​ទៅមុខ​លែង​រួច និង​នាំ​ខ្លួន​មក​អធិការដ្ឋាន​នគរបាល​ក្រុង​ដើម្បី​បំពេញ​សំណុំ​ឯកសារ​តាម​នីតិវិធី។

លោក​ស៊ាម យូ​សេង អធិការរង​នគរបាល​ក្រុង​កំពង់ចាម បាន​ឲ្យ​ដឹង​ថា គ្រោះថ្នាក់​ចរាចរ​នេះ​បានកើត​ឡើង​នៅ​ថ្ងៃទី១៧ ​ខែ​វិច្ឆិកា ​​ឆ្នាំ​២០១៨​វេលា​ម៉ោង​៧​និង​២៥​នាទី​ ចំណុច​មុខ​សាលារៀន​វាលវង់​ចាស់ ស្ថិត​ក្នុង​ភូមិ​ទី៤ ​សង្កាត់​វាលវង់​ក្រុង​កំពង់ចាម។

លោក​អធិការ​រង​ដដែល​បាន​បន្ត​ថា គ្រោះថ្នាក់​ចរាចរណ៍​​នេះ​ បង្ក​ឡើង​រវាង​រថយន្ត​ម៉ាក ​ធុន​ដ្រា​​ ស្លាក​លេខ​ភ្នំពេញ​2AA.1886 បើកបរ​ដោយ​ឈ្មោះ ជា វ៉ាន់ឌី ហៅ​ទី ភេទ​ប្រុស​អាយុ​៣១​ ឆ្នាំ​នៅ​ភូមិ​ទី​៥ សង្កាត់​វាលវង់ ក្រុង​កំពង់ចាម ខេត្ត​កំពង់ចាម​ បាន​បើក​មក​បុក​រថយន្ត​ម៉ាក​ធុន​ដ្រា​ ស្លាក​លេខ ភ្នំពេញ​2AI .8485 ចត​ឈប់​ស្ងៀម​របស់​ឈ្មោះ វ៉ា ពេជ្រ ភេទ​ប្រុស អាយុ​៤៤ឆ្នាំ នៅ​ភូមិ​ទី​៩ ​សង្កាត់​វាលវង់ ក្រុង កំពង់ចាម ខេត្ត​កំពង់ចាម។

ប៉ូលិស​បាន​បន្ត​ថា បន្ទាប់មក​រថយន្ត​បង្ក​ បាន​បើក​ប៉ះ​ជាមួយ​រថយន្ត​ម៉ាក វី​ហ្ហ្គោ​ហ៊ី​លុច ពណ៌​ទឹកប្រាក់ ស្លាក​លេខ ភ្នំពេញ​2X.6858 ដែល​ចត​ឈប់​ស្ងៀម​ជា​របស់​ឈ្មោះ អ៊ា​ម ម៉ូ​វ​ហ៊ាង ភេទ​ប្រុស​អាយុ 43​ឆ្នាំ នៅ​ភូមិ​ទី​4 សង្កាត់​វាលវង់ ក្រុង​កំពង់ចាម ខេត្ត​កំពង់ចាម។

ប៉ូលិស បាន​បន្ត​ថា ក្រោយពេល​កើតហេតុ​រថយន្ត​ម៉ាក​ធុន​ដ្រា បង្ក​​មិន​ឈប់​នៅ​កន្លែង​កើតហេតុ​ទេ គឺ បាន​បើករថយន្ត​រត់គេច ទៅ​ឡើងលើ សួនច្បារ​ភ្លោះ​ មុខ​ធនាគារ​ចាស់ ទើប​ឈប់។ ប៉ូលិស​បាន​បន្ត​ថា​ គ្រោះថ្នាក់​នេះ ​បណ្ដាល​ឲ្យ​ខូចខាត​រថយន្ត​3​គ្រឿង កម្រិត​ស្រាល និង​បាក់​ដើម​ស្លា​២​ដើម។

ក្រោយពេល​កើតហេតុ ផ្នែក​ជំនាញ​ចរាចរណ៍​ ក្រុង​កំពង់ចាម​បាន​យក​អ្នកបើកបរ និង​វត្ថុ​តាង មក​អធិការដ្ឋាន​នគរបាល​ក្រុង កំពង់ចាម ហើយ​ធ្វើការ​ស្រាវជ្រាវ ទើប​យើង​បានដឹងថា រថយន្ត​ម៉ាក​ធុន​ត្រា ស្លាក​លេខ ភ្នំពេញ 2AA.1886​ដែល​ឈ្មោះ ផល ឈួង ភេទ ប្រុស​អាយុ​៣៣​ឆ្នាំ មាន​ទីលំនៅ ភូមិ​ស្គន់ ឃុំ​សូ​ទឹប ស្រុក​ជើងព្រៃ ខេត្ត​កំពង់ចាម ​ដែល​ត្រូវ​ឈ្មោះ​ជា វ៉ាន់ឌី ហៅ​ទី​លួច​ និង​បើក​បង្ក​ឲ្យ​មាន​គ្រោះថ្នាក់ ចរាចរ​នេះ។

ម្ចាស់​រថយន្ត លោក ផល ឈួ​ង បាន​បញ្ជាក់​ថា​ នៅ​យប់​ថ្ងៃ​កើតហេតុ​ លោក​បាន​យក​រថយន្ត ធុន​ដ្រា​ខាង​លើ​នេះ ​ទៅ​ផ្ញើ​​ទុក​នៅផ្ទះ ​បងប្រុស​បង្កើត​ឈ្មោះ ផល ណា​រិ​ទ្ធ ភេទ​ប្រុស​ អាយុ​៣៥​ឆ្នាំ នៅ​ភូមិ ស្តើងជ័យ ឃុំ​សូ​ទឹប ស្រុក ជើងព្រៃ ដែល​មាន​ចម្ងាយ​ ប្រហែល​៥​គីឡូម៉ែត្រ​ពី​ផ្ទះ​របស់​ខ្លួន។

លោក​ផល ឈួ​ង ​បាន​បន្ត​ថា ​លុះ​ព្រឹក​ឡើង​ថ្ងៃ​ទី​១៧​ ខែ​វិច្ឆិកា ​​ឆ្នាំ​២០១៨​ បងប្រុស​របស់​លោក​ទូរស័ព្ទ​ប្រាប់​ថា​ឈ្មោះ ទី បាន​លួច​យក​ឡាន​នេះ​ជិះ​សំដៅ​មក​ខេត្ត​កំពង់ចាម​ហើយ។

លោក​ផល ឈួ​ង ​បាន​ប្រាប់​ថា នៅ​ព្រឹក​ថ្ងៃ​កើតហេតុ បងប្រុស​របស់​គាត់​ បាន​ទុក​សោ​ឡាន​នៅ​ក្នុង​ម៉ូតូ​កង់​៣​ ហើយក៏​ដើរចូល​ក្នុង​បន្ទប់ទឹក​ នៅ​ពេល​ចេញ​មកវិញ ស្រាប់តែ​ឃើញ​ឈ្មោះ​ទី ​បើកឡាន​នេះ​ ចេញ​ដោយ​លោក​មិនបាន​ប្រគល់​សោ​​រថយន្ត​ទេ ហើយ​ឈ្មោះ ទី ក៏បាន​បង្ករ​គ្រោះថ្នាក់​ចរាចរ​បែបនេះ។

ប៉ូលិស​បាន​បញ្ជាក់​ថា ករណី​នេះ ផ្នែក​ជំនាញ​ចរាចរណ៍​ និង​ផ្នែក​ជំនាញ​ព្រហ្មទណ្ឌ​ក្រុង​កំពង់ចាម​កំពុង​កសាង​សំណុំរឿង​តាម​នីតិវិធី៕



Source: Kampuchea Thmey Daily