ភ្នំពេញ ៖ បុរសម្នាក់ បានរងរបួសដាច់ប្រអប់ជើងឆ្វេងម្ខាង ជ្រុះនៅកណ្ដាលថ្នល់ ហើយសន្លប់ឈឹងមួយរំពេច បន្ទាប់ពីជិះម៉ូតូលឿនពេក ហើយរថយន្តបង្ក ក៏បើកលឿនដូចគ្នា បានជ្រុលទៅបុកម៉ូតូជនរងគ្រោះចំកណ្ដាលទ្រូងផ្លូវ ចំផ្នែកចំហៀងខាងឆ្វេង សូម្បីតែម៉ូតូក៏ខ្ទេចមើលមិនយល់ដែរ។
ហេតុការណ៍នេះ បានកើតឡើង កាលពីវេលាម៉ោង១០និង៤០នាទីយប់ ថ្ងៃទី១៦ ខែវិច្ឆិកា ឆ្នាំ២០១៨តាមបណ្ដោយផ្លូវជាតិលេខ៤ ទល់មុខវត្តកំបូល ស្ថិតនៅភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ។
រថយន្តបង្កម៉ាកតូយ៉ូតាព្រូស ពណ៌កណ្ដុរល្មេះ ពាក់ស្លាកលេខភ្នំពេញ 2AU -5783 បើកបរដោយបុរសម្នាក់ ទិសដៅពីកើតទៅលិច ក្នុងល្បឿនយ៉ាងលឿន តៃកុងរត់គេចខ្លួនបាត់។
ចំណែកម៉ូតូរងគ្រោះ ពណ៌ខ្មៅលាយស មើលមិនស្គាល់ថាម៉ាកអីទេ ដោយសាររមូរខ្ទេចទាំងស្រុង តែដឹងថាពាក់ស្លាកលេខ ភ្នំពេញ 1HG- 3193 បើកបរដោយបុរសម្នាក់ ទិសដៅពីលិចទៅកើត បញ្ច្រាសទិសគ្នារងរបួសធ្ងន់ដាច់ជើងខាងឆ្វេងម្ខាង សន្លប់ស្ដូកស្ដឹង នៅកន្លែងកើតហេតុ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញម៉ូតូរងគ្រោះបើកបរធ្វើដំណើរក្នុងទិសដៅពីលិចទៅកើត ក្នុងល្បឿនលឿន បន្ទាប់មកក៏ស្រាប់តែមានរថយន្តមួយគ្រឿងម៉ាកតូយ៉ូតាព្រូស បើកបរក្នុងទិសដៅពីកើតទៅលិច បញ្ច្រាសទិសគ្នា ក្នុងល្បឿនលឿនដូចគ្នាដែរ ហើយបានបុកគ្នាពេញទំហឹងចំកណ្ដាលទ្រូងផ្លូវ ចំកង់រថយន្តផ្នែកខាងឆ្វេង បណ្ដាលឲ្យជនរងគ្រោះដាច់ជើងខាងឆ្វេងម្ខាង ជ្រុះនៅកណ្ដាលផ្លូវ។
ប្រភពបន្តថា ពេលនោះម៉ូតូជនរងគ្រោះបានខ្ទាតទៅផ្នែកខាងស្ដាំរបស់ខ្លួន និងបណ្ដាលឲ្យរងការខូចខាតខ្ទេចទាំងស្រុង រកតែមើលម៉ាកក៏ពុំស្គាល់ផង។
ចំណែកឯតៃកុងរថយន្តបង្ក ដោយឃើញជនរងគ្រោះរងរបួសធ្ងន់ពេក បានចុះពីលើរថយន្តគេចខ្លួនបាត់ស្រមោល ។
ជនរងគ្រោះ ត្រូវបានរថយន្តសាមុយឯកជនសម្ភពសុធារិទ្ធបែកចាន ដឹកយកទៅសង្គ្រោះភ្លាមៗផងដែរ តែដោយជនរងគ្រោះរងរបួសធ្ងន់ធ្ងរពេក ដោយមន្ទីរពេទ្យមួយនេះ មិនមានសមត្ថភាពព្យាបាល ព្រោះពេទ្យនេះទទួលព្យាបាលតែរបួសណាស្រាលៗ ស្រួលយកលុយតែប៉ុណ្ណោះ ទើបបញ្ជូនបន្ដទៅកាន់មន្ទីរពេទ្យព្រះកុសុមៈដើម្បីព្យាបាល។
ក្រោយពេលកើតហេតុ សមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានចុះមកធ្វើការវាស់វែងយករថយន្ត និងម៉ូតូ ទៅរក្សាទុក ដើម្បីរង់ចាំដោះស្រាយគ្នានៅពេលក្រោយ៕
Source: Kampuchea Thmey Daily
0 Comments