បាត់ដំបង ៖ ប៉ុន្មានខែចុងក្រោយនេះ គេសង្កេតឃើញថា ការបាក់ស្រុតនៅចំណុចក្បាលស្ពានវត្តគរ ត្រើយខាងកើត កាន់តែមានសន្ទុះលឿនឡើងៗ ថែមទាំងបាក់មកដល់ខឿនក្បាលស្ពានតែម្តង ដែលស្ពាននេះស្ថិតក្នុងភូមិវត្តតាមិម ឃុំអូរដំបង១ ស្រុកសង្កែ ដែលតភ្ជាប់ពីខេត្តបាត់ដំបង ទៅកាន់ ខេត្តប៉ៃលិនតាមបណ្តោយផ្លូវជាតិលេខ ៥៧។
ស្ពានវត្តគរ គឺជាស្ពានមួយដែលកសាងឡើងដោយមូលនិធិ របស់រាជរដ្ឋាភិបាលព្រមទាំងបានបើកអោយប្រជាពលរដ្ឋប្រើប្រាស់អស់រយៈពេលរាប់សិបឆ្នាំមកហើយ ម្យ៉ាងវិញទៀតស្ពាននេះក៏បានបម្រើអោយវិស័យសេដ្ឋកិច្ចដ៏សំខាន់ផងដែរ ពីខ្សែបន្ទាត់ព្រំដែន កម្ពុជា ថៃ។
ប៉ុន្តែនៅរយៈពេលប៉ុន្មានឆ្នាំចុងក្រោយនេះ ក្បាលស្ពានត្រើយខាងកើត បានចាប់ផ្តើមបាក់ស្រុតយ៉ាងដំណំ គួរអោយកត់សម្គាល់ និងធ្វើអោយមានការព្រួយបារម្ភថែមទៀតផង ដោយសារតែបន្ទុកនៃការជួសជុល ត្រូវធ្លាក់ទៅលើមន្ទីរសាធារណការ និងដឹកជញ្ជូនខេត្ត ជាអ្នកទទួលខុសត្រូវ។
ប៉ុន្តែទន្ទឹម នឹង ការបាក់ស្រុតគួរអោយភ័យខ្លាចនេះដែរ ខាងមន្ទីរជំនាញ ហាក់ដូចជាមានការប៉កល្វើយ ដោយគេច្រើនប្រើភាសាថា មិនទាន់មានកញ្ចប់ថវិកាសម្រាប់ជួសជុល ដោយគេរង់ចាំមើលខាងក្រសួងជាអ្នកសម្រេចដូច្នេះមានតែទុកបណ្តោយតាមយថាកម្មតែប៉ុណ្ណោះ។
ថ្មីៗនេះ គេឃើញកម្លាំងមន្ទីរជំនាញបានដាក់គ្រឿងចក្រចុះមកកាន់ទីតាំងខាងលើ ដោយធ្វើការឈូសឆាយ និងចាក់ដីបំពេញបន្ថែមដើម្បីជួសជុលទៅតាមជំនាញ ប៉ុន្តែបើតាមការអះអាងពីប្រជាពលរដ្ឋដែលរស់នៅម្តុំនោះបាននិយាយថា នេះមិនទាន់ដល់រដូវទឹកជំនន់ផង គឺអ្នកចាក់ដីពីលើចេះតែចាក់ទៅ ឯទំហំនៃការបាក់ស្រុតចេះតែបន្តស្រុតចុះបន្ថែមទៀតដដែល ដែលពួកគាត់មិនដឹងថា ជំនាញដាក់កម្លាំងវិស្វករ និងបាន សិក្សាដល់កម្រិតណានោះទេអំពីបញ្ហានេះ ។
ហើយនៅប៉ុន្មានថ្ងៃនេះ ឮថាមានការប្រកាសប្រធានមន្ទីរសាធារណការថ្មី អោយចូលកាន់តំណែង ដូច្នេះគេកំពុងរង់ចាំមើលថា តើសមត្ថកិច្ចអាចមានពេញលេញដូចលោកប្រធានមន្ទីរចាស់ គឺលោក ខាន់ ម៉ាណេ ដែរឬទេ ? ដោយលោកប្រធានមន្ទីរចាស់ ត្រូវបានផ្លាស់ប្តូរទៅក្រសួងវិញ។
បច្ចុប្បន្នទាំងប្រជាពលរដ្ឋ ក៏ដូចជាអាជ្ញាធរមូលដ្ឋាន កំពុងរង់ចាំមើលថា តើការស្ថាបនានេះ អាចមានគុណភាពជាប់រហូតដែរឬទេ ឬមួយក៏ល្អតែសំបកក្រៅក៏មិនទាន់ដឹងថា ព្រោះវិសាលភាពនៃការបាក់ស្រុតមានទំហំធំធេង៕
Source: Kampuchea Thmey Daily
0 Comments