បន្ទាយមានជ័យ ៖ អ្នកបើករថយន្តដឹកដីស្ទើរភ្លើងម្នាក់ ឡើងទៅដឹកដីនៅលើភ្នំភ្លាត់ស្នៀតក្រឡាប់រថយន្តធ្លាក់ពីលើភ្នំសង្កត់ពីលើបណ្ដាលឲ្យស្លាប់យ៉ាងអាណោចអាធ័ម កាលពីព្រឹកថ្ងៃទី០៥ ខែវិច្ឆិកា ឆ្នាំ២០១៨ ស្ថិតនៅភូមិទ្រយោង ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។
លោកវរសេនីយ៍ត្រី ស៊ិន រ៉ាស៊ី មេបញ្ជាការមូលដ្ឋានកងរាជអាវុធហត្ថស្រុកព្រះនេត្រព្រះបានប្រាប់អ្នកយកព័ត៌មានឲ្យដឹងថា ជនរងគ្រោះមានឈ្មោះ ឃ្លុញ លីស៊ី ភេទប្រុស អាយុ៣០ឆ្នាំ រស់នៅភូមិទ្រយោង ឃុំភ្នំលាភ ស្រុកព្រះនេត្រព្រះ ខេត្តបន្ទាយមានជ័យ។
លោកបានបញ្ជាក់ឲ្យដឹងទៀតថា នៅមុនពេលកើតហេតុនោះ ជនរងគ្រោះបានបើករថយន្តដឹកដីនៅលើភ្នំទ្រយោង លុះបើកទៅដល់លើភ្នំ រង់ចាំម៉ៃខូកាយដីដាក់រថយន្តពេញ មិនពន្លត់ម៉ាស៊ីន ស្រាប់តែរថយន្តរអិលធ្លាក់ពីលើភ្នំក្រឡាពីលើអ្នកបើកបណ្ដាលឲ្យស្លាប់ភ្លាមៗមួយរំពេច។
ក្រោយពីកើតហេតុ ត្រូវបានម៉ៃខូកកកាយយកសពពេញពីក្រោមរថយន្ត ហើយដឹកសពយកមកផ្ទះដើម្បីឲ្យក្រុមគ្រួសារយកទៅធ្វើបុណ្យតាមប្រពៃណីនៅផ្ទះសពតែម្ដង។
គួរបញ្ជាក់ផងដែរថា ភ្នំត្រយោងនៅស្រុកព្រះនេត្រព្រះនេះ ត្រូវបានឈ្មួញលួចកាយដីធ្វើអាជីវកម្មលក់យ៉ាងអាធិបតេយ្យ ដោយពុំបានសុំច្បាប់ពីអស់លោកណាឡើយ ហើយសព្វថ្ងៃនេះ ភ្នំមួយដ៏សែនធំត្រូវគេកាយដីលក់ស្ទើរតែរាបដល់ដី និងប្រហែល៥ឆ្នាំទៀតភ្នំនេះត្រូវបាត់ចេញពីផែនទីក្នុងស្រុកខ្មែរតែម្តង៕
Source: Kampuchea Thmey Daily
0 Comments