លោក កែវ រ៉េមី ថា EU យក​លេស​បញ្ហា​សិទ្ធិមនុស្ស ដើម្បី​ដក​ការ​អនុគ្រោះ​ពន្ធ EBA ពី​កម្ពុជា​

ភ្នំពេញ ៖ លោក កែវ រ៉េមី ប្រធាន​គណៈកម្មាធិការ​សិទ្ធិមនុស្ស​កម្ពុជា​បាន​អះអាង​ថា ដោយសារ​តែ​ការ​អនុគ្រោះ​ពន្ធ (EBA) មាន​សារប្រយោជន៍​ចំពោះ​ប្រជាជន​ខ្មែរ និង​រួមចំណែក​ជាមួយ​រាជរដ្ឋា​ភិបាល ក្នុងការ​កាត់បន្ថយ​ភាពក្រីក្រ និង​ការ​បង្កើត​ការងារ​ដល់​កម្មករ កម្មការិនី ហើយ​នៅពេល​មាន​ការវិវត្តន៍​ខ្លាំង EU បែរជាយក​លេស​បញ្ហា​សិទ្ធិមនុស្ស ដើម្បី​ដក​ការអនុគ្រោះ​ពន្ធ​នេះ​។​
​
ប្រធាន​គណៈកម្មាធិការ​សិទ្ធិមនុស្ស​កម្ពុជា​លើកឡើង​បែបនេះ ឆ្លើយតប​សំណួរ​អ្នកសារព័ត៌មាន ក្រោយ​ជំនួប​ជាមួយ​អ្នកស្រី រ៉ូ​ណា ស្មី​ត (Rhona Smith ) អ្នករាយការណ៍​ ពិសេស​អង្គការ​សហប្រជា​ជាតិ​ទទួលបន្ទុក​សិទ្ធិមនុស្ស​នៅ​កម្ពុជា កាលពី​រសៀល​ថ្ងៃ​ច័ន្ទ ទី​០៥ ខែ​វិច្ឆិកា ឆ្នាំ​២០១៨​។​
​
លោក កែវ រ៉េមី បាន​ថ្លែងប្រាប់​អ្នកសារព័ត៌មាន​ក្រោយពី​ជំនួប​ពិភាក្សា​នោះ​ថា ដោយសារ​តែ​ការ​អនុ​គ្រោះ​ពន្ធ EBA មាន​សារប្រយោជន៍ ដែល​អ៊ី​យូ​បាន​ដល់​ប្រជាជន​ខ្មែរ រួមចំណែក​ជាមួយ​រាជរដ្ឋា​ភិបាល ក្នុង​ការ​កាត់បន្ថយ​ភាពក្រីក្រ និង​ការបង្កើត​ការងារ​ដល់​កម្មករ កម្មការិនី​យើង ហើយ​ស្ថាន​ភាព​ពួកគេ​ត្រូវបាន​យកចិត្តទុកដាក់​ជាពិសេស​ពី​សម្ដេច​តេ​ជោ ធ្វើ​ឲ្យ​មានការ​ប្រែប្រួល​យ៉ាង​ខ្លាំង​ក្នុង​រយៈពេល​ចុងក្រោយ​នេះ ប៉ុន្តែ​នៅពេល​មាន​ការវិវត្តន៍​យ៉ាងខ្លាំង អី​យូ បែរ​ជា​យក​លេស​បញ្ហា​សិទ្ធិ​មនុស្ស ដើម្បី​ដក​នូវ​ការអនុគ្រោះ​ពន្ធ EBA នេះ។
​
លោក កែវ រ៉េមី បញ្ជាក់ថា “​គាត់​ធ្វើ​អត់​ត្រូវ ទី​១ អ្វី​ដែល​គាត់​ជួយ​ហើយ​គាត់​បំផ្លាញ​នូវ​សមិទ្ធផល ដែល​គាត់​បាន​ចូលរួម​ជួយ​។ ចំណុច​ទី​២​ទៀត ការដែល​និយាយ​ចោទ​កម្ពុជា​ថា កម្ពុជា​រំលោភ​សិទ្ធិ​មនុស្ស គឺជា​ដែល និយាយ​ឲ្យ​ចំ​ទៅ​វា​អត់​ត្រឹមត្រូវ ហើយ​មាន​ស្អី​ជា​សំអាង​។

ឥឡូវ​ខ្ញុំ​គ្រាន់តែ​ជម្រាប​ជូន​ថា នៅ​ប្រទេសជិតខាង​យើង​ គណបក្ស​នយោបាយ មានតែ​គណបក្ស​មួយ​ប៉ុណ្ណោះ ហើយ​ស្ថានភាព​សិទ្ធិមនុស្ស​អត់​ល្អ អត់​ប្រសើរ​ជាង​យើង​ទេ ក៏ប៉ុន្តែ​ទៅ​ដៀល​ជាមួយ​ប្រទេស​នោះ ក្នុង​ការ​អនុគ្រោះ​ពន្ធ ចឹ​ង​គាត់​មក​ចោទ​យើង​ថា រំលោភ​សិទ្ធិ​មនុស្ស​ម៉េច​ត្រូវ ដោយ​សារ​ស្ថានភាព​សិទ្ធិមនុស្ស​ល្អ​ជាង​ប្រទេស​នោះ​ផង​។

ប្រទេស​មួយ​ផ្សេងទៀត ក៏​ដូចគ្នា​ដែរ ខ្ញុំ​មិន​ចង់​និយាយ​ចំ​ឈ្មោះ​ប្រទេស​ទេ ក៏ប៉ុន្តែ​អី​យូ​គាត់​ដៀល​មក គាត់​ថា គាត់​អនុគ្រោះ​ផ្តល់​ការអនុគ្រោះ​ពន្ធ ក៏ប៉ុន្តែ​សម្រាប់​កម្ពុជា​រឿង​នយោបាយ​ទេ មែនទែន​ទៅ​រឿង​ឌាប់​ប៊​ល​ស្តែ​ន​ដា​ត ស្តង់ដារ​ប៉ិន​គាត់​ពីរ​បី​បួន​មួយ​រយ ក៏ប៉ុន្តែ​យ៉ាងណាក៏ដោយ ដំណើរការ​ទៅ​មុខ គឺ​ទៅ​ហើយ សេដ្ឋកិច្ច​របស់​យើង​រក្សា​នូវ​កំណើន​ជានិច្ច​”​។​
​ជាមួយគ្នា​នោះ លោក កែវ រ៉េមី បាន​ថ្លែង​អំណរគុណ​ចំពោះ​រាជរដ្ឋាភិបាល ដែល​បាន​យកចិត្តទុក​ដាក់​ចំពោះ​កម្មករ កម្មការិនី តាំងពី​យន្តការ​មិន​ឲ្យ​ឡើងថ្លៃ​ផ្ទះ ថ្លៃ​ទឹក ថ្លៃ​ភ្លើង ការ​ដឹក​ជញ្ជូន ការ​ព្យាបាល​មិន​យកលុយ ប្រាក់​ចូល​និវត្ត និង​បញ្ហា​ប្រាក់​ឈ្នួល​អប្បបរមា​ជាដើម ហើយ​ប្រាក់​ឈ្នួល​អប្បបរមា​នេះ លើស​ប្រទេស​គេ​ច្រើន​ណាស់ ដូចជា​ឥណ្ឌា បង់​ក្លា​ដេ​ស ភូមា ស្រីលង្កា វៀតណាម​ជាដើម ហើយ​ទាប​ជាង​បណ្ដា​ប្រទេស​ប្រមាណ​ប៉ុណ្ណោះ ហើយ​លោក​មិន​នឹកស្មានថា មាន​ការវិវត្តន៍​លឿន​បែបនេះ​សោះ​។

ជាមួយគ្នា​នោះ លោក កែវ រ៉េមី ក្នុងនាម​ប្រធាន​គណៈកម្មាធិការ​សិទ្ធិមនុស្ស​កម្ពុជា​បាន​ស្នើ​ឲ្យ EU ពិចារណា​ជាថ្មី​លើ​ការ​អនុគ្រោះ​ពន្ធ EBA នេះ ពីព្រោះ​កុំ​ឲ្យ​មាន​ពាក្យ​ថា បាន​ចូលរួម​ជាមួយ​រដ្ឋាភិ​បាល​ហើយ បែរជា​បំផ្លាញ​ទៅវិញ នេះ​ជាការ​ខាតបង់​សម្រាប់​កម្មករ កម្មការិនី​។​

សូម​បញ្ជាក់​ថា គណៈកម្មការ​អឺរ៉ុប កាលពី​ថ្មីៗ​នេះ បានប្រកាស​អំពី​ដំណើរ​ការ​ដក​ប្រព័ន្ធ​អនុគ្រោះ​ពន្ធ EBA ចេញពី​ប្រទេស​កម្ពុជា និង​ប្រទេស​មី​យ៉ាន់​ម៉ា ក្នុងករណី​ដែល​មិនមាន​ការកែសម្រួល​អ្វីមួយ​តាម​ការចង់បាន​របស់​ខ្លួន ប៉ុន្តែ​គម្រោង​នេះ ត្រូវបាន​សភា​ពាណិជ្ជកម្ម​អន្តរជាតិ​សំខាន់ៗ​៥​ស្ថាប័ន​របស់​អឺរ៉ុប ដែល​ជា​តំណាង​ឲ្យ​ប្រទេស​ធំៗ​ចំនួន​៩​ប្រទេស​នៅ​អឺរ៉ុប បាន​សរសេរ​លិខិត​ពិសេស​មួយ​ច្បាប់​ផ្ញើ​ជូន លោកស្រី Cecilia Malmstrom ស្នងការ​ទទួលបន្ទុក​ពាណិជ្ជកម្ម គណៈកម្មការ​អឺរ៉ុប ដោយ​ប្រឆាំង​ចំពោះ​ការកំណត់​ដក​ប្រព័ន្ធ​អនុគ្រោះ​ពន្ធ (EBAs) ចេញពី​ប្រទេស​កម្ពុជា​នេះ​។

ដោយឡែក តំណាង​ក្រុមប្រឹក្សា​ធុរកិច្ច​អាស៊ាន សហភាព​អឺរ៉ុប ប្រចាំ​អាស៊ីអាគ្នេយ៍ បាន​ថ្លែង​ថា ប្រសិន​បើ​មានការ​ដក​ពន្ធ​អនុគ្រោះ EBA ពី​កម្ពុជា​មែន​នោះ ក្រុមហ៊ុន​អឺរ៉ុប​ប្រមាណ​៤០០​ក្រុមហ៊ុន នឹង​ចាត់ទុកថា គណៈកម្មការ​អឺរ៉ុប អនុវត្ត EBA នេះ ជា​ឧបករណ៍​នយោបាយ​បរទេស​របស់​ខ្លួន​សម្រាប់​កម្ពុជា​។​
​
ទាក់​ទ​បញ្ហា​នេះ កាលពី​ថ្មីៗ​នេះ ប្រធាន​គណបក្ស​នយោបាយ​ចំនួន​២ ក៏បាន​ធ្វើ​លិខិត​ស្នើសុំ​ជួប​លោក George Edgar អគ្គរដ្ឋទូត​សហភាព​អឺរ៉ុប​ប្រចាំ​នៅ​កម្ពុជា​ផងដែរ ដើម្បី​សិក្សា​អំពី​ការវិវត្តន៍ នៃ​គម្រោង​ដក​ប្រព័ន្ធ​អនុគ្រោះ​ពន្ធ (EBA) របស់​សហភាព​អឺរ៉ុប​ពី​កម្ពុជា​៕

Source: Kampuchea Thmey Daily