បើក​រថយន្ត​វ៉ា​ម៉ូតូ ​ជ្រុល​ចង្កូត​ទៅ​បុក​ម៉ូតូ​មួយ​គ្រឿង​ទៀត ស្លាប់​ម្នាក់​ រង​របួស​ម្នាក់

កណ្ដាល ៖ មាន​ករណី​គ្រោះថ្នាក់​ចរាចរណ៍​មួយ​ បាន​កើតឡើង ​បង្ក​ដោយ​រថយន្ត ម៉ាក MITSUBISHI បើក​វ៉ា​ម៉ូតូ​មិន​ស្គាល់​ម៉ាក ​រួច​ជ្រុល​ចង្កូត​ទៅបុក​ម៉ូតូ​មួយគ្រឿង​ទៀត​ដែល​ធ្វើដំណើរ​បញ្ច្រាស​ទិស​គ្នា បណ្ដាលឲ្យ​ស្លាប់​ម្នាក់ ​រង​របួស​ម្នាក់។

​ហេតុការណ៍​គ្រោះថ្នាក់​ចរាចរណ៍​ខាងលើ​នេះ​បានកើត​ឡើង​នៅ​ថ្ងៃអាទិត្យ ទី​១១​កើត ខែកត្តិក ឆ្នាំច សំរឹទ្ធ​ស័ក ពស​២៥៦២ ត្រូវ​នឹង​ថ្ងៃ​ទី​១៨ ខែ​វិច្ឆិកា ឆ្នាំ​២០១៨ វេលា​ម៉ោង​១៧​និង​៥០​នាទី នៅ​លើ​ផ្លូវ​ខេត្ត​៣៨០ ចំណុច​ភូមិ​ព្រែក​តាមាក់ ឃុំ​ព្រែ​កតា​មាក់ ស្រុក​ខ្សាច់កណ្ដាល ​ខេត្ត​កណ្ដាល​។

​នគរបាល​ចរាចរណ៍​បា​ន​ឲ្យ​ដឹង​ថា​ អ្នក​ស្លាប់​ឈ្មោះ ​អេង​ លាង​អ៊ី ភេទ​ស្រី ​អាយុ​២​ឆ្នាំ​ ឯ​អ្នករបួស​ឈ្មោះ ​ពៅ ​លាង​អេង ​ភេទ​ប្រុស ​អាយុ​២៨​ឆ្នាំ មាន​ទីលំនៅ​ភូមិ​អញ្ច្រែងលើ ​ឃុំ​ពុក​ឫស្សី​ ស្រុក​ខ្សាច់​កណ្តាល​។​
​
នគរបាល​បាន​បញ្ជាក់ថា កាលពី​ថ្ងៃ​ និង​វេលា​កើតហេតុ​ខាងលើ មាន​រថយន្ត​មួយគ្រឿង​ម៉ាក MITSUBISHI ពណ៌ទឹកប៊ិច ប្រភេទ​ទេសចរណ៍ ពាក់​ស្លាកលេខ​ភ្នំពេញ 2C-0072 បើកបរ​ដោយ​ឈ្មោះ ធៀ​ម អូ​លីដា ភេទ​ប្រុស អាយុ​៣២​ឆ្នាំ រស់នៅ​ភូមិ​ស្វាយ​អាត់​ក្រោម ឃុំ​ព្រែ​កតា​មាក់ ស្រុក​ខ្សាច់​កណ្ដាល បើកបរ​ក្នុង​ទិសដៅ​ពី​ត្បូង​ទៅ​ជើង។​

​លុះ​មកដល់​ចំណុច​កើតហេតុ​រថយន្ត​ខាងលើ​បាន​វ៉ា​ម៉ូតូ​មួយ​គ្រឿង​ទៀត ​មិន​ស្គាល់​ម៉ាក ​ហើយ​បាន​ជ្រុល​ទៅ​បុក​ម៉ូតូ​មួយ​គ្រឿង​ម៉ាក SMAHS C110 ពណ៌​ខ្មៅ ពាក់​ស្លាក​លេខ​កណ្ដាល​1J-4774 បើកបរ​ដោយ​ឈ្មោះ​ ពៅ លាង​អេង អាយុ​២៨​ឆ្នាំ នៅ​ភូមិ​អ​ញ្ច្រែង​លើ ឃុំ​ពុក​ឫស្សី ស្រុក​ខ្សាច់កណ្ដាល ខេត្ត​កណ្ដាល​(​រង​របួស​ធ្ងន់​បញ្ជូន​ទៅកាន់​មន្ទីរពេទ្យ​ភ្នំពេញ​)​ បើកបរ​នៅ​ក្នុង​ទិសដៅ​ពី​ជើង​ទៅ​ត្បូង ដោយ​មាន​អ្នករួមដំណើរ​ម្នាក់​ឈ្មោះ អេង​ លាងអ៊ី ភេទ​ស្រី អាយុ​២​ឆ្នាំ នៅ​ភូមិ​អ​ញ្ច្រែង​លើ ឃុំ​ពុក​ឫស្សី ស្រុក​ខ្សាច់កណ្ដាល ខេត្ត​កណ្ដាល​(​ស្លាប់​នៅ​កន្លែងកើតហេតុ​)។​ ករណី​ខាងលើនេះ​ បណ្តាលមកពី​អ្នកបើកបរ​រថយន្ត​ខាងលើ ​បើកបរ​វ៉ា​ជែង​ខ្វះ​ការប្រុងប្រយ័ត្ន​។​ចំពោះ​អ្នកបើកបរ​រថយន្ត រួម​ទាំង​វត្ថុតាង ​ត្រូវបាន​ឃាត់​និង​រក្សាទុក​នៅ​អធិការ​នគរបាល​ស្រុក ។

ចំណែក​សព ​ត្រូវ​បាន​សមត្ថកិច្ច​ប្រគល់​ឲ្យ​គ្រួសារ​យក​ទៅ​ធ្វើបុណ្យ​តាម​ប្រពៃណី​៕
​
​

Source: Kampuchea Thmey Daily