ដោយផ្គើនទៅនឹងការប្តេជ្ញាចិត្តរបស់សហរដ្ឋអាមេរិកក្នុងការរុញច្រានអ្នកកំពុងស្វែងរកសិទ្ធិជ្រកកោននៅឯព្រំដែន, ក្បួនមួយនៃមនុស្សប្រហែល២០០នាក់បានចាប់ផ្តើមកាលពីថ្ងៃអាទិត្យចេញពីប្រទេសអែលសាល់វ៉ាឌ័រដើម្បីស្វែងរកក្តីសុបិនរបស់ពួកគេនៅសហរដ្ឋអាមេរិក។
ក្រុមនេះដែលបានបំបែកខ្លួនចេញពីក្បួនធំនៃជនអន្តោប្រវេសន៍អាមេរិកកណ្តាលដែលចាប់ផ្តើមដំណើររបស់ខ្លួនកាលពីខែមុនគឺបានប្រមូលផ្តុំគ្នានៅទីលានមួយនៅភាគខាងលិចរដ្ឋធានី។
បន្ទាប់មកពួកគេបានចេញទៅរួមគ្នាដោយឡានក្រុងឆ្ពោះទៅកាន់ទីក្រុង Sonsonate ដោយលើកឡើងពីអំពើហិង្សារបស់ក្រុមអន្ធពាលនិងភាពក្រីក្រជាមូលហេតុរបស់ពួកគេ។
ពីទីនោះ ជនអន្តោប្រវេសន៍ដែលរួមមានទាំងគ្រួសារជាច្រើនជាមួយកូនៗផងដែរបាននិយាយថា ពួកគេនឹងធ្វើដំណើរទៅប្រទេសហ្គាតេម៉ាឡាតាមឡានក្រុងនិងបន្តទៅសហរដ្ឋអាមេរិក។
ទោះបីជាយ៉ាងណាក៏ដោយ ពួកគេដឹងថា វាមិនងាយស្រួលទេបើគ្មានទិដ្ឋាការអាមេរិកនោះ។
នៅថ្ងៃទី១៣ខែតុលា ជនអន្តោប្រវេសន៍ហុងឌូរ៉ាសរាប់ពាន់នាក់បានចេញដំណើរក្នុងក្បួនមនុស្សដែលកំពុងព្យាយាមទៅដល់សហរដ្ឋអាមេរិក។
នៅចុងខែតុលា ជនជាតិអែលសាល់វ៉ាឌ័រយ៉ាងតិច២,០០០នាក់ផ្សេងទៀតបានធ្វើតាមនេះដោយលើកឡើងពីភាពគ្មានការងារធ្វើនិងអំពើហិង្សារបស់ក្រុមអន្ធពាល។
ក្រុមសាសនានិងសង្គមបានអំពាវនាវឲ្យរដ្ឋាភិបាលព្យាយាមដោះស្រាយលក្ខខណ្ឌទាំងនេះ។
ទន្ទឹមនោះ នៅក្នុងទីក្រុង Tijuana នៃប្រទេសម៉ិកស៊ិក អ្នកស្រុកបានចេញមកតវ៉ាកាលពីថ្ងៃអាទិត្យនៅជិតព្រំដែនសហរដ្ឋអាមេរិកដើម្បីគាំទ្រនិងប្រឆាំងការធ្វើចំណាកស្រុកដ៏ធំនៅក្នុងទីក្រុងរបស់ពួកគេ។
គួរបញ្ជាក់ថា នៅពេលនេះ ជនអន្តោប្រវេសន៍អាមេរិកកណ្តាលប្រហែល២,៥០០នាក់កំពុងស្នាក់នៅក្នុងទីជំរកមួយដែលត្រូវបានបង្កើតឡើងនៅក្នុងពហុកីឡាដ្ឋាន Tijuana ៕ AFP
Source: Kampuchea Thmey Daily
0 Comments