រតនគិរី ៖ កម្លាំងនគរបាលក្រុងបានលុង ឃាត់ខ្លួនជនសង្ស័យបានជាបន្តបន្ទាប់ពាក់ព័ន្ធករណីចោរកម្ម(លួចឈើ គ្រឿងសង្ហារិម) ដែលបានធ្វើសកម្មភាពលួចយ៉ាងសកម្មក្នុងក្រុងបានលុង។
ការឃាត់ខ្លួនជនសង្ស័យខាងលើនេះ ធ្វើឡើងកាលពីវេលាម៉ោង១២ថ្ងៃត្រង់ ថ្ងៃសៅរ៍ ១០កើត ខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៧ ខែវិច្ឆិកា ឆ្នាំ២០១៨ ស្ថិតនៅត្រង់ចំណុចភូមិអូរកន្តិល សង្កាត់បឹងកន្សែង ក្រុងបានលុង។
អធិការរងនគរបាលក្រុងបានលុងទទួលផែនព្រហ្មទណ្ឌលោក តេង សាវុធ បានឲ្យកម្ពុជាថ្មី ដឹងថា ក្រោយពីទទួលបានពាក្យបណ្តឹងពីជនរងគ្រោះភ្លាមកម្លាំងរបស់លោកក៏បានចុះឃាត់ខ្លួន ជនសង្ស័យម្នាក់ឈ្មោះ ចាន់ ដេវីដ ភេទប្រុស អាយុ២៣ឆ្នាំ ជនជាតិខ្មែរ មុខរបរ មិនពិតប្រាកដ។
លោកថា ជនសង្ស័យឈ្មោះ ចាន់ ដេវីដ ក្រោយពីសមត្ថកិច្ចបានសាកសួរបំភ្លឺខ្លួនបានសារភាពថា មានបក្ខពួកចំនួន០២នាក់ទៀត ក្រោយមកសមត្ថកិច្ច បានឈានទៅឃាត់ខ្លួនជនសង្ស័យ០២នាក់បន្ថែមទៀតនៅថ្ងៃដដែលនោះ
១- ឈ្មោះ ផៃ ធារ៉ា ភេទប្រុស អាយុ២១ឆ្នាំ ជនជាតិខ្មែរ មុខរបរ មិនពិតប្រាកដ។
២- ឈ្មោះ ឆៃ សុធារិទ្ធ ភេទប្រុស អាយុ២៣ឆ្នាំ ជនជាតិខ្មែរ មុខរបរ មិនពិតប្រាកដ ទាំង៣នាក់មានទីលំនៅភូមិ/ឃុំកើតហេតុខាងលើ។
ក្នុងនោះដែរជនសង្ស័យទាំង៣នាក់បានលួចយកគ្រឿងសង្ហារិមឈើប្រណិតជាច្រើនដុំដូចជា÷ ឈើកូនក្រឡឹងបេង-ធ្នង់នឹងក្ដារងឿឈើធ្នង់ជាច្រើនសន្លឹកថែមទៀតផងដែរ។
បច្ចុប្បន្នជនសង្ស័យទាំង៣នាក់រួមទាំងវត្ថុតាងត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងបានលុង និងបំពេញសំណុំរឿងបញ្ជូនទៅអយ្យការអមសាលាដំបូងខេត្តដើម្បីចាត់ការទៅតាមនីតិវិធីច្បាប់។
សូមបញ្ជាក់ថា ជនសង្ស័យ៣នាក់ខាងលើនេះពូកែក្នុងការធ្វើសកម្មភាពលួចយ៉ាងសកម្មនៅក្នុងក្រុងបានលុងទាំងមូល ប៉ុន្តែពេលនេះត្រូវបានអស់លក្ខណ៍។ មួយវិញទៀតប្រជាពលរដ្ឋមានការត្រេកអរយ៉ាងខ្លាំងដែលសមត្ថកិច្ចចាប់បានចោរលួចឈើទាំងនោះ ព្រោះពួកគាត់ទុករបស់ដែលមានតម្លៃនៅខាងក្រៅផ្ទះមិនបានគង់ទេបាត់រហូតតែម្តង៕
Source: Kampuchea Thmey Daily
0 Comments