ព្រះសីហនុ ៖ ស្នងការដ្ឋាននគរបាលខេត្តព្រះសីហនុ នារសៀល ថ្ងៃទី១៨ ខែវិច្ឆិកា ឆ្នាំ២០១៨ បានបញ្ជូនខ្លួនជនសង្ស័យ ប្រើប្រាស់ឯកសណ្ឋានសមត្ថកិច្ចប៉ូលិស និងអាវុធ ខុសច្បាប់ ចំនួន០៣នាក់ ដែលជំនាញធ្វើសកម្មភាពកាច់កម៉ូតូ ទៅ សាលាដំបូង ខេត្តព្រះសីហនុ ដើម្បីចាត់ការតាមផ្លូវច្បាប់។
លោកឧត្ដមសេនីយ៍ត្រីកុល ផាលី ស្នងការរងនគរបាលខេត្តព្រះសីហនុទទួលផែន ព្រហ្មទណ្ឌ បានឲ្យដឹងថា ជនជាប់សង្ស័យ ដែលបានចាប់ខ្លួនខាងលើ មានឈ្មោះ១. ឈ្មោះ ឈិន ពេជ្រ ភេទប្រុស អាយុ ៣៦ឆ្នាំ មុខរបរ រត់តាក់ស៊ី។ ទី២.ឈ្មោះ សែម ចាន់ ធូរ ភេទប្រុស អាយុ៣០ឆ្នាំ មុខរបរ មិនពិតប្រាកដ។ ទី៣. ឈ្មោះ គីម ថានិត ភេទប្រុស អាយុ ២៣ឆ្នាំ មុខរបរ មិនពិតប្រាកដ (ជាអ្នកពាក់ឯកសណ្ឋាននគរបាលខុសច្បាប់) រស់នៅភ្នំពេញ។
ជនជាប់សង្ស័យខាងលើ កាលពីយប់ទៀបភ្លឺ ថ្ងៃទី១៧ ខែ វិច្ឆិកា ឆ្នាំ២០១៨ បានធ្វើ សកម្មភាព លួចកាច់កម៉ូតូមួយគ្រឿង របស់ជនរងគ្រោះម្នាក់ ម៉ាក ហុងដា ១២៥ ផលិត ឆ្នាំ ២០១៨ ពណ៌ខ្មៅ(អត់ស្លាកលេខ) ស្ថិតនៅភូមិ១សង្កាត់លេខ២ ក្រុងព្រះសីហនុបានសម្រេច។ ជាមួយគ្នានេះ លោក ស្នងការរង កុល ផាលី ក៏បាន ធ្វើការបញ្ជាក់ផងដែរថា ជនជាប់សង្ស័យទាំង០៣នាក់ខាងលើនេះ កាលពីថ្ងៃទី១៣ ខែវិច្ឆិកា ឆ្នាំ២០១៨ ក៏បានធ្វើសកម្មភាព កាច់ក ម៉ូតូម៉ាក zommer X ពណ៌ក្រហម នៅភូមិ២ សង្កាត់លេខ២ ក្រុងព្រះសីហនុ ផងដែរ។
ក្រោយពេលចាប់ខ្លួន សមត្ថកិច្ចប៉ូលិសបានធ្វើការដកហូត វត្ថុតាង រួមមាន អាវុធខ្លីមួយ ដើម ម៉ាក រ៉ូឡូ មានគ្រាប់កាំភ្លើងចំនួន២គ្រាប់ ខោអាវឯកសណ្ឋាននគរបាលជាតិមួយឈុត ដែកកាច់ សោកម៉ូតូមួយកំប្លេ និងម៉ូតូ២គ្រឿង៕
Source: Kampuchea Thmey Daily
0 Comments