ភ្នំពេញ ៖ យុវជនម្នាក់ ដែលជាជាងសំណង់ ត្រូវបានគេលើកគ្នាមកវាយសម្លាប់ដល់ផ្ទះ ដោយសារតែជនរងគ្រោះជួយការពារប្រពន្ធរបស់ជនដៃដល់ កុំឲ្យប្ដីយវាយធ្វើបាប។
តាមសេចក្ដីរាយការណ៍ពីលោកអនុសេនីយ៍ឯក ទេព បូរ៉ា នាយនគរបាលប៉ុស្តិ៍ច្បារអំពៅទី២ បានឲ្យដឹងថា យុវជនដែលត្រូវគេវាយសម្លាប់នោះត្រូវបានគេស្គាល់ ឈ្មោះ សុខ សឿង អាយុ១៨ឆ្នាំ ស្នាក់នៅផ្ទះជួលភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។ ដោយឡែកជនដៃដល់ឈ្មោះ កែវ សុផា អាយុ២១ឆ្នាំ ស្នាក់នៅក្បែរផ្ទះជនរងគ្រោះ។
លោកមេប៉ុស្តិ៍បានបញ្ជាក់ពីហេតុការណ៍នេះថា កាលពីវេលាម៉ោង២០និង៣០នាទីយប់ ថ្ងៃទី០៥ វិច្ឆិកានេះ ប្រពន្ធជនដៃដល់បានរត់ទៅឲ្យអ្នកជិតខាងជួយ ខណៈដែលប្ដីកំពុងដេញវាយ។ ពេលនោះជនរងគ្រោះក៏បានឲ្យប្រពន្ធជនដៃដល់ទៅពួនក្នុងផ្ទះរបស់ខ្លួន ដែលបង្កឲ្យជនដៃដល់ខឹង ក៏បបួលបក្សពួក៤នាក់ទៅវាយជនរងគ្រោះដល់ក្នុងផ្ទះបណ្តាលឲ្យរងរបួសធ្ងន់ ហើយបានដាច់ខ្យល់ស្លាប់នៅព្រឹកថ្ងៃទី០៦វិច្ឆិកានេះ។
លោកមេប៉ុស្តិ៍បន្តថា បន្ទាប់ពីមានសេចក្ដីរាយការណ៍ពីមេភូមិ កម្លាំងនគរបាលប៉ុស្តិ៍បានចុះទៅស្រាវជ្រាវរកមុខជនដៃដល់ដោយធ្វើការចាប់ខ្លួននារសៀលថ្ងៃទី០៦វិច្ឆិកានេះតែម្ដង។ ចំណែកបក្សពួក៤នាក់ទៀត កំពុងគេចខ្លួន ប៉ុន្តែសមត្ថកិច្ចស្គាល់ឈ្មោះ និងអាសយដ្ឋានអស់ហើយ៕
Source: Kampuchea Thmey Daily
0 Comments