តាកែវ៖ ជនសង្ស័យម្នាក់ក្នុងចំណោមបក្ខពួកពីរនាក់ ត្រូវប៉ូលិសក្រុងដូនកែវក្របួចបាន ខណៈកំពុងធ្វើសកម្មភាពលួចគាស់ហិបដាក់អីវ៉ាន់បំណងលួចទ្រព្យសម្បត្តិ។
ហេតុការណ៍ចាប់ខ្លួនជនសង្ស័យករណីប៉ុនប៉ងលួចទ្រព្យសម្បត្តិអាជីវករនេះ ធ្វើឡើងនៅវេលាម៉ោង២៣និង៣០នាទីថ្ងៃទី០៤ ខែវិច្ឆិកា ឆ្នាំ២០១៨ ស្ថិតនៅចំណុចតូបលក់អីវ៉ាន់ ក្នុងផ្សារតាកែវ ភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ។
ប៉ូលិសក្រុងដូនកែវបានប្រាប់ថា ខណៈជនសង្ស័យទាំង២នាក់កំពុងធ្វើសកម្មភាពគាស់ហិបអាជីវករនោះ ប៉ូលិសសន្តិសុខផ្សារដែលកំពុងដើរល្បាតបានឃើញនិងចាប់ពួកគេបានម្នាក់រីឯម្នាក់ទៀងបានរត់គេចខ្លួនបាត់។ សមត្ថកិច្ចបន្តថា ជនសង្ស័យ ដែលចាប់ឃាត់ខ្លួននោះមានឈ្មោះ រស់ ហេង ភេទប្រុស អាយុ១៧ឆ្នាំ រស់នៅភូមិព្រៃផ្អាវ ឃុំរនាម ស្រុកទ្រាំង ខេត្តតាកែវ ចំណែកបក្ខពួកដែលរត់គេចខ្លួននោះ មានឈ្មោះ ជូ រស់នៅភូមិខ្វាវ ឃុំខ្វាវ ស្រុកទ្រាំង ខេត្តតាកែវ។
បច្ចុប្បន្នជនសង្ស័យ ដែលប៉ូលិសចាប់ខ្លួនបានខាងលើ ត្រូវបានកម្លាំងជំនាញសួរនាំដើម្បីកសាងសំណុំរឿងបញ្ជូនឡើងតុលាការចាត់ការតាមនីតិវិធី៕
Source: Kampuchea Thmey Daily
0 Comments