អាមេរិក​ និង​ចិន​រៀបចំ​កិច្ចពិភាក្សា​សន្តិសុខ​កម្រិត​ខ្ពស់​ដើម្បី​បន្ធូរបន្ថយ​ភាព​តានតឹង

ក្រសួងការបរទេស​អា​មេ​រិ​ក ​បានប្រកាសថា សហរដ្ឋអាមេរិក ​និង​ប្រទេស​ចិន​ នឹងធ្វើ​កិច្ចពិភាក្សា​សន្តិភាព​កម្រិត​ខ្ពស់​នៅ​ថ្ងៃ​សុក្រ ​ដែល​នេះ​ជាស​ញ្ញា​មួយ​នៃ​ការ​បន្ធូរបន្ថយ​ភាព​តានតឹង​បន្ទាប់ពី​មានការ​កើនឡើង​ជាច្រើន​ខែ​ទាក់ទង​នឹង​បញ្ហា​ពាណិជ្ជកម្ម​និង​ជម្លោះ​ក្នុង​តំបន់​។​

រដ្ឋមន្ត្រីការបរទេស​អាមេរិក​លោក Mike Pompeo និង​រដ្ឋមន្ត្រី​ការពារជាតិ​លោក Jim Mattis នឹង​ធ្វើជា​ម្ចាស់ផ្ទះ​ទទួល​សម​ភាគី​ចិន​របស់​ពួកគេ​នៅក្នុង​ទីក្រុង​វ៉ាស៊ីនតោន​សម្រាប់​កិច្ចសន្ទនា​ការទូត​និង​សន្តិសុខ​ចិន​-​អាមេរិក​លើក​ទី​២​បន្ទាប់ពី​កិច្ចប្រជុំ​មួយ​កាលពី​ខែមិថុនា​ឆ្នាំ​២០១៧​។​
​
សេចក្តីប្រកាស​អំពី​កិច្ចចរចា​ជាមួយ​មន្ត្រីជាន់ខ្ពស់​រប​ស់​បក្សកុម្មុយនិស្ត​ចិន​លោក Yang Jiechi និង​លោក​ឧ​ត្ត​ម​សេនីយ៍ Wei Fenghe នេះ​បាន​កើតឡើង​មុន​ថ្ងៃ​បោះឆ្នោត​សភា​អាមេរិក​ដែល​ក្នុងនោះ​លោក​ប្រធានាធិបតី Donald Trump បានចាត់ទុក​ប្រទេស​ចិន​ថា​ជា​មនុស្ស​កំណាច​ម្នាក់​ដែល​ចង់​ឲ្យ​គាត់​ចាញ់​។​
​
កាលពីដើម​ខែតុលា មន្ត្រី​ការពារជាតិ​អាមេរិក​ម្នាក់​បាន​និយាយថា ដំណើរ​ទស្សនកិច្ច​រប​ស់លោក Mattis ទៅកាន់​ប្រទេស​ចិន​ត្រូវបាន​លុបចោល​ដោយសារតែ​ទីក្រុង​ប៉េកាំង​បដិសេធ​។​
​
ប៉ុន្តែ​ក្នុងការ​ថ្លែង​ទៅកាន់​សន្និសីទ​សន្តិសុខ​មជ្ឈិមបូព៌ា​កាលពី​សប្តាហ៍​មុន លោក Mattis បាន​និយាយថា សម​ភាគី​ចិន​របស់លោក​នឹងធ្វើ​ដំណើរ​ទៅ​ក្រុង​វ៉ាស៊ីនតោន​ក្នុងពេល​ឆាប់ៗ​នេះហើយ​បន្ថែមថា “​ការប្រកួតប្រជែង​ជា​យុទ្ធសាស្ត្រ​មិន​បង្កប់​នូវ​ភាព​តានតឹង​ទេ​”​។​
​
ទីក្រុង​វ៉ាស៊ីនតោន​និង​ប៉េកាំង​បាន​ជាប់​នៅក្នុង​ការប្រឈមមុខ​ដា​ក់​គ្នា​ខ្ពស់​ដោយសារ​ទង្វើ​របស់​លោក Trump ដើម្បី​បញ្ចប់​នូវ​អ្វីដែល​លោក​និយាយថា​ជាការ​អនុវត្តន៍​ពាណិជ្ជកម្ម​អយុត្តិធម៌​ច្រើន​ឆ្នាំ​ដោយ​ប្រទេស​ចិន​។​
​
លោក Trump បានដាក់​ពន្ធ​ថ្មី​លើ​ការ​នាំចូល​របស់​ចិន​ប្រហែល​ពាក់កណ្តាល​ខណៈពេលដែល​ទីក្រុង​ប៉េកាំង​បាន​សងសឹក​ទៅវិញ​ដោយ​ដាក់​ពន្ធ​លើ​ផលិតផល​អាមេរិក​ភាគច្រើន​។​
​ទោះបីជា​យ៉ាងណាក៏ដោយ កិច្ចពិភាក្សា​នៅ​ថ្ងៃ​សុក្រ​នេះ​នឹង​ផ្តោត​សំខាន់​ទៅលើ​បញ្ហា​សន្តិសុខ​។ សហរដ្ឋអាមេរិក​បាន​ចោទប្រកាន់​ប្រទេស​ចិន​អំពី​សកម្មភាព​យ៉ាង​ក្លៀវក្លា​ក្នុង​ជម្លោះ​សមុទ្រ​ចិន​ខាងត្បូង​និង​ការរំខាន​នាវាចម្បាំង​របស់​អាមេរិក​នៅ​ដែនសមុទ្រ​អន្តរជាតិ​៕ AFP

​

Source: Kampuchea Thmey Daily