នៅយប់ថ្ងៃចន្ទ ក្រុមអ្នកជួយសង្គ្រោះរបស់ប្រទេសបារាំងកំពុងស្វែងរកជនរងគ្រោះនៅក្រោមកម្ទេចកម្ទីអគារចំនួនពីរដែលបាក់រលំនៅកណ្តាលទីក្រុង Marseille។
ក្រុមមន្ត្រីនៅកំពង់ផែភាគខាងត្បូងមួយនេះបានព្រមានថានឹងមានអ្នកស្លាប់និងរបួសបន្ទាប់ពីអគារពីរជាប់គ្នាបានដួលរលំនៅវេលាម៉ោង៩ព្រឹកហើយគំនរបាក់បែកដ៏ធំរបស់វាបានបិទផ្លូវនៅក្នុងឈុតឆាកមួយដែលស្រដៀងទៅនឹងហេតុការណ៍ក្រោយការរញ្ជួយដី។
លោក Jean-Claude Gaudin អភិបាលក្រុង Marseille បាននិយាយថា “អ្វីដែលសំខាន់នោះគឺថាសូមឲ្យមានអ្នកស្លាប់តិចតួចបំផុតតាមដែលអាចប៉ុន្តែយើងគិតថានឹងមានមួយចំនួន”។
ចំណែករដ្ឋមន្ត្រីក្រសួងលំនៅដ្ឋានលោក Julien Denormandie បាននិយាយថា “ពួកយើងកំពុងធ្វើការទាំងថ្ងៃទាំងយប់ដើម្បីស្វែងរកអ្នកដែលអាចនៅរស់រានមានជីវិត”។
លោក Denormandie បាននិយាយថា បុគ្គលិកជួយសង្គ្រោះចំនួន១០០នាក់ជាមួយសត្វឆ្កែហិតក្លិនកំពុងស្វែងរកឥតឈប់ឈរសព្វពាសពេញតាមកម្ទេចថ្មខណៈពេលដែលយន្តហោះដ្រូនបានពិនិត្យមើលកម្ទេចកម្ទីពីខាងលើ។
មានអ្នកដំណើរពីរនាក់ត្រូវបានគេរាយការណ៍ថាបានរងរបួសស្រាលនៅពេលព្រឹក។
ភាពតានតឹងនៃប្រតិបត្ដិការនេះបានបង្ហាញកាន់តែច្បាស់លាស់នៅពេលរសៀលខណៈដែលផ្នែកមួយនៃអគារជាប់គ្នាទីបីបានដួលរលំ។
អ្នកនាំពាក្យប៉ូលិសលោក Philippe Bianchi បានប្រាប់ AFP ថា អាជ្ញាធរបានជម្លៀសប្រជាពលរដ្ឋរាប់សិបនាក់ចេញពីអគារនៅជិតខាងដើម្បីជាការប្រុងប្រយ័ត្នជាមុន។
ប្រធានាធិបតីបារាំងលោក Emmanuel Macron បាននិយាយថា ទីក្រុង Marseille បានទទួល “សាមគ្គីភាពរបស់ជាតិ” ស្របពេលដែលអ្នកជួយសង្គ្រោះបានធ្វើការរហូតដល់ពេលយប់។
ឧបទ្ទវហេតុដែលកម្រកើតមាននៅក្នុងទីក្រុងដ៏ធំមួយនេះបានបង្កឲ្យមានជម្លោះនយោបាយអំពីគុណភាពផ្ទះសម្បែងរបស់ប្រជាពលរដ្ឋក្រីក្របំផុតក្នុងទីក្រុង Marseille ៕ AFP
Source: Kampuchea Thmey Daily
0 Comments