ភ្នំពេញ ៖ តាមលទ្ធផល នៃកិច្ចប្រជុំកំពូលអាស៊ានលើកទី៣៣ និងកិច្ចប្រជុំកំពូលពាក់ព័ន្ធ នៅប្រទេសសិង្ហបុរី បានបញ្ជាក់ថា ថ្នាក់ដឹកនាំអាស៊ាន បានជំរុញទំនាក់ទំនងកាន់តែស៊ីជម្រៅបន្ថែមទៀត ជាមួយពិភពលោក នេះបើតាមសេចក្ដីប្រកាសព័ត៌មាន ដែលផ្សព្វផ្សាយដោយក្រសួងការបរទេស កាលពីថ្ងៃទី១៦ ខែវិច្ឆិកា ឆ្នាំ២០១៨។
តាមក្រសួងការបរទេសបញ្ជាក់ថា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញចូលរួមកិច្ចប្រជុំកំពូលអាស៊ានលើកទី៣៣ និងកិច្ចប្រជុំកំពូលពាក់ព័ន្ធ ដែលបានប្រព្រឹត្តទៅក្រោមមូលបទ «ភាពរឹងមាំ និងនវានុវត្តន៍របស់អាស៊ាន» នៅថ្ងៃទី ១៣-១៥ ខែវិច្ឆិកា ឆ្នាំ២០១៨ នៅប្រទេសសិង្ហបុរី ហើយជាលទ្ធផលសំខាន់ៗ នៃកិច្ចប្រជុំនោះ គឺថ្នាក់ដឹកនាំអាស៊ាន បានពិភាក្សាប្រកបដោយផ្លែផ្កា និងបានកត់សម្គាល់នូវវឌ្ឍនភាពក្នុងការកសាងសហគមន៍អាស៊ាន ដែលរឹងមាំ និងមាននវានុវត្តន៍ និងកិច្ចខិតខំប្រឹងប្រែង ដើម្បីធ្វើឲ្យកាន់តែស៊ីជម្រៅថែមទៀតនូវទំនាក់ទំនងអាស៊ានជាមួយពិភពលោក។
ថ្នាក់ដឹកនាំបានអះអាងជាថ្មីនូវការប្ដេជ្ញារួមគ្នាក្នុងការអនុវត្តដោយពេញលេញ និងប្រកបដោយប្រសិទ្ធភាព នៃចក្ខុវិស័យសហគមន៍អាស៊ាន២០២៥ និងចក្ខុវិស័យរបស់ថ្នាក់ដឹកនាំអាស៊ានសម្រាប់អាស៊ានដែលរឹងមាំ និងមាននវានុវត្តន៍។
ថ្នាក់ដឹកនាំបានគូសបញ្ជាក់អំពីសារសំខាន់ក្នុងការពង្រឹងមជ្ឈភាព និងឯកភាពអាស៊ាន នៅក្នុងការប្រឹងប្រែងកសាងសហគមន៍ និងការធ្វើឲ្យកាន់តែជិតស្និទ្ធជាមួយដៃគូខាងក្រៅអាស៊ាន។
ថ្នាក់ដឹកនាំបានបញ្ជាក់ឡើងវិញនូវការប្ដេជ្ញាឆ្ពោះទៅរកនិម្មាបនកម្មតំបន់ដែលផ្អែកលើច្បាប់ បើកចំហ មានតម្លាភាព និងបរិយាប័ន្ន និងដោយប្រកាន់ខ្ជាប់យន្តការនានាដែលដឹកនាំដោយអាស៊ាន។
ថ្នាក់ដឹកនាំក៏បានផ្លាស់ប្ដូរយោបល់ទៅលើបញ្ហាសំខាន់ៗជាច្រើនរួមមាន ការត.ភ្ជាប់ ការកាត់បន្ថយគម្លាតអភិវឌ្ឍ បណ្ដាញទីក្រុងឆ្លាតអាស៊ាន បដិវត្តឌីជីថល និងបញ្ហាផ្សេងៗទៀត ដែលជាការកង្វល់រួមដែលប៉ះពាល់ដល់តំបន់ និងពិភពលោក។
លើទិដ្ឋភាពសេដ្ឋកិច្ច ថ្នាក់ដឹកនាំបានកត់សម្គាល់ដោយការពេញចិត្ត ដែលតំបន់សម្រេចបាន GDP រួមគ្នា ២.៨ ទ្រីលាន នៅក្នុងឆ្នាំ២០១៧ និងបានកត់សម្គាល់កំណើនដែលរំពឹងថា នឹងរក្សាស្ថិរភាព ក្នុងអត្រា៥.១ ភាគរយ និង៥.២ភាគរយ នៅក្នុងឆ្នាំ២០១៨ និង២០១៩។
ថ្នាក់ដឹកនាំបានស្វាគមន៍វឌ្ឍនភាពដែលសម្រេចបានប្រកបដោយខ្លឹមសារនៅក្នុងការចរចារភាពជាដៃគូសេដ្ឋកិច្ចទូលំទូលាយតំបន់ (RCEP) ក្នុងឆ្នាំ២០១៨ និងបានប្ដេជ្ញាសាជាថ្មីក្នុងការបញ្ចប់ RCEP ដែលទំនើប គ្រប់ជ្រុងជ្រោយ មានគុណភាពខ្ពស់ និងផ្ដល់ផលប្រយោជន៍ទៅវិញទៅមកនៅក្នុងឆ្នាំ២០១៩។
សម្រាប់ផ្នែកសង្គម-វប្បធម៌ ថ្នាក់ដឹកនាំបានរិះរកដំណោះស្រាយរួមគ្នាក្នុងការធ្វើឲ្យស៊ីជម្រៅការស្គាល់អត្តសញ្ញាណអាស៊ាន និងអាស៊ានរួម និងបានស្វែងរកមធ្យោបាយប្រកបដោយនវានុវត្តន៍ក្នុងការផ្ដល់ឲ្យប្រជាជននូវជំនាញ និងសមត្ថភាព ដែលអាចជួយឲ្យអាស៊ាននៅតែរក្សាបាននូវភាពរស់រវើក បរិយាប័ន្ន និងជាកន្លែងដែលប្រកបដោយថាមវន្តសម្រាប់ប្រជាជនរស់នៅ ធ្វើការងារ និងកម្សាន្ត។
ថ្នាក់ដឹកនាំបានត្រៀមជាស្រេចដើម្បីផ្ដល់ជំនួយដល់ប្រទេសមីយ៉ាន់ម៉ា ក្នុងការរៀបចំការធ្វើមាតុភូមិនិវត្តន៍របស់ប្រជាជនមកប្រទេសមីយ៉ាន់ម៉ាវិញ ក្នុងស្មារតីសាមគ្គីភាពជាគ្រួសារតែមួយ និងបានគូសបញ្ជាក់អំពីតម្រូវការក្នុងការកសាងនូវជំនឿ និងទំនុកចិត្ត រវាងជនធ្វើមាតុភូមិនិវត្តន៍ និងប្រជាជននៅក្នុងសហគមន៍ ក៏ដូចជារវាងមីយ៉ាន់ម៉ា និងសហគមន៍អន្តរជាតិ។
ថ្នាក់ដឹកនាំក៏បានស្នើសុំប្រទេសមីយ៉ាន់ម៉ាឲ្យអញ្ជើញក្រុមការងារនៃមជ្ឈមណ្ឌលអាស៊ានសម្រាប់សម្របសម្រួលជំនួយមនុស្សធម៌ មកបំពេញទស្សនកិច្ចនៅប្រទេសមីយ៉ាន់ម៉ា ដើម្បីវាយតម្លៃអំពីស្ថានការណ៍។
នៅក្នុងកិច្ចប្រជុំកំពូល សម្ដេចតេជោនាយករដ្ឋមន្ត្រី បានបញ្ជាក់យ៉ាងច្បាស់លាស់ទៅលើចំណុចសំខាន់ៗ ដោយបានស្នើឲ្យគ្រប់ភាគីពាក់ព័ន្ធបន្តការពិភាក្សា ស្ដីពីការអនុវត្តក្របខ័ណ្ឌទីក្រុងឆ្លាត ឆ្នាំ២០១៨ និងរិះរកមធ្យោបាយ ដើម្បីធ្វើសមាហរណកម្ម និងធ្វើសុខដុមនីយកម្មផែនការមេ ស្ដីពីការអភិវឌ្ឍទីក្រុងឆ្លាតរបស់ខ្លួន ទៅក្នុងយន្តការតំបន់រួមមួយ ដែលអាចសម្របសម្រួល និងគ្រប់គ្រងប្រកបដោយតុល្យភាព, គូសបញ្ជាក់អំពីសារៈសំខាន់ក្នុងការប្រយុទ្ធប្រឆាំងនឹងឱសថក្លែងក្លាយ និងអន់គុណភាព។
កិច្ចប្រជុំកំពូលបានអនុម័តឯកសារសំខាន់ៗចំនួន៧ រួមមាន ទី១, ក្របខ័ណ្ឌទីក្រុងឆ្លាតអាស៊ាន, ទី២, សេចក្ដីថ្លែងការណ៍ ស្ដីពីគោលការណ៍ណែនាំ ស្ដីពីជំនួយផ្នែកកុងស៊ុល ដោយស្ថានបេសកកម្មការទូតនានា នៃបណ្ដាប្រទេសសមាជិកអាស៊ាន នៅក្នុងបណ្ដាប្រទេសទីបី ដល់ជនជាតិ នៃប្រទេសសមាជិកអាស៊ានដទៃទៀត ,ទី៣, ផែនការមេសម្រាប់ការជំរុញអាស៊ាន២០២៥: ការបញ្ជ្រាបចំណេះដឹងសិទ្ធជនពិការ ,ទី៤,សេចក្ដីថ្លែងការណ៍អាស៊ានស្ដីពីការអនុម័តទិវាយុវជនអាស៊ាន ក្នុងសកម្មភាពទប់ទល់នឹងការប្រែប្រួលអាកាសធាតុ និងគ្រោះមហន្តរាយ ,ទី៥, សេចក្ដីថ្លែងការណ៍អាស៊ាន ស្ដីពីការលើកកម្ពស់ការងារបៃតង សម្រាប់កំណើនប្រកបដោយបរិយាប័ន្ន និងសមធម៌ក្នុងសហគមន៍អាស៊ាន, ទី៦, សេចក្ដីប្រកាសរួមអាស៊ាន ស្ដីពីការប្រែប្រួលអាកាសធាតុជូនសន្និសីទលើកទី២៤ នៃភាគីពាក់ព័ន្ធ (COP 24) ចំពោះអនុសញ្ញាក្របខ័ណ្ឌអង្គការសហប្រជាជាតិ ស្ដីពីការប្រែប្រួលអាកាសធាតុ (UNFCCC) និង ៧) សេចក្ដីប្រកាសរួមអាស៊ានជូនកិច្ចប្រជុំលើកទី១៤ នៃសន្និសីទរបស់ភាគីអនុសញ្ញាស្ដីពីពិពិធភាពជីវចម្រុះ (CBD COP 14)៕
Source: Kampuchea Thmey Daily
0 Comments