ភ្នំពេញ ៖ ដោយសារតែស្រវឹងធ្លាក់ភ្នែកបុរសម្នាក់ បានបើករថយន្តឡិចស៊ីស RX300 មួយគ្រឿងបោះពួយរេចង្កូតទៅបុករះម៉ូតូកង់បីឥណ្ឌាមួយគ្រឿង និងរថយន្តស៊េរីទំនើបចតស្ងៀមមួយគ្រឿងទៀត ហើយបន្តទៅបុកចូលផ្ទះចម្លាក់ខ្មែរ បណ្ដាលឲ្យរងការខូចខាត តែសំណាងល្អ មិនបង្កឲ្យមានមនុស្សគ្រោះថ្នាក់ឡើយ។
គ្រោះថ្នាក់ចរាចរណ៍នោះបានកើតឡើង កាលពីវេលាម៉ោង១១និង២០នាទីយប់ ថ្ងៃទី១៦ ខែវិច្ឆិកា ឆ្នាំ២០១៨ ស្ថិតនៅចំណុចស្តុបក្តាន់ពីរ តាមបណ្ដោយផ្លូវសហព័ន្ធរុស្ស៊ី ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
ប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសម្នាក់ស្រវឹងស្រា បើករថយន្តឡិចស៊ិស RX300 មួយគ្រឿង ពណ៌ស ពាក់ស្លាកលេខភ្នំពេញ 2AM-0258 ធ្វើដំណើរទិសដៅពីកើតទៅលិច លុះមកដល់ចំណុចកើតហេតុខាងលើ បានរេចង្កូតទៅបុកកង់បីឥណ្ឌាមួយគ្រឿងពណ៌ស គ្មានស្លាកលេខ និងរថយន្តស៊េរីទំនើបមួយគ្រឿងម៉ាក(Porsche) ពណ៌ស គ្មានស្លាកលេខ ខណៈកំពុងបើកស្របទិសដៅគ្នានៅខាងមុខ បណ្ដាលរថយន្ត និងម៉ូតូកង់បីខូចខាតផ្នែកខាងក្រោយខាងស្តាំ ហើយរថយន្តបង្កមិនអស់ល្បឿន ក៏បន្តទៅបុកចូលផ្ទះលក់គ្រឿងចម្លាក់ខ្មែរ បណ្ដាលឲ្យខូចខាតគ្រឿងចម្លាក់មួយចំនួន និងរបងស័ង្កសីមួយចំហៀង ត្រូវខូចខាតអស់។ ចំណែករថយន្តបង្កខូចខាតផ្នែកខាងមុខទាំងស្រុង ទើបទៅមុខលែងរួច។
ប្រភពព័ត៌មានបានបន្តថា គ្រោះថ្នាក់ចរាចរណ៍នេះ សំណាងល្អ មិនបង្កឲ្យមានមនុស្សណាម្នាក់ រងរបួសឡើយ ក្រោយនោះបន្តិច ក៏ឃើញម្ចាស់រថយន្តបង្ក ត្រូវបានកម្លាំងសមត្ថកិច្ចមូលដ្ឋានចុះមកដល់បានឃាត់ខ្លួន រួចប្រគល់ជូនទៅកម្លាំងអន្តរាគមន៍ក្រុង និងបញ្ជូនតាមរថយន្តទៅស្នងការរាជធានីភ្នំពេញផងដែរ។
បន្ទាប់មក កម្លាំងសមត្ថកិច្ច ជំនាញធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំដោះស្រាយគ្នាទៅតាមផ្លូវច្បាប់៕
Source: Kampuchea Thmey Daily
0 Comments