មន្ត្រីប៉ូលិសជាន់ខ្ពស់មួយរូបបាននិយាយកាលពីថ្ងៃអង្គារថា វរសេនីយ៍ឯកម្នាក់ដែលស្ថិតនៅក្នុងបញ្ជីតាមចាប់របស់ប្រធានាធិបតីហ្វីលីពីនលោក Rodrigo Duterte ពាក់ព័ន្ធនឹងគ្រឿងញៀនគឺត្រូវបានសម្លាប់នៅក្នុងការបាញ់ប្រហារមួយជាមួយប៉ូលិសអំឡុងពេលប្រតិបត្តិការប្រឆាំងគ្រឿងញៀនមួយ។
មន្ត្រីបាននិយាយថា លោក Santiago Rapiz ដែលជាមន្ត្រីប៉ូលិសនៅក្នុងទីក្រុង Dipolog ភាគខាងត្បូងគឺស្ថិតនៅលើបញ្ជីនៃអ្នកជួញដូរសង្ស័យចំនួន៦,០០០នាក់ដែលត្រូវបានចងក្រងដោយរដ្ឋាភិបាលរបស់លោក Duterte នៅក្នុងសង្គ្រាមប្រឆាំងនឹងគ្រឿងញៀនមួយដែលបានចាប់ផ្តើមបន្ទាប់ពីគាត់ឈ្នះតំណែងប្រធានាធិបតីក្នុងឆ្នាំ២០១៦។
លោក Romeo Caramat ប្រធានប៉ូលិសប្រឆាំងចារកម្មបាននិយាយថា លោក Rapiz បានលក់មេតំហ្វេតាមីនដែលមានតម្លៃ៥០,០០០ប៉េសូ (៩៤០ដុល្លារអាមេរិក) ទៅឲ្យប៉ូលិសដោយសម្ងាត់នៅក្នុងទីក្រុង Dipolog កាលពីយប់ថ្ងៃចន្ទ។
លោក Caramat បន្តថា “មានការដេញចាប់រយៈពេលខ្លីប៉ុន្ដែនៅពេលដែលគាត់ត្រូវបានឡោមព័ទ្ធ គាត់បានបាញ់លើភ្នាក់ងាររបស់យើង”។ លោកបានបន្ថែមថា លោក Rapiz បានស្លាប់នៅក្នុងការបាញ់កាំភ្លើងតទល់គ្នា”។
លោក Rapiz ត្រូវបានចោទប្រកាន់ពីបទការពារស្តេចគ្រឿងញៀននិងចូលរួមក្នុងការជួញដូរគ្រឿងញៀន។
ទោះបីជាយ៉ាងណាក៏ដោយ រ៉យទ័រមិនអាចទាក់ទងជាមួយគ្រួសាររបស់លោក Rapiz បានទេ។
មនុស្សជិត៥,០០០នាក់ត្រូវបានសម្លាប់នៅក្នុងប្រតិបត្តិការប្រឆាំងគ្រឿងញៀនរបស់ប៉ូលិសចាប់តាំងពីខែកក្កដាឆ្នាំ២០១៦មក។
ក្រុមសិទិ្ធមនុស្សបាននិយាយថា មនុស្សរាប់ពាន់នាក់ត្រូវបានគេសម្លាប់នៅក្នុងអ្វីដែលអាចបង្កទៅជាការសម្លាប់ជាប្រព័ន្ធលើអ្នកប្រើប្រាស់គ្រឿងញៀននៅក្នុងសហគមន៍ក្រីក្របំផុត។ យ៉ាងណាក្តី ប៉ូលិសបានច្រានចោលយ៉ាងខ្លាំងដោយនិយាយថា ពួកគេគឺជាជនសង្ស័យជួញដូរគ្រឿងញៀនដែលប្រឆាំងនឹងការចាប់ខ្លួន៕ REUTERS
Source: Kampuchea Thmey Daily
0 Comments