ប្រធានាធិបតីបារាំងលោក Emmanuel Macron កាលពីថ្ងៃអាទិត្យ បានអំពាវនាវឲ្យមានការជំរុញ អាល្លឺម៉ង់- បារាំងដើម្បីធ្វើឲ្យអឺរ៉ុបក្លាយទៅជាតួអង្គសកលដ៏រឹងមាំនិងមានទំនុកចិត្តជាងមុនដែលអាចទប់ស្កាត់ “ភាពវឹកវរ” នៅលើឆាកពិភពលោក។
លោក Macron និងអធិការបតីអាល្លឺម៉ង់លោកស្រី Angela Merkel បានប្រើប្រាស់ពិធីរម្លឹកសង្គ្រាមជាបន្តបន្ទាប់ដើម្បីធ្វើឲ្យមានសាមគ្គីភាពខណៈដែលពួកគេប្រឆាំងនឹងកម្លាំងប្រជានិយមនិងជាតិនិយមនៅទ្វីបអឺរ៉ុបនិងជំហរ “America First” របស់លោក Trump ។
ខណៈការបោះឆ្នោតសភាអ៊ឺរ៉ុបនៅសល់រយៈពេលកន្លះឆ្នាំទៀតនោះ លោក Macron បានអំពាវនាវយ៉ាងខ្លាំងក្លាសុំឲ្យមានការគាំទ្រពីលោកស្រី Merkel លើកំណែទម្រង់ជាច្រើនដើម្បីពង្រឹងអឺរ៉ុប។
លោក Macron បានប្រាប់សភាអាល្លឺម៉ង់ថា “អឺរ៉ុបមានកាតព្វកិច្ចមិនអនុញ្ញាតឲ្យពិភពលោកធ្លាក់ចូលទៅក្នុងភាពវឹកវរទេនិងនាំវាទៅលើផ្លូវឆ្ពោះទៅកាន់សន្តិភាព”។
លោកបាននិយាយនៅក្នុងពិធីមួយដើម្បីគោរពដល់ជនរងគ្រោះពីសង្គ្រាមនិងរបបផ្តាច់ការកាលពីអតីតកាលថា “នោះហើយជាមូលហេតុដែលអឺរ៉ុបត្រូវតែរឹងមាំនិងទទួលបាននូវអធិបតេយ្យភាពបន្ថែមទៀត”។
លោក Macron បាននិយាយទៀតថា វាគឺជាអឺរ៉ុបដែលបានដឹកនាំការជំរុញថាមពលបៃតងនិងប្រឆាំងការប្រែប្រួលអាកាសធាតុហើយឥឡូវនេះបានជំរុញយ៉ាងខ្លាំងក្លានូវវិធីសាស្ត្រពហុភាគីចំពោះការធ្វើពាណិជ្ជកម្ម សន្តិសុខ ការធ្វើចំណាកស្រុកនិងគោលនយោបាយបរិស្ថាន។
ក្នុងនាមជាប្រធានាធិបតីបារាំងដំបូងគេដែលបាននិយាយទៅកាន់សភាអាល្លឺម៉ង់ក្នុងរយៈពេល១៨ឆ្នាំ លោក Macron បានអំពាវនាវឲ្យមានសាមគ្គីភាពអឺរ៉ុបកាន់តែខ្លាំងដើម្បីធ្វើឲ្យប្លុកនេះដោះស្រាយបញ្ហាប្រឈមនាពេលអនាគតនៅក្នុងពិភពលោកដែលមិនប្រាកដប្រជាមួយ។
ស្របពេលជាមួយគ្នានោះដែរ មេដឹកនាំអាល្លឺម៉ង់បានបញ្ជាក់សាជាថ្មីថា លោកស្រីគាំទ្រចំពោះសំណើរបស់លោក Macron សម្រាប់កងទ័ពអឺរ៉ុបនាពេលអនាគតថាជានិមិត្តសញ្ញានៃទ្វីបរួបរួមមួយ៕ AFP
Source: Kampuchea Thmey Daily
0 Comments