កីឡាករខ្មែរ-បារាំង ធារី ចន្ថាប៊ីន ត្រូវបានក្លិបចាស់របស់ខ្លួនគឺTerengganu FAសមាជិកនៅលីគកំពូលរបស់ប្រទេសម៉ាឡេស៊ី (Malaysia Super League) បន្តកិច្ចសន្យា១រដូវកាលទៀត ក្រោយផុតរដូវកាលឆ្នាំ២០១៨ថ្មីៗនេះ ខណៈរូបក៏មានការចាប់អារម្មណ៍ខ្លាំងពីក្លិបនៅស្រុកកំណើតនិងក្លិបនៅប្រទេសថៃ។
ក្លិបជើងឯករងពានរង្វាន់ Malaysia FA Cup រូបនេះបានប្រកាសនៅល្ងាចថ្ងៃអង្គារ សប្ដាហ៍នេះថា ក្លិបសូមប្រកាសដល់អ្នកគាំទ្រថា ក្លិបសម្រេចបន្តកិច្ចសន្យារយៈពេល១រដូវកាលទៀតជាមួយកីឡាករកម្ពុជាគឺ ធារី ចន្ថាប៊ីន។ ភាគីទាំង២បានចុះកិច្ចសន្យារួមគ្នារួចរាល់។ ធារី បានបដិសេធសំណើរចចារពីក្លិបមកពីប្រទេសថៃ ហើយសុខចិត្តរួមរស់ជាមួយយើងជាបន្តទៀត។ ក្លិបសូមអរគុណដល់ធារី ហើយយើងមានភារកិច្ចសំខាន់ជាច្រើនទៀតនៅរដូវកាលក្រោយ។
សូមរំលឹកថា កីឡាករ ធារី ចន្ថាប៊ីន បានធ្វើដំណើរមកកម្ពុជា ដោយចុះកិច្ចសន្យាជាក្លិបភ្នំពេញក្រោនលើកដំបូងកាលពីខែតុលា ឆ្នាំ២០១២ កន្លងទៅ ដំណាលគ្នានឹងមិត្តភក្ដិមកពីបារាំងជាមួយគ្នា កុក បូរីស និង គួច ដានី បន្ទាប់ពីពួកគេបានធ្វើដំណើរជាមួយក្រុមបាល់ទាត់កូនខ្មែរ-អឺរ៉ុប ដែលដឹកនាំដោយអតីតវីរបុរសបាល់ទាត់ខ្មែរ ប៉ែន ផាត មកប្រកួតនៅកម្ពុជា អំឡុងពាក់កណ្ដាលឆ្នាំ ២០១២។ រូបគេជាប់ឈ្មោះក្នុងក្រុមជម្រើសជាតិកម្ពុជា តាំងពីឆ្នាំ២០១៤ រហូតដល់ខែតុលា ឆ្នាំ២០១៧ ថ្មីៗនេះ។
នៅដើមរដូវកាលឆ្នាំ២០១៧ រូបគេបានចេញទៅចូលរួមជាមួយក្លិប Krabi FC សមាជិកពានរង្វាន់លីគលំដាប់ទី២នៅប្រទេសថៃ ខណៈនៅពាក់រដូវកាលរូបគេបានផ្លាស់មកលេងនៅកម្ពុជា វិញជាមួយក្លិបអគ្គិសនីកម្ពុជា។ បើនិយាយពីការប្រកបអាជីពក្នុងក្លិប អំឡុងពេលរួមរស់ជាមួយភ្នំពេញក្រោន កីឡាករ ធារី ធ្លាប់លើកពានរង្វាន់មិត្តហ្វូនខេមបូឌានលីគចំនួន២ឆ្នាំជាប់គ្នាមកហើយ គឺនៅឆ្នាំ២០១២ និង ២០១៦ ក្រោយប្រកបអាជីពនៅកម្ពុជា ជាង៤ ឆ្នាំហើយគេក៏ជាផ្នែកមួយជួយឲ្យភ្នំពេញក្រោន ឈ្នះចំណាត់ថ្នាក់លេខ៣ នៃពានរង្វាន់ Toyota Mekong Club Championship 2014 ផងដែរ។
ចំពោះក្លិបបាល់ទាត់ Terengganu FA ទើបតែមានឱកាសឡើងមកលេងលីគកំពូលម៉ាឡេស៊ី វិញនៅរដូវកាលឆ្នាំ២០១៨ នេះនោះទេ ប៉ុន្តែបានបញ្ចប់រដូវកាលដោយឈរចំណាត់ថ្នាក់លេខ៥ ក្នុងចំណោមក្លិបជាសមាជិកទាំង១២ ខណៈនៅក្នុងពានរង្វាន់ Malaysia FA Cup វិញបានត្រឹមខកចិត្តនៅវគ្គផ្តាច់ព្រ័ត្រ ពោលគឺត្រឹមជើងឯករងក្រោយចាញ់ក្រុមPerak TBG នៅវគ្គផ្តាច់ព្រ័ត្រ៕
Source: Kampuchea Thmey Daily
0 Comments