ត្បូងឃ្មុំ ៖ ដើម្បីទប់ស្កាត់ការរីករាលដាលពីជំងឺម៉ូសាអ៊ិច លើដំណាំដំឡូងមី នាថ្ងៃទី១៤ ខែធ្នូ ឆ្នាំ២០១៨នេះ នៅភូមិក្បាលបឹងសេះកើត ឃុំគរ ស្រុកត្បូងឃ្មុំ ខេត្តត្បូងឃ្មុំ បានរៀបចំទិវាសាលារៀនចម្ការកសិករ ស្ដីពីការគ្រប់គ្រងជំងឺម៉ូសាអ៊ិច លើដំណាំដំឡូងមី ក្រោមអធិបតីភាពឯកឧត្ដមបណ្ឌិត ងិន ឆាយ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ និងលោក ហេង ពិសិដ្ឋ ប្រធានមន្ទីរកសិកម្ម រុក្ខប្រមាញ់ និងនេសាទខេត្តត្បូងឃ្មុំ ក្នុងនោះ ក៏មានការចូលរួមពីប្រធាន/អនុប្រធាន មន្ទីរពាក់ព័ន្ធជុំវិញខេត្ត និងកសិករប្រមា ណជិត២០០នាក់។
បន្ទាប់ពី លោក ដុក សាវឿន អនុប្រធានការិយាល័យក្សេត្រសាស្ត្រ និងផលិតភាពកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បាននាំគណៈអធិបតី ទស្សនាពិព័រណ៍ បង្ហាញចម្ការពិសោធន៍បង្ហាញដំណាំដំឡូងមី និងបង្ហាញលទ្ធផលទទួលបានពីសាលារៀនចម្ការកសិករ ជូនអង្គពិធីរួចមក លោក ហេង ពិសិដ្ឋ ប្រធានមន្ទីរកសិកម្មខេត្តត្បូងឃ្មុំ បានបញ្ជាក់ថា ខេត្តត្បូងឃ្មុំ មានផ្ទៃដីដាំដំណាំដំឡូងមី ៥៣.០០០ហិកតា ក្នុងក្រុង/ស្រុកទាំង៧។
ឆ្នាំ២០១៨នេះ តម្លៃដំឡូងមី ល្អ ក្នុងរង្វង់ ៤០០រៀល/គ.ក្រ ដែលធ្វើឲ្យប្រជាកសិករមានការសប្បាយចត្តិ។ ទន្ទឹមគ្នា នេះដែរ មន្ទីរ បានសង្កេតឃើញដំឡូង មីប្រភេទត្រួយស ទទួលរងនូវជំងឺម៉ូសាអ៊ិក(រួញស្លឹក) ដែលជាជំងឺ មួយប្រភេទ មិនមានថ្នាំព្យាបាល ហើយបណ្ដាលឲ្យដំឡូងមានការលូតលាស់យឺត មើមតិចកម្រិតជាតិម្សៅ(ដេសេ)ទាប។
កត្តា បង្កឲ្យមានជំងឺនេះ ត្រូវបានមន្ត្រីជំនាញសន្និដ្ឋានថា បណ្តាលមកពីការប្រើពូជដែលមានផ្ទុកជំងឺស្រាប់ និងកង្វះ ការថែទាំ បណ្ដាលឲ្យជំងឺរាលដាល តាមរយៈភ្នាក់ងារចម្លងជំងឺ គឺសត្វរុយ ស។
ជាទម្លាប់កសិករ មិនសូវរក្សាទុកពូជដោយខ្លួនឯងនោះទេ។ ចំណែកដំឡូងមីត្រួយពណ៌ស្វាយឬពណ៌ ក្រហម មិនមានលេចចេញរោគសញ្ញាជំងឺនេះទេ។ តាមការសង្កេត តាមដានទិន្នផលដំឡូងមី មានការធ្លាក់ចុះជាបន្តបន្ទាប់ ដោយសារការថយចុះនូវជីជាតិដី ដែលទាមទារឲ្យកសិករត្រូវធ្វើការដាំដុះត្រឹមត្រូវតាមបទដ្ឋានបច្ចេកទេស ដូចជា ការជ្រើសរើសពូជ ការកាត់កំណាត់ដើមពូជ បច្ចេកទេសរៀបចំដី និងដាំ ការប្រើជីបំប៉ន ការថែទាំ ការប្រមូលផល ជាដើម។
ថ្លែងក្នុងឱកាសនោះ ឯកឧត្ដមបណ្ឌិត ងិន ឆាយ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកដ្ឋានកសិកម្ម បានឲ្យដឹងថា នៅឆ្នាំ២០១៧ កម្ពុជា មានផ្ទៃដីផលិតកម្មដំឡូងមីប្រមាណ៦១ម៉ឺនហិកតា ដែលទទួលបានបរិមាណផលប្រមាណ១៣,៨២លានតោន និងនាំចេញគិតជាទឹកប្រាក់ប្រមាណ៦៧៥លានដុល្លារ។
បច្ចុប្បន្ននេះ មានបញ្ហាមួយបាននិងកំពុងកើតឡើង គឺការផ្ទុះឡើងនូវ ជំងឺម៉ូសាអ៊ិក លើដំណាំដំឡូងមីក្នុងខេត្តចំនួន១០ នៅប្រទេសកម្ពុជា។
ដូច្នេះ កសិករ ត្រូវមានវិធានការលុបបំបាត់ជំងឺនេះ ត្រូវធ្វើឲ្យបានឆាប់ រហ័ស និងមានប្រសិទ្ធភាពបំផុត ពីព្រោះជំងឺនេះអាចធ្វើឲ្យទិន្នផលថយចុះយ៉ាងច្រើន ហើយកម្រិតជាតិម្សៅក៏ថយចុះផងដែរ។
ឆ្លើយតបនឹងបញ្ហាដ៏ធ្ងន់ធ្ងរនេះ វិធានការបន្ទាន់ដែលត្រូវយកចិត្តទុកដាក់អនុវត្តមាន៤ គឺ :(១).យុទ្ធនាការទប់ស្កាត់ និងលុបបំបាត់ការឆ្លងរាលដាលពូជដំឡូង មី ដែលមានជំងឺជាលក្ខណៈអន្តរជាតិ ដោយសហការជាមួយបណ្ដាប្រទេសជិតខាង។ (២). ប្រើប្រាស់ពូជគ្មានផ្ទុកជំងឺ និងពូជដែលធន់នឹងជំងឺ។ (៣).ដុតបំផ្លាញដើមដំឡូងមីដែលកើតជំងឺនៅក្នុងចម្ការ។ (៤).កម្ចាត់ភ្នាក់ងារចម្លងជំងឺគឺសត្វរុយ ស។ ជាពិសេសប្រជាកសិករ ត្រូវប្ដេជ្ញាចិត្ត លុបបំបាត់ជំងឺម៉ូសាអ៊ិក លើដំណាំដំឡូងមីនេះជាបណ្ដើរៗ ដើម្បីឈានទៅលុបបំបាត់ជំងឺនេះឲ្យបានទាំងស្រុង ក្នុងរយៈពេលពីរ ឬបីឆ្នាំបន្ទាប់។
ឯកឧត្ដម បានណែនាំកសិករចេះរក្សាទុកពូជដោយខ្លួនឯង ក្នុងដីចម្ការខ្លួនឯងក្នុងរង្វង់១០% នៃផ្ទៃដីដាំ ដុះ ព្រោះវាធ្វើឲ្យយើងរក្សាទុកបាននូវពូជល្អ មិនមានផ្ទុកជំងឺ និងកាត់បន្ថយចំណាយទិញពូជដែលមិនមានប្រវត្តិច្បាស់លាស់ពីគេ ជាពិសេសជៀសវាង ជំងឺម៉ូសាអ៊ិកនេះ។
ឯកឧត្ដមបណ្ឌិត ងិន ឆាយ បានផ្ដាំផ្ញើដល់មន្ត្រីពាក់ព័ន្ធ ក្នុងការបង្កើននូវចំណេះដឹងដល់មន្ត្រីជំនាញ និងបងប្អូនប្រជាកសិករ ក្នុងការទប់ស្កាត់ការរីករាលដាលឆ្លងសមាសភាពចង្រៃ លើដំណាំដំឡូងមីពីតំបន់មួយទៅតំបន់មួយទៀត ក្នុងប្រទេសកម្ពុជា ដើម្បីការពារផលិតផលដំណាំដំឡូងមី ក្នុងគោលបំណងលើកស្ទួយជីវភាព រស់នៅរបស់ប្រជាកសិករឲ្យបានល្អប្រសើរ ដែលលទ្ធផលទាំងនេះ ជាមូលដ្ឋានមួយដ៏សំខាន់ក្នុងការកាត់បន្ថយភាពក្រីក្រ និងការអភិវឌ្ឍន៍សេដ្ឋកិច្ចជាតិ ពិសេសឆ្លើយតបទៅនឹងគោលដៅរបស់រាជរដ្ឋាភិបាល ក្នុងការអភិវឌ្ឍន៍វិស័យកសិកម្ម និងកាត់បន្ថយភាពក្រីក្រនៅជនបទផងដែរ៕
Source: Kampuchea Thmey Daily
0 Comments